ប៉ៃលិន៖ ថ្ងៃទី១០ ខែតុលា ឆ្នាំ២០២៥ ជនជាតិថៃ៥នាក់ (ប្រុស២ ស្ត្រី៣នាក់) ដែលលួចឆ្លងដែនបម្រុងមកស្នាក់នៅ និងធ្វើការនៅកម្ពុជាខុសច្បាប់ ត្រូវបានអាជ្ញាធរខេត្តប៉ៃលិន ចាប់បញ្ជូនទៅថៃវិញ តាមច្រកទ្វារព្រំដែនអន្តរជាតិព្រំ ខេត្តប៉ៃលិន ស្ថិតក្នុងភូមិផ្សារព្រំ ឃុំស្ទឹងកាច់ស្រុកសាលាក្រៅ ខេត្តប៉ៃលិន។
បើតាមការបញ្ជាក់របស់សមត្ថកិច្ច ជនជាតិថៃទាំង៥នាក់ បានលួចឆ្លងដែនចូលមកកម្ពុជា តាមច្រកធម្មជាតិ (ច្រករបៀង) ដើម្បីមកធ្វើការនៅកម្ពុជា តែត្រូវកងកម្លាំងការពារព្រំដែន ឃាត់ខ្លួនបាន ពេលពួកគេកំពុងធ្វើដំណើរ ដោយ ថ្មើរជើង ឆ្លងព្រំដែនក្នុងភូមិសាស្ត្រខេត្តប៉ៃលិន កាលពីយប់ថ្ងៃទី៩ ខែតុលា ឆ្នាំ២០២៥ ហើយដោយមានការចង្អុល បង្ហាញពីសំណាក់លោកស្រីបណ្ឌិត បាន ស្រីមុំ អភិបាលខេត្ត ក្រុមការងារបានរៀបចំអាហារ និងការ ស្នាក់នៅ ជូនជនជាតិថៃទាំងនោះ ព្រមទាំងធ្វើការទំនាក់ទំនងទៅភាគីថៃ ដើម្បីបញ្ជូនពួកគេត្រឡប់ទៅប្រទេសថៃវិញ។
សូមបញ្ជាក់ថា ទោះបីជាមានការបិទច្រកព្រំដែនកម្ពុជា-ថៃ និងស្ថានភាពនៅតាមបន្ទាត់ព្រំដែនមានភាពតានតឹងយ៉ាងណាក៏ដោយ និងទោះបីជាមានការបង្រ្កាបជាញឹកញប់ពីសំណាក់សមត្ថកិច្ចទាំងពីរប្រទេស ក៏បទល្មើសលួចឆ្លង ដែនខុសច្បាប់នៅតែកើតមានឡើង៕សេន ត
