ខេត្តបន្ទាយមានជ័យ,ស្រុកម៉ាឡៃ
អ្នកសារព័ត៌មានចំនួន ៤ អង្គភាព បានសម្រេចចុះទៅដល់ទីតាំង ភ្នំរូង ដែលស្ថិតនៅក្នុងភូមិភ្នំរូង ឃុំបឹងបេង ស្រុកម៉ាឡៃ ខេត្តបន្ទាយមានជ័យ កាលពីថ្ងៃទី៥,ខែធ្នូឆ្នាំ២០២៥ ដើម្បីផ្តិតយករូបភាព និងសកម្មភាពពាក់ព័ន្ធនឹងការជីកយករ៉ែថ្ម។
នៅពេលចុះទៅដល់ ក្រុមអ្នកសារព័ត៌មានបានប្រទះឃើញ គ្រឿងចក្រម៉ៃខូ ចំនួន ២ គ្រឿង កំពុងធ្វើសកម្មភាពយ៉ាងសកម្ម ក្នុងការ កាយថ្មលើភ្នំរូង។ ភ្លាមៗនោះ មេការ ម្នាក់ប្រចាំការនៅទីតាំង បានចេញមកក្នុងបំណង រារាំង សកម្មភាពថតរូបរបស់ក្រុមអ្នកសារព័ត៌មាន ដោយស្រែក សំណួរថា៖ “បងថតអី?”
ចម្លើយ👉គឺថតសកម្មភាពម៉ៃខូដែលកំពុងកាយថ្មភ្នំ។
មេការ៖ “តើការកាយថ្មភ្នំខុសអីមែន? ព្រោះក្រុមហ៊ុនមានអាជ្ញាប័ណ្ណ”។
ខ្ញុំសូមបញ្ជាក់ប្រាប់លោក”ភ្នំជាសម្បត្តិធម្មជាតិ (របស់រដ្ឋ) តើក្រុមហ៊ុនលោកមានអាជ្ញាប័ណ្ណរំលាយភ្នំរឺ? ហើយជាក្រុមហ៊ុនខាងណាវិញ?”
មេការបានបញ្ជាក់ថា ក្រុមហ៊ុនដែលកំពុងប្រតិបត្តិការគឺ ក្រុមហ៊ុន បងវ៉ាន់ និង លោកភ្លន់ តារា។
ក្រៅពីសកម្មភាពកាយថ្មភ្នំ មានព័ត៌មានមួយបានលេចឮថា ក្រុមហ៊ុនខាងលើក៏មានផែនការ ដឹកជញ្ជូនរំសេវផ្ទុះ ចំនួន ជាង ១០ តោន ផងដែរ ដោយមានបំណងយកមក បំផ្ទុះថ្មភ្នំ នេះ។
យ៉ាងណាមិញ យោងតាមប្រភពព័ត៌មានដដែល ការដឹកជញ្ជូននេះត្រូវបាន ផ្អាកសិន ដោយសារតែស្ថានភាពនៅតំបន់ ព្រំដែន មានសភាព តានតឹង ហើយទំនងជារង់ចាំរហូតដល់សភាពការណ៍ ស្ងប់ស្ងាត់ ទើបបន្តដំណើរការវិញ។ការព្រួយបារម្ភ និងការអំពាវនាវរបស់ប្រជាពលរដ្ឋ ដែលរស់នៅជុំវិញតំបន់ភ្នំរូង បានសម្តែងនូវការ ព្រួយបារម្ភយ៉ាងខ្លាំង ចំពោះសកម្មភាពជីកកកាយថ្មនេះ។ ពួកគេភ័យខ្លាចថា ប្រសិនបើគ្មានការត្រួតពិនិត្យ និងចាត់វិធានការទាន់ពេលទេ ភ្នំរូងមួយនេះនឹងរលាយផុតពីផែនទី។
ដូច្នេះ ប្រជាពលរដ្ឋបាន ស្នើសុំយ៉ាងទទូច ដល់អាជ្ញាធរពាក់ព័ន្ធ និងមន្ត្រីជំនាញឱ្យចុះមកធ្វើការត្រួតពិនិត្យទីតាំងភ្នំខាងលើជាបន្ទាន់៖ ជាពិសេសស្នើសុំ ឯកឧត្តម អៀង សុផល្លែត រដ្ឋមន្ត្រីក្រសួងបរិស្ថាន និង ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល មេត្តាដាក់កម្លាំងជំនាញចុះមក ស៊ើបអង្កេត លើអាជ្ញាប័ណ្ណពាក់ព័ន្ធនឹងការកាយថ្ម និងការអនុញ្ញាតច្បាប់សម្រាប់ការប្រើប្រាស់ រំសេវផ្ទុះ ក្នុងបរិមាណដ៏ច្រើនបែបនេះ ដើម្បីការពារ សម្បត្តិធម្មជាតិរដ្ឋ និង សុវត្ថិភាព របស់ប្រជាពលរដ្ឋក្នុងតំបន់។
