(ខេត្តពោធិ៍សាត់)៖ សមិទ្ធផល (បដិសណ្ឋារសាលា) នៅក្នុងវត្តពោធិ៍សុវណ្ណរង្សី ស្ថិតក្នុងភូមិព្រែកតាវង ឃុំអន្លង់វិល ស្រុកកណ្ដៀង ខេត្តពោធិ៍សាត់ ដែលទើបកសាងរួច បានធ្វើពិធីកាត់ខ្សែបូសម្ពោធដាក់ឱ្យប្រើប្រាស់ជាផ្លូវការ នាព្រឹកថ្ងៃទី១២ ខែមេសា ឆ្នាំ២០២៦ ក្រោមអធិបតីភាពឯកឧត្តម ម៉ក់ រ៉ា ប្រធានក្រុមប្រឹក្សាខេត្ត និងឯកឧត្តម ខូយ រីដា អភិបាលនៃគណៈអភិបាលខេត្តនិងលោកជំទាវ។
ក្នុងឱកាសនោះឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ បានសម្តែងនូវការត្រេកអរ និងមោទនភាពយ៉ាងខ្លាំង ចំពោះសមិទ្ធផលដែលបានលេចរូបរាងឡើងនេះ។ រាល់សមិទ្ធផលដែលកើតមានឡើងលើគ្រប់វិស័យ គឺជាផ្លែផ្កានៃសន្តិភាព និងការខិតខំប្រឹងប្រែងឥតឈប់ឈររបស់ថ្នាក់ដឹកនាំគ្រប់លំដាប់ថ្នាក់ ក្នុងគោលបំណងបម្រើនិងដោះស្រាយការលំបាកជូនប្រជាពលរដ្ឋ ឱ្យបានទាន់ពេលវេលា។ បដិសណ្ឋាសាលានេះ គឺជាចំណងដៃថ្មីមួយទៀត ប្រគេនជូនវត្តពោធិ៍សុវណ្ណរង្សី តម្កល់ទុកជាគរុភ័ណ្ឌ សម្រាប់ព្រះសង្ឃនិងពុទ្ធបរិស័ទប្រើប្រាស់តរៀងទៅ។
ឯកឧត្តម ខូយ រីដា អភិបាលខេត្តពោធិ៍សាត់ ថ្លែងអំណរគុណយ៉ាងជ្រាលជ្រៅចំពោះសប្បុរសជន និងពុទ្ធបរិស័ទគ្រប់ទិសទី ដែលបានរួមគ្នាកសាងសមិទ្ធផលនេះឡើង ដើម្បីទុកជាមរតកសម្រាប់កូនខ្មែរជំនាន់ក្រោយ និងបានអំពាវនាវឱ្យបងប្អូនប្រជាពុទ្ធបរិស័ទទាំងអស់ រួមគ្នាថែរក្សាសុខសន្តិភាពឱ្យបានគង់វង្ស ដើម្បីបន្តកសាងសមិទ្ធផលថ្មីៗបន្ថែមទៀត។
បន្ទាប់ពីមានប្រសាសន៍សំណេះសំណាលរួចមក គណៈអធិបតីនិងសប្បុរសជនទាំងអស់ បានអញ្ជើញកាត់ខ្សែបូសម្ពោធដាក់ឱ្យប្រើប្រាស់ជាផ្លូវការនូវបដិសណ្ឋាសាលា ព្រមទាំងបាននិមន្តព្រះសង្ឃធ្វើកិច្ចសានាទៅតាមគន្លងប្រពៃណីនៃព្រះពុទ្ធសាសនាផងដែរ៕
ប្រភព៖ រដ្ឋបាលខេត្តពោធិ៍សាត់
