ខេត្តកំពត ៖ នៅសាលាខេត្តកំពត នាព្រឹកថ្ងៃទី៣១ ខែមករា ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត រួមនឹងមន្ដ្រីថ្នាក់ដឹកនាំនៃមន្ទីរជំនាញពាក់ព័ន្ធក្នុងខេត្ត បានទទួលជួបជាមួយប្រតិភូគណៈកម្មការទី៩នៃរដ្ឋសភាដឹកនាំដោយលោកស្រី និន សាផុន ប្រធានគណៈកម្មការ។
គោលបំណងនេះ ដើម្បីជួបសំណេះសំណាលពិភាក្សានិងស្វែងយល់ពីសមិទ្ធផលការងារសំខាន់ៗពាក់ព័ន្ធលើវិស័យមួយចំនួនរួមមានវិស័យការងារសាធារណការនិងដឹកជញ្ជូន រ៉ែ និងថាមពល ប្រៃសណីយ៍ និងទូរគមនាគមន៍ ឧស្សាហកម្ម និងសិប្បកម្ម និងការងាររៀបចំដែនដីនគរូបនីយកម្មសំណង់និងសុរិយោដី ក្នុងអាណត្តិទី៥កន្លងមកនិងទិសដៅអនុវត្តបន្តព្រមទាំងបញ្ហាប្រឈមនានាដែលរដ្ឋបាលខេត្តកំពតសម្រេចបានរួមនិងសំណូមពរផ្សេងៗកំពុងជួបប្រទះនិងដោះស្រាយ។
ក្នុងកិច្ចជំនួបនេះ លោក ជាវ តាយ អភិបាលខេត្តកំពត ក៏បានលើកឡើងអំពីការកែប្រែតំបន់និមួយៗក្នុងខេត្តកំពតឱ្យកាន់តែមានសភាពស្រស់បំព្រង ពិសេសការស្ថាបនាដងផ្លូវសំខាន់ៗជាច្រើនកន្លែង ដែលខេត្តរបស់យើងត្រូវការចាំបាច់បំផុតនោះ។ទន្ទឹមនេះ ខេត្តកំពតដែលជាខេត្តមានសក្តានុពលផ្នែកសេដ្ឋកិច្ចនិងវិស័យទេសចរណ៍ផងនោះ ក៏បាននិងកំពុងដើរតួយ៉ាងសំខាន់ និងបង្កើនល្បឿនទៅមុខឥតរុញរា ដែលធ្វើឱ្យខឿនសេដ្ឋកិច្ចរបស់ខេត្តកំពតកាន់តែមានភាពលូតលាស់ជាលំដាប់៕ សេង ណារិទ្ធ
