(ខេត្តកំពត)៖ លោក អូន ខន អភិបាលស្រុកកំពង់ត្រាច កាលពីព្រឹកថ្ងៃអាទិត្យ៤រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៤ ខែមីនា ឆ្នាំ២០១៩ បានដឹកនាំមន្ត្រីក្រោមឱវាទ ចុះពិនិត្យមើលអំពីស្ថានភាពទំនប់អាងស្តុកទឹកភ្នំដំរី ដែលស្ថិតជាប់គ្នារវាងឃុំចំនួនពីរ គឺឃុំដំណាក់កន្ទួតខាងជើង និងឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត ដែលជាទីតាំងស្តុកទឹកមួយដ៏សំខាន់សម្រាប់តម្រូវការប្រើប្រាស់ប្រាំថ្ងៃរបស់ពលរដ្ឋក្នុងមូលដ្ឋាន។
ការចុះពិនិត្យស្ថានភាពទឹកព្រឹកនេះ លោកអូន ខន អភិបាលស្រុកកំពង់ត្រាច បានឲ្យដឹងថា អាងទំនប់ភ្នំដំរី គឺស្ថិតក្នុងភូមិព្រៃកែស ឃុំដំណាក់កន្ទួតខាងជើង និងភូមិអូររលួស ឃុំដំណាក់កន្ទួតខាងត្បូង ដែលមានទំហំ ១.០០០ម៉ែត្រx១.០០០ម៉ែត្រ ពិតជាបានផ្តល់នូវសារសំខាន់បំផុត សម្រាប់ប្រជាពលរដ្ឋដែលរស់នៅក្នុងភូមិសាស្ត្រឃុំចំនួន២ គឺឃុំដំណាក់កន្ទួតខាងជើង និងឃុំដំណាក់កន្ទួតខាងត្បូង។ ប៉ុន្តែដោយសារកត្តាអាកាសធាតុក្នុងឆ្នាំនេះមានកម្តៅខ្លាំង គាប់ជួនទំនប់ទឹកនេះនៅជាប់បឹងចង្កេះភ្នំទើបធ្វើឲ្យទឹកត្រូវហូរច្រោះចូលតាមក្រហែងថ្ម និងជ្រាបទៅក្រោមភ្នំ បណ្តាលឲ្យស្ថានភាពទឹកនៅក្នុងអាងទឹកភ្នំដំរីកាន់តែស្រុតស្រកចុះពីមួយថ្ងៃទៅមួយថ្ងៃ។ទន្ទឹមនឹងស្ថានភាពបែបនេះ លោកបាននិងកំពុងរកវិធានការ ដើម្បីរក្សាទឹកនៅអាងទំនប់នេះ ឲ្យមានលំនឹងដូចមុនវិញ សម្រាប់ផ្គត់ផ្គង់ឲ្យប្រជាពលរដ្ឋប្រើប្រាស់ឲ្យបានគ្រប់គ្រាន់ តាមតម្រូវការ។ លោកបានបញ្ជាក់ទៀតថា ដោយសារខែប្រាំងឆ្នាំនេះមានសភាពក្តៅខ្លាំង និងពុំមានភ្លៀងកក់ខែផងនោះ ធ្វើឲ្យទំនប់ស្តុកទឹកភ្នំដំរីមានការស្រកចុះយ៉ាងខ្លាំង ហើយទឹកនៅសេសសល់ក្នុងអាងប្រហែល១០ភាគរយប៉ុណ្ណោះ។
សូមបញ្ជាក់ថា៖ ទំនប់ទឹកភ្នំដំរីនេះជាអាងផ្តល់នូវប្រភពទឹកសម្រាប់ប្រើប្រាស់ និងស្រោចស្រពដំណាំកសិកម្មគ្រប់ប្រភេទ ដែលទីតាំងនេះបានគ្របដណ្ដប់លើផ្ទៃដីចំនួនពីរឃុំ គឺឃុំដំណាក់កន្ទួតខាងជើង និងឃុំដំណាក់កន្ទួតខាងត្បូង។
ជាមួយនឹងក្នុងដំណើរពិនិត្យស្ថានភាពទឹកក្នុងព្រឹកនេះ លោក អភិបាលស្រុកកំពង់ត្រាច ក៏បានឧបត្ថម្ភនូវថវិកាមួយចំនួន ជូនដល់ក្រុមសហគមន៍ថែរក្សាទឹកអាងទំនប់ភ្នំដំរី ដើម្បីជាការលើកទឹកចិត្ត ក្នុងកិច្ចការពារកន្លងមក។
ដោយឡែកនៅព្រឹកថ្ងៃដដែល បន្ទាប់ពីចុះពិនិត្យស្ថានភាពទឹកនៅទំនប់ភ្នំដំរីរួចមក អាជ្ញាធរស្រុកកំពង់ត្រាច ក៏បានដឹកនាំសហការីចុះពិនិត្យការជួសជុលកំណាត់ផ្លូវលំមួយខ្សែតភ្ជាប់ពីផ្លូវរថភ្លើង ទៅទំនប់ទឹកភ្នំដំរី ដែលគាំទ្រថវិកាដោយក្រុមការងារយុវជន សាលារៀនចិន គាក ឃួន និងសប្បុរសជននានា៕ សេង ណារិទ្ធ
