(ខេត្តកំពត)៖ ក្នុងរដូវប្រាំងឆ្នាំនេះ ក្នុងភូមិសាស្ត្រខេត្តកំពតភាគច្រើនត្រូវប្រឈមនឹងការខ្វះខាតទឹកសម្រាប់ប្រើប្រាស់ និងស្រោចស្រពដំណាំ។កត្តាបែបនេះធ្វើឲ្យរុក្ខជាតិនៅតាមតំបន់មួយចំនួននៃខេត្តកំពតត្រូវក្រៀមស្វិតស្រពោនផងដែរ។
យ៉ាងណាមិញគេបានកត់សម្គាល់ឃើញកាលពីរដូវប្រាំងឆ្នាំមុនៗ ភូមិសាស្ត្រខេត្តកំពតមានភ្ញៀងកក់ខែជាបន្តបន្ទាប់ ដែលធ្វើឲ្យប្រឡាយ ត្រពាំង បឹងបួ មានទឹកជាប់ជាប្រចាំ ហើយក៏ផ្តល់ភាពងាយស្រួកដល់បងប្អូនកសិករនាំគ្នាដាំដំណាំរួមផ្សំបានស្ទើគ្រប់ទីកន្លែងទទួលបានទិន្នផលខ្ពស់។ចំណែករដូវប្រាំងឆ្នាំនេះ បែរជាអត់មានភ្ញៀងកក់ខែមួយមេឡើយ ដែលធ្វើឲ្យភូមិសាស្ត្រមួយចំនួនក្នុងខេត្តកំពតមានការខ្វះខាតទឹកសម្រាប់ប្រើប្រាស់ក្នុងលំនៅស្ថាន និងគ្មានទឹកស្រោចដំណាំ ដែលបានធ្វើឲ្យដំណាំមួយផ្នែកធំត្រូវរងការខូចខាត។
បើយើងក្រលេកមើលនៅតាមវាលស្រែនៃភូមិសាស្ត្រនៃបណ្តាស្រុកជាច្រើនក្នុងខេត្តកំពត ជាពិសេសស្រុកកំពង់ត្រាច គេសង្កេតឃើញដីមានសភាពប្រេះក្រហែង ស្មៅ និងរុក្ខជាតិតូចៗត្រូវរងនឹងកម្តៅថ្ងៃបណ្តាលឲ្យស្វិតក្រៀមស្រពោនគួឲ្យអាណិត ហើយប្រឡាយដែលធ្លាប់មានទឹកដក់ ក៏ប្រែជាស្ងួតដីប្រេះក្រហែងរកទឹកមួយដំណក់គ្មាន។
ចំពោះភាពកង្វះទឹកនេះ ពិតជាធ្វើឲ្យប្រជាពលរដ្ឋភាគច្រើនរស់នៅតាមមូលដ្ឋានដែលគ្មានបណ្តាញទឹកស្អាតប្រើប្រាស់ កំពុងជួបបញ្ហាលំបាក ដោយអ្នកខ្លះជិះកង់ឬម៉ូតូទៅដឹកទឹកនៅកន្លែងដែលមានប្រភពទឹកគ្រប់គ្រាន់ដែលនៅទីឆ្ងាយពីលំនៅដ្ឋានរបស់ខ្លួន ដើម្បីយកមកប្រើប្រាស់ប្រចាំថ្ងៃផងដែរ។
លោក ចាន់ រិទ្ធិ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត បានប្រាប់នៅព្រឹកថ្ងៃទី០៩ ខែមីនា ឆ្នាំ២០១៩នេះថា ក្នុងអំឡុងរដូវប្រាំងឆ្នាំនេះការខ្វះខាតទឹកសម្រាប់ប្រើប្រាស់ និងស្រោចស្រពដំណាំពិតជាមិនមានគ្រប់គ្រាន់មែន ប៉ុន្តែវាមិនស្ថិតនៅគ្រប់តំបន់នោះទេ។ហើយភូមិសាស្ត្រដែលងាយប្រឈមនឹងកង្វះខាតទឹក គឺស្ថិតតាមមូលដ្ឋានណាដែលគ្មានប្រភពទឹក ឬគ្មានបណ្តាញទឹកស្អាតប្រើប្រាស់ដូចនៅតាមទីប្រជុំជន។ ជាមួយនេះ ខាងមន្ទីរបាននិងកំពុងស្វះស្វែងរកមធ្យោបាយដើម្បីដោះស្រាយរាល់បញ្ហាខាងលើ សម្រាប់ឆ្លើយតបនឹងតម្រូវការចាំបាច់របស់ប្រជាពលរដ្ឋតាមមូលដ្ឋាននិមួយៗ៕ សេង ណារិទ្ធ
