ក្រសួងមហាផ្ទៃ នៃរាជរដ្ឋាភិបាលកម្ពុជា នៅថ្ងៃនេះ បានចេញសេចក្តីជូនដំណឹងជាសាធារណៈ អំពីលទ្ធផលនៃប្រតិបត្តិការបង្ក្រាបឧក្រិដ្ឋកម្មឆ្លងដែនដ៏សំខាន់មួយ ដែលឈានដល់ការចាប់ខ្លួន និងបញ្ជូនខ្លួនអតីតមហាសេដ្ឋីម្នាក់ទៅកាន់ប្រទេសចិន។
យោងតាមក្រសួងមហាផ្ទៃ ក្នុងក្របខ័ណ្ឌនៃកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន និងផ្អែកតាមសំណើផ្លូវការរបស់អាជ្ញាធរមានសមត្ថកិច្ចនៃសាធារណរដ្ឋប្រជាមានិតចិន កម្លាំងសមត្ថកិច្ចនៃព្រះរាជាណាចក្រកម្ពុជាបានសម្រេចឃាត់ខ្លួនពលរដ្ឋចិនចំនួន ៣ នាក់ រួមមាន៖
១. ឈ្មោះ Chen Zhi (ចេន ហ្ស៊ី)
២. ឈ្មោះ Xu Ji Liang (ស៊ូ ជីលៀង)
៣. ឈ្មោះ Shao Ji Hui (សៅ ជីហ៊ួយ)
ប្រតិបត្តិការចាប់ខ្លួន និងបញ្ជូនខ្លួននេះ បានធ្វើឡើងកាលពីថ្ងៃទី៦ ខែមករា ឆ្នាំ២០២៦ បន្ទាប់ពីសមត្ថកិច្ចកម្ពុជា និងចិន បានធ្វើការស៊ើបអង្កេតរួមគ្នាយ៉ាងយកចិត្តទុកដាក់អស់រយៈពេលជាច្រើនខែកន្លងមក។
អ្វីដែលគួរឱ្យកត់សម្គាល់ ក្រសួងមហាផ្ទៃក៏បានបញ្ជាក់ច្បាស់នូវស្ថានភាពសញ្ជាតិរបស់បុគ្គល Chen Zhi ផងដែរថា រូបលោកត្រូវបានព្រះមហាក្សត្រ ចេញព្រះរាជក្រឹត្យដកសញ្ជាតិខ្មែររួចរាល់ហើយ កាលពីខែធ្នូ ឆ្នាំ២០២៥ កន្លងទៅ ដោយផ្អែកទៅតាមច្បាប់សញ្ជាតិនៃព្រះរាជាណាចក្រកម្ពុជា។
ការចាត់វិធានការនេះ បង្ហាញពីការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការសហការជាមួយអន្តរជាតិ ដើម្បីប្រយុទ្ធប្រឆាំងនឹងរាល់សកម្មភាពខុសច្បាប់ និងដើម្បីរក្សានូវសន្តិសុខ សណ្តាប់ធ្នាប់ ក្នុងតំបន់៕
