ស្វាយរៀង៖ លោក ប៉េង ពោធិ៍សា អភិបាលខេត្តស្វាយរៀង បានណែនាំសមត្ថកិច្ចពាក់ព័ន្ធត្រូវបន្តតាមដានបទល្មើស Online Scam ដែលអាចនៅលួចបង្កប់តាមទីតាំងនានា ត្រូវបង្ក្រាបបោសសម្អាតឱ្យដល់ឬសគល់។
អភិបាលខេត្តស្វាយរៀង ថ្លែងណែនាំបែបនេះ ខណៈដែលលោកអញ្ជើញបើកកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារខែមិថុនា ឆ្នាំ២០២៦ របស់រដ្ឋបាលខេត្តស្វាយរៀងនាព្រឹកថ្ងៃទី២១ ខែឧសភា ឆ្នាំ២០២៦។
ក្នុងឱកាសនោះ លោកអភិបាលខេត្ត បានថ្លែងអំណរគុណកងកម្លាំង និងអាជ្ញាធរពាក់ព័ន្ធគ្រប់លំដាប់ថ្នាក់ដែលបានយកចិត្តសហការការការពារសន្តិសុខសណ្តាប់បានល្អជូនប្រជាពលរដ្ឋ ជាពិសេសការរៀបចំផែនការការពារ សន្តិសុខសុវត្ថិភាព ជូនដល់សម្តេចតេជោ ហ៊ុន សែន ដែលសម្តេចបានអញ្ជើញមកជួបសំណេះសំណាលជាមួយជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីអង្គភាពនានាជុំវិញខេត្ត នៅសាលប្រជុំសាកលវិទ្យាល័យស្វាយរៀងនាពេលកន្លងទៅ។
បន្ថែមលើសពីនេះ លោក ប៉េង ពោធិ៍សា បានដាក់ចេញនៅទិសដៅសំខាន់ៗមួយចំនួនដូចខាងក្រោម៖
*១៖ មន្ទីរ អង្គភាពជំនាញរួមមានមន្ទីររៀបចំដែនដី និងសាខាពន្ធដារខេត្ត អង្គភាពច្រកចេញចូលតែមួយសាលាខេត្ត ត្រូវជំរុញការផ្តល់សេវាដីធ្លីឱ្យបានលឿនជូនដល់ប្រជាពលរដ្ឋតាមពេលវេលាដែលបានកំណត់
*២៖ អាជ្ញាធរក្រុង ស្រុក និងកងកម្លាំងគ្រប់មូលដ្ឋានទាំងអស់បន្តតាមដានបង្ក្រាបក្មេងទំនើង ដែលបង្ករផលប៉ះពាល់ដល់សណ្តាប់ធ្នាប់ និងរបៀបរៀបរយក្នុងសង្គមមិនត្រូវលើកលែងឡើយ
*៣៖ អាជ្ញាធរគ្រប់លំដាប់ថ្នាក់ ត្រូវពង្រឹងការទប់ស្កាត់ការជួញដូរចែកចាយ និងប្រើប្រាស់គ្រឿងញៀននៅតាមមូលដ្ឋានឲ្យបានម៉ឺងម៉ាត់
*៤៖ បន្តការផ្សព្វផ្សាយច្បាប់ចរាចរណ៍ផ្លូវគោក និងរឹតបន្តឹងការអនុវត្តច្បាប់ ជាពិសេសជំរុញការពាក់មួកសុវត្ថិភាពឲ្យបានត្រឹមត្រូវ
*៥៖ រដ្ឋបាលក្រុង ស្រុក មន្ទីរ អង្គភាព ពាក់ពន្ធទាំងអស់ ត្រូវរៀបចំផែនការសំអាតអនាម័បរិស្ថាននៅទីប្រជុំជន នៅជុំវិញទីកន្លែងធ្វើការរបស់ខ្លួន
*៦៖ មន្ទីរសាធារណការ និងដឹកជញ្ជូនខេត្ត ព្រមទាំងអាជ្ញាធរពាក់ព័ន្ធត្រូវពិនិត្យរៀបចំកែសម្រួលទៅលើប្រព័ន្ធលូរំដោះទឹក ដើម្បីបញ្ជៀសការជនលិចនារដូវវស្សាខាងមុខនេះ
*៧៖ រដ្ឋបាលក្រុងស្រុកត្រូវពិនិត្យតាមដាននិងទប់ស្កាត់ការរំលោភលើដីចំណីផ្លូវ ព្រែក ប្រឡាយ បឹងបួររបស់រដ្ឋឱ្យបានទាន់ពេលវេលា។
នៅក្នុងកិច្ចប្រជុំនេះ លោកអភិបាលខេត្តបានអនុញ្ញាតឲ្យមានការលើកឡើងនូវបញ្ហាប្រឈមផ្សេងៗ និងចំណុចវិជ្ចមានមួយចំនួនទៅលើការអនុវត្តការងាររបស់មន្ទីរអង្គភាពនានាដែលពាក់ព័ន្ធផងដែរ៕
