បន្ទាយមានជ័យ៖អនុវត្តតាមការដឹកនាំបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅថ្ងៃទី០៩ ខែកញ្ញា ឆ្នាំ២០២៥នេះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់ចេញនូវបទបញ្ជាដល់កងកម្លាំងនគរបាលគ្រប់អង្គភាពចំណុះទូទាំងខេត្ត ត្រូវពង្រឹងការងារសន្តិសុខសុវត្ថិភាព សណ្តាប់ធ្នាប់សង្គម និងសន្តិសុខតាមព្រំដែន, បន្តស្រាវជ្រាវបង្ក្រាបបទល្មើសគ្រប់ប្រភេទ ពិសេសបទល្មើសជួញដូរគ្រឿងញៀន និង បទល្មើសឆ្លងដែនខុសច្បាប់។
លោកឧត្តមសេនីទោ សិទ្ធិ ឡោះ បានជម្រុញដល់កម្លាំងនគរបាលទាំងអស់ ត្រូវពង្រឹងការផ្តល់សេវាសាធារណះ សេវាធ្វើអត្តសញ្ញាណប័ណ្ណជូនប្រជាពលរដ្ឋទាំងនៅកន្លែង និងចុះតាមសាលាឃុំ-សង្កាត់។ រីឯកម្លាំងនគរបាលប៉ុស្តិ៍រដ្ឋបាលគ្រប់ឃុំ-សង្កាត់ ត្រូវបន្តបេសកកម្មរបស់ខ្លួន ចុះផ្សព្វផ្សាយតាមវេទិការសាធារណៈ ស្តីពីគោលនយោបាយភូមិ ឃុំ-សង្កាត់ មានសុវត្ថិភាព ផលប៉ះពាល់នៃគ្រឿងញៀន និងវិធានការបង្ការ, ច្បាប់ចរាចរណ៍ផ្លូវគោក ដល់ប្រជាពលរដ្ឋតាមមូលដ្ឋានឲ្យបានទូលំទូលាយ សំដៅធ្វើយ៉ាង ណាឲ្យបទល្មើស មានការថយចុះជាលំដាប់តាមដែលអាចធ្វើបាន។
លោកឧត្តមសេនីយ៍ទោស្នងការ បានដាក់ចេញបទបញ្ជាយ៉ាងម៉ឺងម៉ាត់ ដល់កម្លាំងនគរបាលគ្រប់ផែនជំនាញ អធិការដ្ឋាននគរបាលក្រុង-ស្រុក បញ្ជាការវរៈនគរបាលការពារព្រំដែនគោកទាំងអស់ ត្រូវបន្តស្រាវជ្រាវបង្ក្រាបបទល្មើសគ្រប់ប្រភេទ បទល្មើសព្រហ្មទណ្ឌ ក្មេងទំនើង បទល្មើសជួញដូរគ្រឿងញៀន ពិសេសបទល្មើសឆ្លងដែនខុសច្បាប់ ត្រូវយកចិត្តទុកដាក់ស្រាវជ្រាវរកមេខ្យល់យកមកផ្ដន្ទាទោសតាមច្បាប់ ឲ្យមានប្រសិទ្ធភាពខ្ពស់៕
