(ខេត្តកំពត) ៖ អភិបាលក្រុងកំពត ត្រូវតែជំរុញដល់ក្រុមហ៊ុនប្រមូលសំរាមឲ្យពន្លឿនក្នុងការងារប្រមូលសំរាម និងកាកសំណល់ឲ្យបានផុលផុសនិងឆាប់រហ័ស ដើម្បីឲ្យមានសោភ័ណភាព ហើយសកិ្តសមជាទីក្រុងស្អាតជាផ្ការំដួលបីទង ពិសេសអបអរក្នុងពិធីកំពតសង្ក្រាន្តឆ្នាំ២០១៩។
ការលើកឡើងបែបនេះ ខណៈលោក ជាវ តាយ អភិបាល នៃគណៈអភិបាលខេត្តកំពត បានថ្លែងនៅក្នុងកិច្ចប្រជុំគណៈកម្មការ អនុគណៈកម្មការ រៀបចំកម្មវិធីកំពតសង្ក្រាន្ត ឆ្នាំ២០១៩ និងការងារត្រៀមរៀបចំទទួលបដិសណ្ឋារកិច្ច សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងឱកាសសម្ពោធឲ្យដំណើរការនូវប្រព័ន្ធផ្គត់ផ្គង់ទឹកស្អាតនៅទីរួមខេត្តកំពត កាលពីរសៀលថ្ងៃចន្ទ ៥រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៥ ខែមីនា ឆ្នាំ២០១៩។
ដោយកិច្ចប្រជុំនេះ ក៏មានការអញ្ជើញចូលរួមពីសំណាក់ លោកនាយក នាយករងរដ្ឋបាលសាលាខេត្ត នាយក នាយករងទីចាត់ការ ប្រធាន អនុប្រធានអង្គភាពចំណុះសាលាខេត្ត ប្រធានមន្ទីរ អង្គភាពជុំវិញខេត្ត អភិបាលក្រុង ស្រុក ផងដែរ។
លោកអភិបាលខេត្ត បានមានប្រសាសន៍ទៀតថា ដើម្បីឲ្យកម្មវិធីកំពតសង្ក្រាន្តឆ្នាំថ្មី ២០១៩នេះកាន់តែមានភាពអធិកអធម លោកស្នើដល់មន្ទីរអង្គភាពជុំវិញខេត្ត រៀបចំធ្វើអនាម័យ សម្អាតបរិស្ថាននៅជុំវិញអង្គភាព ដោយត្រូវតែលាបពណ៌របង និងដាក់ភ្លើងលម្អនៅពេលរាត្រីឲ្យមានសោភ័ណភាព ហើយក៏ជំរុញដល់លោកអភិបាលក្រុង ហាមឃាត់មិនឲ្យមានការចតម៉ូតូអាណាធិបតេយ្យ នៅលើផ្លូវក្បែរផ្សារសាមគ្គី ពិសេសក្រុមហ៊ុនប្រមូលសំរាម ត្រូវតែពន្លឿនក្នុងការប្រមូលសំរាមនៅក្នុងក្រុងឲ្យបានទាន់ពេលវេលា កុំឲ្យទុកបង្អាប់ឬស្តុកចោលយូរ ដែលនាំបង្កជាភាពអាប់អួរក្នុងក្រុងកំពតរបស់យើង៕ សេង ណារិទ្ធ
