(ខេត្តកែប)៖ ឆ្នាំនេះដោយសារហាងឆេងដំឡូងជ្វាមានតម្លៃខ្ពស់ គេបានកត់សម្គាល់ឃើញកសិករស្ថិតក្នុងភូមិសាស្ត្រខេត្តកែប បាននិងកំពុងបន្តការដាំដុះនូវប្រភេទដំឡូងជ្វា(ពូជកសិកម្ម)នេះយ៉ាងផុលផុស។
បើតាមការលើកឡើងពីសំណាក់កសិករស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប បានឲ្យដឹងថា បច្ចុប្បន្នដោយសារតែហាងឆេងដំឡូងជ្វាមានតម្លៃខ្ពស់គួរសមបែបនេះ ពួកគាត់បានបន្តដាំដុះដោយមិនទុកដីឲ្យនៅទំនេរឡើយ។ម្យ៉ាងវិញទៀត ព្រោះតែភូមិសាស្ត្រខាងលើមានប្រភពទឹកគ្រប់គ្រាន់ដែលអាចឲ្យពួកគាត់ដាំដំណាំរួមផ្សំផ្សេងៗសម្រាប់លក់ដោះដូរផ្គត់ផ្គង់ជីវភាពបានកាន់តែធូរធាជាលំដាប់។
កសិករបានបញ្ជាក់ទៀតថា កាលពីឆ្នាំមុនដំឡូងជ្វាប្រភេទកសិកម្មនេះ លក់បានក្នុងមួយគីឡូក្រាមត្រឹម៨០០ទៅ១.០០០រៀលប៉ុណ្ណោះ ហើយពុំសូវមានក្រុមឈ្មួញមកទិញច្រើនឡើយ ផ្ទុុយមកវិញក្នុងឆ្នាំ២០១៩នេះផលដំឡូងដែលពួកគាត់ប្រមូលបានត្រូវក្រុមឈ្មួញសម្រុកមកទិញដល់ទីកន្លែង ដោយឲ្យតម្លៃចាប់ពី១.៥០០ទៅ២.០០០រៀលក្នុង១គីឡូក្រាមឯណោះ។
ដូច្នេះបើហាងឆេងដំឡូងជ្វាកាន់តែមានសន្ទុះបែបនេះ ពួកគាត់នឹងបន្តការដាំដុះបន្ថែមទៀតដោយមិនទុកដីចោលឥតប្រយោជន៍នោះឡើយ។
សូមជម្រាបថា បច្ចុប្បន្នគេបានសង្កេតឃើញប្រជាពលរដ្ឋស្ថិតតាមភូមិសាស្ត្រនានាទូទាំងប្រទេស ពិសេសតាមតំបន់នានានៃខេត្តកែប ពួកគាត់ពិតជារស់នៅប្រកបដោយក្តីរីករាយ ក្នុងជីវភាពធូរធានិងការរីកចម្រើន ក្រោមដំបូលសន្តិភាព។ជាមួយនេះក្រៅពីការងារកសិកម្ម ពួកគាត់ក៏បានប្រការងារបន្ទាប់បន្សំជាច្រើនទៀត ដូចជាការចិញ្ចឹមសត្វគ្រប់ប្រភេទ ការលក់ដូរតាមលក្ខណៈគ្រួសារស្ថិតតាមខ្នងផ្ទះ ដែលធ្វើឲ្យជីវភាពគ្រួសាររបស់គាត់កាន់តែមានកម្រិតធូរធាពីមួយថ្ងៃទៅមួយថ្ងៃផងដែរ៕
សេង ណារិទ្ធ
