ភ្នំពេញ៖ នៅថ្ងៃទី១៩ ខែមេសា ឆ្នាំ២០២៦នេះ ដែលជាថ្ងៃចុងក្រោយនៃព្រឹត្តិការណ៍ «នគរសង្ក្រាន្ត» ដែលបានរៀបចំឡើងដើម្បីអបអរបុណ្យចូលឆ្នាំថ្មី នៅរាជធានីភ្នំពេញ មានភ្ញៀវជាតិ និងអន្តរជាតិរួមទាំងប្រជាពលរដ្ឋមកពីគ្រប់ទិសទី មកលេងកម្សាន្តយ៉ាងច្រើនកុះករ បើទោះបី ល្ងាចនេះមានភ្លៀងធ្លាក់ក៏ដោយ។
ស្របពេលជាមួយគ្នានេះ អាជ្ញាធរ និងកងកម្លាំងសមត្ថកិច្ច បានបន្តរក្សា សុខសុវត្ថិភាព និងសណ្តាប់ធ្នាប់ជូនប្រជាពលរដ្ឋ ដើម្បីឱ្យការដើរលេងកម្សាន្ត ប្រកបដោយភាពសប្បាយរីករាយ ក្រោមម្លប់សន្តិភាព និងប្រកបដោយសុខសុវត្ថិភាព ពោលគឺពុំមានហេតុការណាមួយ បង្កជាគ្រោះថ្នាក់ធំដុំឡើយ ។
សូមជម្រាបថា ឆ្នាំនេះព្រឹត្តិការណ៍ «នគរសង្ក្រាន្ត» ត្រូវបានរៀបចំឡើង រយៈពេល៦ថ្ងៃ នៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ ដែលរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក) និងរដ្ឋបាលរាជធានីភ្នំពេញ ដោយមានប្រជាពលរដ្ឋរាប់ម៉ឺនបានចូលរួមលេងកម្សាន្ត ក្នុងរយៈពេល៦ថ្ងៃនេះ។
គួរបញ្ជាក់ថា សម្រាប់ថ្ងៃទី១ នៃពិធីបុណ្យចូលឆ្នាំថ្មីនេះ មានបងប្អូនប្រជាពលរដ្ឋ មកពីគ្រប់ទិសទី បានមកដើរលេងកម្សាន្ត មានចំនួន៩៨៣,០៨០នាក់ ក្នុងនោះភ្ញៀវទេសចរបរទេស ចំនួន៧,០៦៨នាក់។ នៅថ្ងៃទី២ មានបងប្អូនប្រជាពលរដ្ឋ មកដើរលេងកម្សាន្ត ១,៥៦៥,៣៦៧នាក់ ក្នុងនោះ ភ្ញៀវទេសចរបរទេស ចំនួន១៧,៩៤០នាក់។ ថ្ងៃទី៣មានចំនួន ១,៨២៧,៩៩០នាក់ និងនៅថ្ងៃទី០៤ មានចំនួន១៣៨៤៥១១នាក់ ក្នុងនោះប្រជាពលរដ្ឋមកដើរលេងកម្សាន្តចំនួ១៣៧៤៧២០នាក់និងទេសចរបរទេស៩៧៩១នាក់។ នៅថ្ងៃទី៥ មានភ្ញៀវជាតិ និងអន្តរជាតិ ចូលរួមចំនួន ១.៥៥៧.២៥០នាក់ ក្នុងនោះ ភ្ញៀវចំនួន ១.៥៥១.១៥០នាក់ និងទេសចរបរទេស ចំនួន៦១០០នាក់៕
