បន្ទាយមានជ័យ: អនុវត្តតាមការដឹកនាំបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅថ្ងៃទី១២ ខែមករា ឆ្នាំ២០២៦នេះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់ចេញបទបញ្ជាដល់កម្លាំងអធិការដ្ឋាននគរបាលក្រុង-ស្រុក កម្លាំងនគរបាលប៉ុស្តិ៍រដ្ឋបាលគ្រប់ឃុំ-សង្កាត់ ពង្រឹងការចុះផ្សព្វផ្សាយវេទិកាសាធារណៈ ស្ដីពីគោលនយោបាយភូមិ ឃុំ-សង្កាត់ មានសុវត្ថិភាពដល់ប្រជាពលរដ្ឋតាមមូលដ្ឋាន និងសិស្សតាមសាលារៀន ពិសេសពលរដ្ឋដែលរស់នៅតាមបណ្តោយព្រំដែនកម្ពុជា-ថៃ។
បន្ថែមពីលើនេះនគរបាលយើងបាន ផ្សព្វផ្សាយអំពីផលប៉ះពាល់នៃគ្រាប់យុទ្ធភ័ណ្ឌមិនទាន់ផ្ទុះ និងវិធានការការពារ, ច្បាប់ចរាចរណ៍ផ្លូវគោក, និងផលប៉ះពាល់នៃគ្រឿងញៀន ក្នុងគោលបំណងដើម្បីពង្រឹងទំនាក់ទំនងល្អជាមួយប្រជាពលរដ្ឋនិងនគរបាលឲ្យកាន់តែជិតស្និត ងាយក្នុងការសហការ រាយការណ៍ អំពីបទល្មើសផ្សេងៗ ដើម្បីឈានដល់ការបង្ការ បង្ក្រាបឲ្យកាន់តែមានប្រសិទ្ធភាព។
លោកឧត្តមសេនីយ៍ទោ សិទ្ធិ ឡោះ ក៏បានដាក់ចេញផែនការដល់កងកម្លាំងនគរបាលទូទាំងខេត្ត ត្រូវពង្រឹងការយាមល្បាត ការប្រចាំការ២៤ម៉ោង ពង្រឹងគ្រប់គ្រងសន្តិសុខសណ្តាប់ធ្នាប់សង្គម និងសន្តិសុខតាមព្រំដែន, បន្តស្រាវជ្រាវបង្ការ បង្ក្រាប បទល្មើសគ្រប់ប្រភេទ និងក្មេងទំនើង, ទប់ស្កាត់រាល់ព័ត៌មានក្លែងក្លាយទាំងឡាយ ដែលនាំឲ្យមានចលាចលសង្គម, កម្លាំងនគរបាលទាំងអស់ត្រូវធ្វើយ៉ាងណា ធ្វើឲ្យខេត្តបន្ទាយមានជ័យទាំងមូល មានសន្តិសុខ សណ្តាប់ធ្នាប់ និងសុវត្ថិភាពល្អ៕
