ខេត្តបាត់ដំបង៖ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកឯកភ្នំ ខេត្តបាត់ដំបង នាព្រឹកថ្ងៃទី១៩ ខែកញ្ញា ឆ្នាំ២០២៥ បានអញ្ជើញចូលរួមកាន់បិណ្ឌវេនទី១៣ នៅវត្តឯកបព្វតារាម ( ហៅវត្តឯកភ្នំ) ស្ថិតនៅភូមិតាគោម ឃុំពាមឯក ស្រុកឯកភ្នំ ខេត្តបាត់ដំបង ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងធម្មការនិងសាសនា លោកតាជី លោកយាយជី និងប្រជាពុទ្ធបរិស័ទចំណុះជើងវត្តយ៉ាងច្រើនកុះករផងដែរ ។អញ្ជើញដល់សាលាធម្មសភា វត្តឯកបព្វតារាម ( ហៅវត្តឯកភ្នំ ) ឯកឧត្តមនាយឧត្តមសេនីយ៍ សេង យូអ៊ាន់ បានអញ្ជើញថ្វាយគ្រឿងសក្ការៈបូជា និងនាំយកទេយ្យវត្ថុ គ្រឿងអត្ថបរិក្ខារនិងបរវណាបច្ច័យមួយចំនួនប្រគេនចំពោះព្រះសង្ឃ ប្រារព្ធបទនមស្សកាព្រះរតនត្រ័យសមាទានសីល ថ្វាយបង្គំពុទ្ធបដិមារម្លឹកដល់គុណបុណ្យព្រះរតនៈត្រៃយ៍តាមគន្លងប្រពៃណីព្រះពុទ្ធសាសនាពិសេសរម្លឹកដល់ព្រះសម្មាសម្ពុទ្ធព្រះបរមគ្រូនៃយើង ។
មានប្រសាសន៍សំណេះសំណាលជាមួយព្រះសង្ឃ លោកយាជី លោកយាយជី ឯកឧត្តម នាយឧត្តមសេនីយ៍ សេង យូអ៊ាន់ បានមានប្រសាសន៍លើកឡើងថា ជាមោទនភាពថ្មីមួយទៀតរបស់កម្ពុជា នៃការលេចចេញជារូបរាងរបស់អាកាសយានដ្ឋានអន្តរជាតិតេជោដែលជាច្រកទ្វាអាកាសថ្មីមួយចាំទទួលភ្ញៀវទេសចរណ៍ជាតិ–អន្តរជាតិមកកាន់កម្ពុជា ហើយកាន់តែទាក់ទាញនោះគឺព្រះពុទ្ធបដិមាដ៏ធំស្កឹមស្កៃ គង់លើសុវណ្ណអសនៈផ្កាឈូកតម្កល់នៅទីតាំងកណ្ដាលស្ថានីយ៍អ្នកដំណើរ (Terminal) ដែលចង់បង្ហាញដល់ភ្ញៀវទេសចរជាតិនិង អន្តរជាតិ ស្គាល់កាន់តែច្បាស់ពីប្រទេសកម្ពុជា លើវប្បធម៌ ប្រពៃណី សាសនានិងគុណតម្លៃព្រះពុទ្ធសាសនា ដែលជាសាសនារបស់រដ្ឋហើយបន្តជួយផ្សព្វផ្សាយទៅពិភពលោកកាន់តែទូលំទូលាយ។
នាពិធីកាន់បិណ្ឌវេនទី១៣នេះឯកឧត្តម នាយឧត្តមសេនីយ៍ សេង យូអ៊ាន់ បានអញ្ជើញប្រគេន ទេយ្យទាន បវរណាចតុបច្ច័យ ប្រគេនដល់ព្រះសង្ឃ និងអញ្ជើញ រាប់បាត្រនិមន្តព្រះសង្ឃ បង្សុកូលឧទ្ទិសមហាកុសលផលបុណ្យ អតីតព្រះចៅអធិការវត្តឯកបព្វតារាម ( ហៅវត្តឯកភ្នំ) ព្រមទាំងដួងវិញ្ញាណក្ខន្ធបុព្វការី ញាតិកាទាំង៧សន្តាននិងម្យ៉ាងទៀតសូមឧទ្ទិសកុសលផលបុណ្យដល់ដួងវិញ្ញាណក្ខន្ធវីរកងទ័ពដ៏អង់អាចក្លាហានរបស់យើងដែលពលីជីវិតនៅក្នុងបុព្វហេតុការពារអធិបតេយ្យភាព បូរណភាពទឹកដីសូមបានទៅកាន់ទីឋានដ៏ខ្ពង់ខ្ពស់ ប្រកបដោយបរមសុខ កុំបីឃ្លៀងឃ្លាតឡើយ។ក្នុងឱកាសនេះ ឯកឧត្តម នាយឧត្តមសេនីយ៍ សេង យូអ៊ាន់ ប្រជាពុទ្ធបរិស័ទសូមបួងសួងដល់គុណបុណ្យព្រះរតនត្រ័យនិងវត្ថុសក្តិសិទ្ធិសូមអភិបាលរក្សាប្រមុខរាជរដ្ឋាភិបាលកម្ពុជា ព្រមទាំងឃុំគ្រងវីរៈកងទ័ពកម្ពុជាយើងដែលកំពុងសម្រាកព្យាបាលឱ្យឆាប់បានធូរស្បើយ និងសូមបួងសួងដល់វត្ថុសក្តិសិទ្ធិដូនតាខ្មែរជួយពាំងរាំងមុខកងទ័ពយើងឱ្យមានជោគជ័យនិងសុខសុវត្ថិភាពគ្រប់ពេលវេលា ។ទេយ្យទាន គ្រឿងអត្ថបរិក្ខារ និងបច្ចយដែលកើតចេញពីសទ្ធាជ្រះថ្លារបស់ឯកឧត្តម នាយឧត្តមសេនីយ៍ សេង យូអ៊ាន់ ព្រមទាំងសហការីយកមកប្រគេនព្រះសង្ឃនាឱកាសនេះរួមមាន ៖ អង្ករ សាដក ទឹកបរិសុទ្ធ គ្រឿងអត្ថបរិក្ខារនិងបច្ច័យមួយចំនួនសម្រាប់កសាងវត្ត ។សូមជម្រាបជូនថា សម្រាប់ពិធីបុណ្យកាន់បិណ្ឌ ភ្ជុំបិណ្ឌ ឆ្នាំ២០២៥នេះបានប្រព្រឹត្តទៅចាប់ពីថ្ងៃ១២រោច ខែភទ្របទ ដល់ថ្ងៃ១៣រោច ខែភទ្របទ ដែលត្រូវនឹងថ្ងៃទី១៩ដល់ថ្ងៃទី២០ ខែកញ្ញា ឆ្នាំ២០២៥ ៕ ដោយ ៖ លោក ម៉ុត ណារ៉ុង
