ខេត្តកំពត ៖ ក្តីអស់សង្ឃឹម និងភាពបាត់ជំនឿទុកចិត្តរបស់ពលរដ្ឋសង្កាត់ក្រាំងអំពិល ក្រុងកំពត ខេត្តកំពត ដោយអូសបន្លាយ៤ទសវត្សមកនោះត្រូវបានលុបបំបាត់ត្រឹមដើមឆ្នាំ២០១៩តាមរយៈផ្លូវបេតុងល្អស្អាតមួយខ្សែលើគន្លងផ្លូវចាស់តភ្ជាប់រវាងស្ថានីយរថភ្លើងនិងផ្លូវជាតិលេខ៣ដែលរងការខូចខាតតាំងពីសម័យកម្ពុជាប្រជាធិបតេយ្យមកនោះ។
ស្ត្រីឈ្មោះវ៉ាន់នី ពលរដ្ឋរស់នៅភូមិស្វាយធំសង្កាត់ក្រាំងអំពិលក្រុងកំពតខេត្តកំពតបានរៀបរាប់ថាផ្លូវកៅស៊ូតភ្ជាប់រវាងផ្លូវជាតិលេខ៣ឆ្ពោះទៅកាន់ស្ថានីយរថភ្លើងខេត្តកំពតបានស្ថាបនាឡើងតាំងពីសម័យសង្គម រាស្ត្រនិយម។ ក្នុងរបបប៉ុល ពត ផ្លូវនេះបានខូចខាតដោយពុំមានការជួសជុលឡើយ។
ប្រភពដដែលបានបន្តថាក្រោយថ្ងៃរំដោះ៧មករាឆ្នាំ១៩៧៩ក៏មិនមានការជួសជុលជាដុំកំភួនដែរគឺយូរៗម្តងគេមកជីកកាយគាស់ដាក់លូចំហចោលដោយប្រាប់ថានឹងធ្វើថ្មីឡើងវិញនៅពេលខាងមុខ។
ការពន្យាពេលពីមួយឆ្នាំទៅមួយឆ្នាំបានបង្កក្តីលំបាកដល់អ្នកដំណើរពិសេសនៅរដូវវស្សាពោរពេញដោយជង្ហុកក្លិនស្អុយមិនសមជាភូមិសាស្ត្រមួយស្ថិតក្នុងក្រុងនឹងគេទេ។ស្ត្រីវ៉ាន់នីបានបញ្ជាក់ពីទឹកចិត្តផ្ទាល់ថាថ្ងៃនេះសុបិនក្លាយជាការពិតនិងសូមថ្លែងអំណរគុណចំពោះលោកជាវ តាយ ដែលមកធ្វើជាអភិបាលខេត្តកំពត មិនទាន់បានប៉ុន្មានឆ្នាំផងធ្វើឱ្យអ្នកភូមិស្វាយធំមានផ្លូវល្អប្រើប្រាស់ដូចគេ។ជាមួយនោះក្នុងនាមពលរដ្ឋភូមិស្វាយធំ សូមសំណូមពរលោកអភិបាលខេត្តជួយដាក់ភ្លើងបំភ្លឺតាមបណ្តោយផ្លូវថ្មីនេះផង។
ពាក់ព័ន្ធនឹងករណីខាងលើ លោកចែម ផា អភិបាលរងក្រុងកំពតបានបញ្ចាក់ថាមកដល់ពេលនេះរដ្ឋបាល ខេត្តបានបំពាក់ភ្លើងបំភ្លឺផ្លូវក្នុងក្រុងរួចរាល់ចំនួន២៩ខ្សែ។ចំពោះផ្លូវឆ្ពោះទៅស្ថានីយរថភ្លើងលោកមិនទាន់ដឹងច្បាស់ថារដ្ឋបាលខេត្តនឹងដាក់ជូនបន្ថែមនៅពេលណាទេ។សម្រាប់ផ្លូវបេតុងវិញក្នុងក្រុងកំពតបាននិងកំពុងស្ថាបនាចំនួនប្រាំពីរខ្សែដោយផ្លូវទាំងនោះមួយចំនួនមិនទាន់រួចរាល់មួយរយភាគរយនៅឡើយទេ៕
សេង ណារិទ្ធ
