ឯកឧត្តម នេត ភក្ត្រា បានលើកឡើងថា ក្រុមយោធាថៃ មិនត្រឹមតែវាយប្រហារលើកងទ័ពកម្ពុជាប៉ុណ្ណោះទេ ប៉ុន្តែថែមទាំងបង្កើនការវាយប្រហារមកលើគោលដៅជនស៊ីវិលថែមទៀតផង ។
យោងតាមបណ្តាញទំនាក់ទំនងសង្គមហ្វេសប៊ុករបស់ឯកឧត្តម នេត ភក្ត្រា រដ្ឋមន្រ្តីក្រសួងព័ត៌មាន នៅថ្ងៃទី១៩ ខែធ្នូ ឆ្នាំ២០២៥នេះបានឱ្យដឹងថា ក្រុមយោធាថៃបន្តសកម្មភាពឈ្លានពានប្រដាប់អាវុធមកលើទឹកដីកម្ពុជាដោយបង្កើតលេសផ្សេងៗ ។ ឯកឧត្តមបន្តថា ការឈ្លានពានរបស់ថៃមិនត្រឹមតែវាយប្រហារមកលើកងទ័ពកម្ពុជាប៉ុណ្ណោះទែ ប៉ុន្តែថែមទាំងបានយកជនស៊ីវិលជាទិសដៅវាយប្រហារបន្ថែមទៀត ។
បើតាមការបញ្ជាក់ពីលោកជំទាវម៉ាលី សុជាតា អ្នកនាំពាក្យក្រសួងការពារជាតិ ការវាយការពារខ្លួនរបស់កម្ពុជាគឺផ្តោតតែលើ “គោលដៅ យោធាថៃតែប៉ុណ្ណោះ មិនសំដៅលើគោលដៅជនស៊ីវិល ឬទីកន្លែងស៊ីវិលណាមួយឡើយ” ប៉ុន្តែមានតែភាគីថៃទេ ដែលបានធ្វើការវាយប្រហារមកលើទីតាំង ប្រជាជនស៊ីវិលរបស់កម្ពុជា ។
លោកជំទាវអ្នកនាំពាក្យ ក៏បានអំពាវនាវដល់ប្រជាពលរដ្ឋទាំងអស់បន្តជឿជាក់ និងលើកទឹកចិត្តដល់វីរកងទ័ពដ៏អង់អាចក្លាហានកំពុងប្រយុទ្ធតស៊ូយ៉ាងខ្លាំងក្លានៅគ្រប់សមរភូមិទាំងអស់។ រាជរដ្ឋាភិបាល កងទ័ព និងប្រជាជនកម្ពុជារួបរួមគ្នាជាធ្លុងមួយក្នុងការការពារទឹកដី សេចក្តីថ្លៃថ្នូរ និងអធិបតេយ្យភាពដោយអង់អាចក្លាហាន និងដោយមិនងាករេជាដាច់ខាតទោះក្នុងតម្លៃណាក៏ដោយ។
សូមបញ្ជាក់ថា គិតមកដល់ថ្ងៃទី១៨ ខែធ្នូ ដែលភាគីថៃបានទន្ទ្រានឈ្លានពានកម្ពុជាដោយប្រើប្រាស់អាវុធធុនធ្ងន់គ្រប់ប្រភេទវាយប្រហារមិនរើសគោលដៅ បានធ្វើឱ្យប្រជាជនស៊ីវិលស្លូតត្រង់កម្ពុជាបាត់បង់ជីវិតចំនួន ១៨នាក់ (ទារក ១នាក់) និងរងរបួសចំនួន ៧៩នាក់៕
