ប៉ៃលិន៖ នាព្រឹកថ្ងៃទី៣០ ខែវិច្ឆិកា ឆ្នាំ២០២៥ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញចុះជួបសំណេះសំណាលសួរសុខទុក្ខ និងផ្តល់ជាអាវរងា ព្រមទាំងថវិកា ជូនប្រជាពលរដ្ឋ នៅឃុំសាលាក្រៅ និងឃុំស្ទឹងត្រង់ ស្រុកសាលាក្រៅ ខេត្តប៉ៃលិន ស្របពេលអាកាសធាតុកំពុងចុះត្រជាក់ ដែលទាំងនេះបានឆ្លុះបញ្ចាំងយ៉ាងច្បាស់ពីការយកចិត្តទុកដាក់ខ្ពស់របស់ថ្នាក់ដឹកនាំខេត្ត និងរាជរដ្ឋាភិបាល ចំពោះសុខទុក្ខរបស់ប្រជាពលរដ្ឋគ្រប់រូបក្នុងមូលដ្ឋាន។
លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានមានប្រសាសន៍នាំមកនូវការផ្ដាំផ្ញើសួរសុខទុក្ខ និងក្ដីនឹករលឹក ពីសំណាក់សម្តេចតេជោ ហ៊ុន សែន, សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលសម្ដេចទាំងបី តែងតែគិតគូពីសុខទុក្ខរបស់ប្រជាពលរដ្ឋ នៅទូទាំងប្រទេសគ្រប់ពេលវេលា ដោយមិនមានការរើសអើង វណ្ណៈ ជាតិសាសន៍ ពណ៌សម្បុរ ឬនិន្នាការ នយោបាយអ្វីឡើយ ជាពិសេសមិនបណ្តោយឱ្យពលរដ្ឋណាម្នាក់ស្លាប់ដោយអត់បាយ មិនបានដឹង និងមិនបានជួយដោះស្រាយនោះឡើយ។
លោកជំទាវបណ្ឌិតអភិបាលខេត្ត បាននប្រសាសន៍លើកឡើងថា៖ ខែរងារធ្លាក់ខ្យល់បានមកដល់ ហើយខេត្តប៉ៃលិន គឺជាខេត្តមានព្រៃភ្នំច្រើន ដែលអាកាសធាតុចុះត្រជាក់ខ្លាំង បើធៀបនឹងបណ្តាខេត្តផ្សេងៗ ងាយឱ្យកើតមានជម្ងឺដម្កាត់ផ្សេងៗ ដូច្នេះបងប្អូនប្រជាពលរដ្ឋ ត្រូវប្រុងប្រយ័ត្នខ្ពស់ ចំពោះការថែទាំសុខភាព និងរស់នៅប្រកបដោយអនាម័យ តែបើមានករណីកើតជម្ងឺ សូមប្រញាប់ប្រញាល់ ទៅកាន់មណ្ឌលសុខភាព ឬមន្ទីរពេទ្យបង្អែក ដែលនៅជិតជាបន្ទាន់ ដើម្បីឱ្យគ្រូពេទ្យជំនាញពិនិត្យ និងព្យាបាលបានទាន់ពេលវេលា។
នៅក្នុងឱកាសនោះផងដែរ លោកជំទាវបណ្ឌិត បាន ស្រីមុំ ក៍បានមានប្រសាសន៍ផ្តាំផ្ញើ ដល់បងប្អូនប្រជាពលរដ្ឋ ឱ្យបង្កើនការចិញ្ចឹមសត្វ និងការដាំដុះបន្លែផ្លែឈើធម្មជាតិ ទាំងបរិមាណ និងគុណភាព ដើម្បីធ្វើការផ្គត់ផ្គង់ទៅតាមតម្រូវការទីផ្សារ និងតម្លៃមួយសមរម្យ ហើយជំរុញដល់ មន្ទីរ/អង្គភាពជំនាញពាក់ព័ន្ធជុំវិញខេត្ត ជួយបណ្តុះបណ្តាលបច្ចេកទេសកសិកម្ម និងត្រូវរួមសហការគ្នាជួយរកទីផ្សារជូនប្រជាកសិករ ដើម្បីលើកកម្ពស់សេដ្ឋកិច្ចជីវភាពរបស់ប្រជាពលរដ្ឋ ឆ្លើយតបទៅនឹងគោលនយោបាយកាត់បន្ថយភាពក្រីក្ររបស់រាជរដ្ឋាភិបាលកម្ពុជា៕
