(ខេត្តកំពត)៖ លោក ហាស់ សូបិន អភិបាលរងខេត្ត តំណាងដ៏ខ្ពង់ខ្ពស់ លោក ជាវ តាយ អភិបាល នៃគណៈអភិបាលខេត្តកំពត បានអញ្ជើញអមដំណើរ លោក ស សុខា អនុប្រធានសហភាពសហព័ន្ធយុវជនកម្ពុជា ដែលបានដឹកនាំសមាជិក សមាជិកា ស.ស.យ.ក ខេត្តព្រៃវែង ខេត្តបាត់ដំបង ខេត្តកន្ទាយមានជ័យ និងខេត្តកំពត ក្នុងសកម្មភាពរៀបចំកម្មវិធីបោះជំរុំ រួមទាំងដំណើរផ្សងព្រេងរយៈចំងាយ ២៤ គីឡូម៉ែត្រ លើឧទ្យានជាតិព្រះមុនីវង្សបូកគោ មានរយៈពេល៣ថ្ងៃ ដោយចាប់ពីថ្ងៃទី០៨ ដល់ថ្ងៃទី១០ ខែមីនា ឆ្នាំ២០១៩។
ពិធីនេះរៀបចំឡើងក្នុងគោលបំណង ដើម្បីបង្កឱកាសដល់សមាជិក សមាជិកា ស.ស.យ.ក ទាំង៤ខេត្ត បានយល់ដឹងពីបរិស្ថានធម្មជាតិនៃឧទ្យានជាតិព្រះមុនីវង្សបូកគោ និងទទួលបាននូវបរិយាកាសសប្បាយរីករាយ បង្កើននូវភាពស្និទ្ធស្នាល រឹតចំណងសាមគ្គីភាព រួមទាំងទទួលបាននូវបទពិសោធន៍ថ្មីៗពីដំណើរកំសាន្តបោះជំរុំលក្ខណៈជាក្រុម ជាពិសេសដំណើរផ្សងព្រេងរយៈចម្ងាយ ២៤គីឡូម៉ែត្រ ក្រោមប្រធានបទ រួមគ្នា”ដើម្បីកម្ពុជារុងរឿង” ដោយភ្ជាប់ទៅដោយធម្មជាតិដ៏ស្រស់ត្រកាលនៅឧទ្យានជាតិព្រះមុនីវង្សបូកគោនេះផងដែរ។
ជាទូទៅឧទ្យានជាតិព្រះមុនីវង្សបូកគោ ពិតជាសំបូរទៅដោយដងព្រៃប្រកបដោយសម្រស់ពីធម្មជាតិ មានខ្យល់អាកាសដ៏ត្រជាក់បរិសុទ្ធ គ្របដណ្តប់ដោយផ្សែងពពកហោះហើររេរា ស្ថិតតាមជ្រលងភ្នំ និងកំពូលភ្នំ។ក្រៅពីមានអាកាសធាតុយ៉ាងសែនមនោរម្យ ឧទ្យានជាតិព្រះមុនីវង្សបូកគោ ជាទីរមណីយដ្ឋានមួយមានសម្រស់ដ៏ស្រស់ត្រកាលគ្មានពីរ ថែមទាំងជាឋានមួយប្រៀបបាននឹងទីក្រុង ដែលបានអភិវឌ្ឍន៍ឡើងតាមបែបសីុវិល័យ ដែលមានសំណង់អគារស្អេកស្កះ មានសណ្ឋាគារ និងវត្តអារាមផងដែរ។
ដូច្នេះការមកជួបជុំបោះជំរំុ និងដំណើរផ្សងព្រេងរបស់សហភាពសហព័ន្ធយុវជនកម្ពុជា (ស.ស.យ.ក) ដែលដឹកនាំដោយ លោក ស សុខា នៅលើឧទ្យានជាតិព្រះមុនីវង្សបូកគោ នឹងធ្វើឲ្យក្រុមយុវជន កាន់តែមានការយល់ដឹងស្តីអំពីបរិស្ថានធម្មជាតិ និងការបម្រែបម្រួលអាកាសធាតុក្នុងតំបន់និមួយៗផងដែរ៕ សេង ណារិទ្ធ
