(ខេត្តកំពត)៖ នៅព្រឹក ថ្ងៃសៅរ៍ ៣រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៣ ខែមីនា ឆ្នាំ២០១៩ នេះ លោក ជាវ តាយ អភិបាលនៃគណៈអភិបាលខេត្តកំពត និងជាប្រធានកិត្តិយសសាខាកាកបាទក្រហមកម្ពុជាខេត្តកំពត និង លោក សម កុសល នាយក នៃនាយកដ្ឋានធនធានមនុស្សកាកបាទក្រហមកម្ពុជា បានអញ្ជើញជាអធិបតីភាពក្នុងពិធីបំពាក់ឯកសណ្ឋានជូនដល់យុវជនកាកបាទក្រហមកម្ពុជាចំនួន ១.១៤៥នាក់។
បានអញ្ជើញចូលរួមពិធីនេះរួមមាន លោក លោកស្រី ជាអភិបាលរងខេត្ត នាយករដ្ឋបាលសាលាខេត្ត នាយកទីចាត់ការ ប្រធានអង្គភាពចំណុះសាលាខេត្ត សមាជិកគណៈកម្មាធិការ គណៈកិត្តិយស គណៈកម្មាធិការអនុសាខា ប្រធានមន្ទីរ អង្គភាពជុំវិញខេត្ត ក្រុមប្រតិបត្តិ លោកគ្រូ អ្នកគ្រូទីប្រឹក្សាយុវជន និងយុវជនកាកបាទក្រហមកម្ពុជា សរុប ប្រមាណ ១.៨០០ នាក់។
លោក ជាវ តាយ អភិបាលខេត្ត និងជាប្រធានកិតិ្តយសសាខាកាកបាទក្រហមកម្ពុជាខេត្តកំពត បានគូសបញ្ជាក់ដោយផ្តល់នូវចំណុចល្អៗជាច្រើនដែលតម្រូវឲ្យយុវជនកាកបាទក្រហមកម្ពុជាត្រូវបន្តអនុវត្តការងារ ព្រមទាំងផ្តែផ្តាំឲ្យយុវជនទាំងអស់ត្រូវសហការគ្នាសាងនូវអំពើល្អឲ្យបានច្រើនប្រកបដោយគុណធម៌ មានចិត្តសប្បុសរសធម៌ ក្នុងការងារជួយសង្គម ជាពិសេសជួយដល់ជនងាយរងគ្រោះគ្រប់ប្រភេទ ដោយមិនប្រកាន់និន្នាការ ពូជសាសន៍ ពណ៌សម្បុរឡើយ។
ក្នុងឱកាសនោះ លោក ជាវ តាយ ក៏បានផ្តល់ប្រាក់ឧបត្ថម្ភ សរុបចំនួន ១២.៥៧០.០០០៛ រួមមាន៖
១/-ឧបត្ថម្ភជូនទីប្រឹក្សាយុវជនកាកបាទក្រហម ២៨ នាក់ ក្នុុងម្នាក់ៗ ទទួលបាន ៤០.០០០៛។
២/-ឧបត្ថម្ភយុវជនកាកបាទក្រហម ១.១៤៥នាក់ ក្នុងម្នាក់ៗ ទទួលបាន ១០.០០០៛ផងដែរ៕ សេង ណារិទ្ធ
