(ខេត្តកំពត)៖ នៅព្រឹកថ្ងៃចន្ទ ១៣កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៨ ខែមីនា ឆ្នាំ២០១៩នេះ លោក ជាវ តាយ អភិបាល នៃគណៈអភិបាលខេត្តកំពត បានទទួលជួបប្រជាពលរដ្ឋ ចំនួន២៩គ្រួសារ ដែលមានទំនាស់ដីធ្លី ជាមួយកងកម្លាំងការពារកោះឆ្នេរ, ក្រុមហ៊ុនសូងួន និងក្រុមហ៊ុនចាន់សុទ្ធា ដែលស្ថិតនៅភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត។
កិច្ចប្រជុំនេះក៏មានការចូលរួមពីក្រុមការងារគណ:កម្មការគ្រប់គ្រងដីរដ្ឋថ្នាក់ខេត្ត និងបងប្អូនប្រជាពលរដ្ឋ សរុប៤៨នាក់ ដែលមកពីភូមិសាស្ត្រស្រុកឈូក ខេត្តកំពត។
ក្នុងកិច្ចប្រជុំនេះ លោកអភិបាលខេត្ត បានមានប្រសាសន៍បញ្ជាក់ជូនថា៖គណ:កម្មការនឹងរៀបចំកិច្ចប្រជុំ ជាមួយកងកម្លាំងការពារកោះឆ្នេរ, ក្រុមហ៊ុនសូងួន និងក្រុមហ៊ុន ចាន់សុទ្ធា ដោយលើកយកសំណូមពររបស់បងប្អូនប្រជាពលរដ្ឋ មកពិភាក្សារកដំណោះស្រាយសមស្របដើម្បីដោះស្រាយនូវវិវាទខាងលើនេះ និងសូមឲ្យបងប្អូនប្រជាពលរដ្ឋត្រឡប់ទៅវិញ បន្តធ្វើដំណាំ និងអាស្រ័យផលដូចធម្មតា ប្រសិនបើមានការហាមឃាត់ សូមរាយការណ៍ជាបន្ទាន់ មករដ្ឋបាលស្រុក ដែលជាសេនាធិការរបស់ខេត្តជាបន្ទាន់៕ សេង ណារិទ្ធ
