ប៉ៃលិន៖ក្នុងពិធីបិទសន្និបាតបូកសរុបរបស់រដ្ឋបាលខេត្តប៉ៃលិននៅថ្ងៃទី២០ ខែមករា ឆ្នាំ២០២៦ ឯកឧត្តម អ៊ី ឈាន ទេសរដ្ឋមន្ត្រី និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តប៉ៃលិនបានបំពាក់មេដាយគ្រឿងឥស្សរិយយស នឹងប័ណ្ណសរសើរជូនមន្ត្រីរាជការនៃរដ្ឋបាលខេត្តប៉ៃលិន ។ការប្រគល់ បណ្ណសរសើរនិងលិខិតថ្លែងអំណរគុណ ដល់រដ្ឋបាលឃុំ សង្កាត់ ប៉ុស្តិ៍នគរបាលឃុំ/សង្កាត់ ដែលបានទទួលជ័យលាភី ក្នុងការអនុវត្តភូមិ ឃុំមានសុវត្ថិភាព ព្រមទាំងបានប្រគល់ម៉ូតូចំនួន ៨គ្រឿង សម្រាប់សមត្ថកិច្ច កងរាជអាវុធហត្ថខេត្ត អធិការក្រុង អធិការស្រុក ក្នុងការបំពេញភារកិច្ចចុះល្បាត ដើម្បីធានាសុវត្ថិភាពជូនជាពលរដ្ឋនៅមូលដ្ឋាន។
នាឱកាសនោះឯកឧត្តមទេសរដ្ឋមន្ត្រី ក៏បានកោតសរសើដល់រដ្ឋបាលខេត្តប៉ៃលិនក្នុងការផ្ដល់សេវាសាធារណៈជូនប្រជាពលរដ្ឋប្រកបដោយភាពជឿជាក់ និងការទទួលខុសត្រូវ បង្កើនការបណ្តុះបណ្តាល អភិវឌ្ឍ ធនធានមនុស្សលើគ្រប់វិស័យ ជាពិសេសការជំរុញវិស័យ អប់រំ និងការចាប់យកបច្ចេកវិទ្យាឌីជីថល ដើម្បីឆ្លើយតប ទៅនឹងការវិវត្តនៃសេដ្ឋកិច្ចទំនើប ទប់ស្កាត់ការរីករាលដាលនៃព័ត៌មានក្លែងក្លាយ ដែលបង្កភាពវឹកវរក្នុងសង្គម បន្តពង្រឹងការគ្រប់គ្រងដីធ្លីឱ្យកាន់តែប្រសើរ ជំរុញការកសាងហេដ្ឋារចនាសម្ព័ន្ធ និងការរៀបចំសោភ័ណ្ឌភាព ដើម្បីទាក់ទាញភ្ញៀវទេសចរណ៍មកកាន់ខេត្តប៉ៃលិន។
លោកបានសម្តែងនូវសមានចិត្ត និងគោរពយ៉ាងជ្រាលជ្រៅចំពោះវិញ្ញានក្ខន្ធ វីរ:កងទ័ព វីរ:នគរបាលជាតិ ដែលបានល:បង់ជីវិតក្នុងការការពារ អធិបតេយ្យភាព និងបូរណភាពទឹកដី នៅសមរភូមិជួរមុខគ្រប់ទីតាំងបើទោះបីជា ខេត្តប៉ៃលិន ដែលមានព្រំដែនជាមួយថៃ ៥៨.៣គីឡូម៉ែត្រ ពុំមានការប្រឈមមុខដោយកម្លាំងប្រដាប់អាវុធក៏ដោយ។ ជាមួយនិងការណែនាំដល់អាជ្ញាធរកងកម្លាំងប្រដាប់អាវុធគ្រប់លំដាប់ថ្នាក់ត្រូវខិតខំថែរក្សាស្ថិរភាពនៅតាមតំបន់ ព្រំដែន ដោយត្រូវពង្រឹងពង្រីកទំនាក់ទំនងល្អ និងទំនុកចិត្តជាមួយអាជ្ញាធរ និងកងកម្លាំងប្រដាប់អាវុធ នៃប្រទេសជិតខាង រក្សាភាពអត់ធ្មត់ សំដៅបន្តប្រែក្លាយតំបន់ព្រំដែនជាព្រំដែនសន្តិភាព មិត្តភាព សហប្រតិបត្តិការ៕
