បន្ទាយមានជ័យ: អនុវត្តតាមការណែនាំ និងបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋានហូបាលខេត្តបន្ទាយមានជ័យ នៅថ្ងៃទី០៩ ខែមិថុនា ឆ្នាំ២០២៥នេះ កម្លាំងការិយាល័យជំនាញ និងកម្លាំងតាមបណ្តាអធិការនគរបាលក្រុង-ស្រុក កម្លាំងនគរបាលប៉ុស្តិ៍រដ្ឋបាលតាមឃុំសង្កាត់ បានសហការជាមួយអាជ្ញាធរមូលដ្ឋាន ចុះផ្សព្វផ្សាយវេទិការសាធារណៈស្តីពីគោលនយោបាយភូមិ ឃុំ-សង្កាត់មានសុវត្ថិភាព ទាំង៧ចំនុចជូនប្រជាពលរដ្ឋ ដើម្បីបញ្ចៀបការយល់ដឹងដល់ពលរដ្ឋតាមខ្នងផ្ទះ និងសិស្សតាមសាលារៀន។
ក្រៅពីនេះកម្លាំងនគរបាលយើង ក៏បានផ្សព្វផ្សាយអំពីច្បាប់ចរាចរណ៍ផ្លូវគោក, ផល់ប៉ះពាល់នៃគ្រាប់សល់ពីសម័យសង្គ្រាម, ផល់ប៉ះពាល់អំពីគ្រឿងញៀន និងវិធានការបង្ការ។ ក្នុងនោះក៏បានជម្រុញដល់ពលរដ្ឋដែលទើបគ្រប់អាយុ និងអ្នកហួសសុពលភាពប្រើប្រាស់ ត្រូវទៅធ្វើអត្តសញ្ញាណប័ណ្ណសញ្ជាតិខ្មែរឲ្យបានគ្រប់គ្នា ដើម្បីយកមកប្រើប្រាស់ ក្នុងជីវភាពប្រចាំថ្ងៃ បំពេញបែបបទផ្សេងៗ និងសម្រាប់ចុះឈ្មោះបោះឆ្នោត។
ឈរលើស្មារតីទទួលខុសត្រូវ លោកឧត្តមសេនីយ៍ទោ សិទ្ធិ ឡោះ តែងតែដាក់បទបញ្ជាដល់កម្លាំងនគរបាលគ្រប់អង្គភាពចំណុះ ត្រូវពង្រឹងការផ្តល់សេវាសាធារណៈជូនប្រជាពលរដ្ឋឲ្យបានល្អ, ពង្រឹងការយាមល្បាតនិងប្រចាំ២៤ម៉ោង, ពង្រឹងការបង្ក្រាបបទល្មើគ្រប់ប្រភេទទាំងថ្ងៃ-យប់ និងក្មេងទំនើង, ក្នុងនោះក៏បានត្រៀមកម្លាំងសម្រាប់បង្ការ បង្ក្រាប និងសង្គ្រោះប្រជាពលរដ្ឋក្នុងករណីមានគ្រោះធម្មជាតិ ឬករណីអគ្គីភ័យដែលអាចកើតមានឡើងជាយថាហេតុផងដែរ សំដៅធ្វើយ៉ាងណាឲ្យប្រជាពលរដ្ឋទូទាំងខេត្តរស់នៅប្រកបដោយសុខសុវត្ថិភាពល្អ៕
