(ភ្នំពេញ)៖ លោក រឿន រិទ្ធីពង្ស ត្រូវបានប្រកាសឱ្យចូលកាន់មុខតំណែងជាប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ជំនួសលោកស្រី មុំ ចាន់ដានី ដែលបានទទួលភារកិច្ចថ្មី។ នៅក្នុងឱកាសនោះ ក៏មានការប្រកាសតែងតាំងលោក រ័ត្ន សុវិបូរ ជាប្រធានសាលាមូលនិធិជាតិជំនួយសង្គមរាជធានីភ្នំពេញផងដែរ។
ពិធីប្រកាសនេះ បានធ្វើឡើងនាព្រឹកថ្ងៃទី១៣ ខែវិច្ឆិកា ឆ្នាំ២០២៥ ក្រោមអធីបតីភាពលោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា, លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ឃួង ស្រេង អភិបាលរាជធានីភ្នំពេញ នៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ។
លោក ឃួង ស្រេង ថ្លែងក្នុងឱកាសនោះ បានវាយតម្លៃខ្ពស់ ចំពោះការខិតខំប្រឹងប្រែងបំពេញការងារយ៉ាងល្អប្រសើររបស់មន្ទីរសង្គមកិច្ចអតីតយុទ្ធជន និងយុវនីតិសម្បទារាជធានីភ្នំពេញកន្លងមក ពិសេសបានជួយដល់ប្រជាពលរដ្ឋ ក្រីក្រ និងងាយរងគ្រោះនៅក្នុងរាជធានីភ្នំពេញ។
ជាមួយគ្នានេះ លោក ឃួង ស្រេង បានលើកឡើងទៀតថា រដ្ឋបាលរាជធានីបានរក្សាសន្តិសុខសណ្ដាប់ធ្នាប់សាធារណៈបានយ៉ាងល្អប្រសើរជូនប្រជាពលរដ្ឋនៅក្នុងរាជធានីភ្នំពេញ តាមរយៈការបង្ក្រាបទល្មើសគ្រប់ប្រភេទ ដូចជាក្មេងទំនើង លួចឆក់ ប្លន់ និងបង្ក្រាបបទល្មើស (ONLINE SCAM)តាមប្រព័ន្ធអនឡាញជាដើម។
លោក ឃួង ស្រេង បានបន្តថា ក្នុងនោះមន្ទីរសង្គមកិច្ចបានដើរតួយ៉ាងសំខាន់ក្នុងកិច្ចការងារជួយសង្គម ទៅតាមការចង្អុលណែនាំរបស់រាជរដ្ឋាភិបាល ដោយមិនបោះបង់ចោលប្រជាពលរដ្ឋណាម្នាក់ឡើយ។ រដ្ឋបាលរាជធានីភ្នំពេញ បាននិងកំពុងយកចិត្តទុកដាក់គាំទ្រកម្មវិធីចំនួន៤ក្នុងនោះរួមមាន៖
*ទី១៖ កម្មវិធីផ្ដល់សាច់ប្រាក់ជូនជនក្រីក្រ
*ទី២៖ កម្មវិធីផ្ដល់អាហាររូបត្ថម្ភដល់ជនក្រីក្រ
*ទី៣៖ កម្មវិធីឧបត្ថម្ភសាច់ប្រាក់ដល់ជនពិការភាព
*ទី៤៖ កម្មវិធីឧបត្ថម្ភដល់ចាស់ជរា ដោយចាប់ខែមេសាឆ្នាំ២០២៤ ដល់ឆ្នាំ២០២៥នេះ គ្រួសារដែលទទួលបានកម្មវិធីទាំង៤ខាងលើនេះ មានចំនួនជាង ២ម៉ឺនគ្រួសារស្មើនឹងទឹកប្រាក់ប្រមាណ១១២៧០លានរៀល។
លោក ជា សុមេធី បានថ្លែងថា ការប្រកាសចូលកាន់តំណែងជាប្រធានមន្ទីរសង្គមកិច្ចខាងលើនេះ គឺដើម្បីបានរួមចំណែកជួយដល់ ការងារសង្គមពិសេសគឺជួយដល់ប្រជាពលរដ្ឋក្រីក្រ ប្រជាពលរដ្ឋរងគ្រោះ និងងាយរងគ្រោះនៅក្នុងរាជធានីភ្នំពេញ។
លោករដ្ឋមន្ត្រី សូមថ្លែងអំណរគុណ និងកោតសរសើរចំពោះរដ្ឋបាលរាជធានីភ្នំពេញ ដែលកន្លងមកតែងបានគាំទ្រ សហការ និងជួយអន្តរាគមន៍ កិច្ចការងារនានាដល់ក្រសួង។ លោករដ្ឋមន្ត្រីក៏បានណែនាំទៅដល់ ប្រធានមន្ទីរសង្គមកិច្ចដែលត្រូវបានតែងតាំងថ្មីនេះ សូមរក្សាសាមគ្គីភាពផ្ទៃក្នុងឳ្យបានល្អ ដោយសហការជាមួយអាជ្ញាធរនិងស្ថាប័នពាក់ព័ន្ធផ្សេងទៀត ដើម្បីឲ្យកិច្ចការងាររបស់មន្ទីរកាន់តែល្អប្រសើរថែមទៀត។
ជាមួយគ្នានេះ ក្នុងនាមជាប្រធានមន្ទីរត្រូវលើកទឹកចិត្តដល់កូនចៅក្រោមឱវាទ ដើម្បីឲ្យពួកគាត់ចូលរួមបំពេញការងារជូនមន្ទីរឱ្យកាន់តែល្អប្រសើរថែមទៀត។
ក្នុងឱកាសនោះលោក រឿន រិទ្ធីពង្ស ដែលត្រូវបានប្រកាសឱ្យចូលកាន់មុខតំណែងជាប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ បានប្តេជ្ញាចិត្តថា៖ ដើម្បីឆ្លើយតបទៅនឹងទំនុកចិត្តរបស់រាជរដ្ឋាភិបាល ក៏ដូចជា ថ្នាក់ដឹកនាំគ្រប់លំដាប់ថ្នាក់ លោកនឹងខិតខំបំពេញការងារ ជូនមន្ទីរឱ្យបានម៉ឹងម៉ាត់បំផុត ដោយសហការល្អជាមួយអាជ្ញាធរ មានសាមគ្គីភាពផ្ទៃ ដើម្បីរួមគ្នាបំរើឧត្តមប្រយោជន៍ប្រជាពលរដ្ឋនៅរាជធានីភ្នំពេញ ឱ្យកាន់តែល្អប្រសើរថែមទៀត៕
