ខេត្តកំពត ៖ នៅព្រឹកថ្ងៃសុក្រ ១២រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០១ ខែកុម្ភៈ ឆ្នាំ២០១៩នេះ លោក ជាវ តាយ អភិបាល នៃគណៈអភិបាលខេត្តកំពត បានដឹកនាំកិច្ចប្រជុំគណៈអភិបាលខេត្តប្រចាំខែមករា ឆ្នាំ២០១៩។កិច្ចប្រជុំនេះក៏មានការចូលរួមយ៉ាងច្រើនកុះករពីសំណាក់អស់លោកជាប្រធាន អនុប្រធានមន្ទីរអង្គភាពជុំវិញខេត្ត អភិបាលរងខេត្ត អភិបាលក្រុង ស្រុក នាយក នាយករងរដ្ឋបាលសាលាខេត្ត នាយកទីចាត់ការ ប្រធានអង្គភាពចំណុះសាលាខេត្ត ប្រធាននគរបាលច្រកទ្វារព្រំដែន ប្រធានស្នាក់ការកំពង់ផែ សរុបប្រមាណ៦៨នាក់។
កិច្ចប្រជុំនេះមានរបៀបវារះសំខាន់ៗដូចខាងក្រោម ៖
១/-ពិនិត្យពិភាក្សាលើសេចក្តីព្រាងរបាយការណ៍ប្រចាំខែមករា ឆ្នាំ ២០១៩ ស្តីពីការអនុវត្តការងាររបស់រដ្ឋបាលខេត្ត
២/-ពិនិត្យ និងពិភាក្សាសេចក្តីព្រាងសៀវភៅកម្មវិធីវិនិយោគ៣ឆ្នាំរំកិល ២០១៩-២០២១ របស់រដ្ឋបាលខេត្ត
៣/-បញ្ហផ្សេងៗ៖ ផ្សព្វផ្សាយផែនការណែនាំរបស់គណៈកម្មាធិការជាតិរៀបចំបុណ្យជាតិ អន្តរជាតិ ស្តីំពីការរៀបចំបុណ្យមាឃបូជានៅពេលខាងមុខ។
លោក ជាវ តាយ អភិបាលខេត្តកំពត បានគូសបញ្ជាក់ថា អំឡុងពេលដ៏ខាងមុខនេះ ខេត្តយើងនឹងត្រូវរៀបចំពិធីមាឃបូជាដែលជាប្រពៃណីរបស់យើងតាំងពីយូរលង់។ដូច្នេះក្នុងនាមជាប្រមុខដឹកនាំនៃរដ្ឋបាលខេត្តកំពត លោកនឹងជំរុញឱ្យគ្រប់មន្ទីរអង្គភាពរបស់រដ្ឋ ក៏ដូចជាវិស័យឯកជនត្រូវគិតគូរប្រារព្ធពិធីបុណ្យនេះឡើងប្រកបដោយភាពអធិកអធមទៅតាមទំនៀមទម្លាប់របស់ដូនតាយើង៕
សេង ណារិទ្ធ
