(ខេត្តកំពត)៖ កាលពីរសៀលថ្ងៃទី១២ ខែកុម្ភៈ ឆ្នាំ២០១៩ លោក អូន ខន អភិបាល នៃគណៈអភិបាលស្រុកកំពង់ត្រាច បានអញ្ជើញអម ដំណើរ លោក ជឹង ផល្លា អភិបាលរងខេត្តកំពត ដើម្បីចុះពិនិត្យការ ស្ថាបនាផ្លូវតាមខ្សែបន្ទាត់ព្រំដែនរបស់កងវិស្វកម្មក្រសួងការពារជាតិ។ ជាមួយនឹងការចុះពិនិត្យ ថ្នាក់ដឹកនាំនិងក្រុមការងារ ក៏បានសម្របសម្រួលជាមួយបងប្អូនប្រជា ពលរដ្ឋចំនួន៦៨នាក់ ស្រី៣៥នាក់ ដែលកំពុងរងផលប៉ះពាល់ដោយសារការស្ថាបនាផ្លូវនៅឃុំព្រែកក្រឹស ស្រុកកំពង់ត្រាចនេះផងដែរ។
ចំពោះការស្ថាបនាផ្លូវតាមខ្សែបន្ទាត់ព្រំដែនខាងលើនេះ បងប្អូនប្រជាពលរដ្ឋមួយចំនួន បានស្នើសុំដល់អាជ្ញាធរជួយដោះស្រាយសំណងពីផលប៉ះពាល់លើដីដែលមានប័ណ្ណកម្មសិទ្ធរបស់ពួកគាត់ផងដែរ។
នាឱកាសនេះដែរ លោកជឹង ផល្លា អភិបាលរងខេត្តកំពត ក៏បានស្នើឲ្យបងប្អូនរក្សាភាពស្ងៀមស្ងាត់ រាល់សំណើរបស់បងប្អូន លោកនឹងស្នើទៅថ្នាក់លើ ដើម្បីសុំគោលការណ៍បានជាលទ្ធផលយ៉ាងណាលោកនឹងជម្រាបជូនបងប្អូនពេលក្រោយវិញ។
ជាមួយគ្នានេះដែរ លោក អភិបាលរងខេត្តបានស្នើឲ្យបងប្អូនចូលរួមសហការជាមួយអាជ្ញាធរ ដោយបង្កលក្ខណៈងាយស្រួលដល់អង្គភាពកងវិស្វកម្មឲ្យដំណើរការស្ថាបនាផ្លូវតាមខ្សែបន្ទាត់ព្រំដែននេះឲ្យបានសម្រេចតាមផែនការកំណត់៕
សេង ណារិទ្ធ
