(ខេត្តកំពត)៖ កម្លាំងនគរបាលខេត្តកំពតសហការជាមួយកម្លាំងនគរបាលស្រុកទឹកឈូបានឃាត់ខ្លួនជនសង្ស័យចំនួន៥នាក់ ក្នុងយុទ្ធនាការបង្ក្រាបល្បែងស៊ីសងខុសច្បាប់ប្រភេទជល់មាន់មួយកន្លែង។ ការឃាត់ខ្លួននេះបានធ្វើឡើងស្ថិតក្នុងភូមិទឹកក្រហម ឃុំកណ្តោល ស្រុកទឹកឈូ ខេត្តកំពត កាលពីព្រឹកថ្ងៃទី២៧ ខែមករា ឆ្នាំ២០១៩។
ទាក់ទិននឹងការបង្ក្រាបបទល្មើសខាងលើ លោកលក ញ៉ាវ នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពត បានប្រាប់ឱ្យដឹងថាជនសង្ស័យទាំងប្រាំនាក់រួមមាន ១.ឈ្មោះយ៉ុង សារ៉េត ភេទប្រុស អាយុ៥២ឆ្នាំ,២. ឈ្មោះនូវ រតនូ ភេទប្រុស អាយុ២៤ឆ្នាំ,៣. ឈ្មោះនឿត សាទ ភេទប្រុស អាយុ២៨ឆ្នាំ, ៤. ឈ្មោះចាង ស៊ង ភេទប្រុស អាយុ៣០ឆ្នាំ, ៥. ឈ្មោះមាស ធី ភេទប្រុស អាយុ៣០ឆ្នាំ។ ទាំង៥នាក់រស់នៅភូមិទឹកក្រហម ឃុំកណ្ដោល ស្រុកទឹកឈូ ខេត្តកំពត។
លោកនាយការិយាល័យបានរៀបរាប់ថា ដោយទទួលព័ត៌មានច្បាស់ការណ៍ស្តីអំពីសកម្មភាពល្បែងស៊ីសងខុសច្បាប់កាលពីព្រឹកថ្ងៃទី២៧ខែមករាឆ្នាំ២០១៩ក្រោយមានបទបញ្ជារបស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត និងការណែនាំពីលោកព្រះរាជអាជ្ញាអមសាលាដំបូងខេត្តកំពតផងនោះសមត្ថកិច្ចនៃស្នងការដ្ឋានសហការជាមួយកម្លាំងអធិការដ្ឋានស្រុកទឹកឈូ ក៏បានចុះដល់ទីតាំងភ្លាមៗ ប៉ុន្តែមេខ្លោងដែលជាម្ចាស់សង្វៀងហាក់ដឹងខ្លួនមុនបានរត់គេចបាត់ ទើបកម្លាំងសមត្ថកិច្ចឃាត់បានតែអ្នកលេងទាំង៥នាក់ខាងលើរួមទាំងវត្ថុតាងមួយចំនួននាំមកកាន់ស្នងការដ្ឋានដើម្បីចាត់ការបន្តតាមនីតិវិធីតែម្តង៕
សេង ណារិទ្ធ
