(ខេត្តកំពត)៖ នៅព្រឹកថ្ងៃទី ១៥ ខែមករាឆ្នាំ២០១៩ សមាគមក្រុមប្រឹក្សាក្រុង ស្រុក ឃុំ សង្កាត់នៃខេត្តកំពត បានបើកកិច្ចប្រជុំ លើកទី១៣ ដើម្បីបូកសរុបវាយតម្លៃរបាយការណ៍រីកចម្រើនរបស់ខ្លួនប្រចាំ ឆ្នាំ២០១៨កន្លងទៅនិងលើកទិសដៅអនុវត្តបន្ត។
កិច្ចប្រជុំនេះមានរយៈពេលមួយព្រឹកមានសមាជិកសមាគមពេញអង្គមកពីក្រុមប្រឹក្សាក្រុង ស្រុក និងក្រុមប្រឹក្សាឃុំ សង្កាត់ទាំង៩៣ និងតំណាងរដ្ឋបាលក្រុង ស្រុក ទាំង៨ក្នុងខេត្ត សរុប១៩២រូប។ កិច្ចប្រជុំបានផ្ដោតលើការពិនិត្យលើលទ្ធផលខ្លឹមសារសំខាន់ៗ រួមមាន ការបង្ហាញពិភាក្សាលើរបាយការណ៍ វឌ្ឍនភាពនិងរបាយការណ៍ ហិរញ្ញវត្ថុ ឆ្នាំ២០១៨ បង្ហាញពីប្រាក់សមាជិកភាព ប្រាក់បរីវិសទាននិងគោលនយោបាយហិរញ្ញវត្ថុនិង ពិភាក្សាលើផែនការសកម្មភាពនិងថវិកាឆ្នាំ២០១៩រួមនិងបញ្ហាផ្សេងៗមួយចំនួនទៀតផងដែរ។
លោក ឈឹម សុភាគ អគ្គលេខាធិការរងសមាគមក្រុមប្រឹក្សារដ្ឋបាលមូលដ្ឋានថ្នាក់ក្រោមជាតិ តំណាង លោក សយ កុសល ប្រធានសម្ព័ន្ធភាពជាតិក្រុមប្រឹក្សាថ្នាក់មូលដ្ឋាននិងលោក ទន់ ចន្ថាសមាជិកក្រុមប្រឹក្សាខេត្តតំណាង លោក អ៊ឹង ម៉េងហួរ ប្រធានក្រុមប្រឹក្សាខេត្ត បានលើកបញ្ជាក់ថា៖ ក្រុមប្រឹក្សា ឃុំសង្កាត់ គឺជាតំណាងរបស់ប្រជាពលរដ្ឋ ជាអង្គមួយដែលមានការទុកចិត្ត ជឿជាក់ពីប្រជាពលរដ្ឋជ្រើសតាំងឲ្យធ្វើការងារដើម្បីការពារផលប្រយោជន៍រួមរបស់ប្រជាពលរដ្ឋនៅក្នុង ឃុំសង្កាត់របស់ខ្លួន។
ទន្ទឹមនោះក្រុមប្រឹក្សាក៏បានដើរតួយ៉ាងសំខាន់ ក្នុងការជំរុញលើការផ្ដល់សេវារដ្ឋបាល ក៏ដូចជាសេវាសាធារណៈជូនប្រជាពលរដ្ឋឲ្យកាន់តែមានភាពជឿទុកចិត្តទាន់ពេលវេលានិងមានប្រសិទ្ធភាព។ ពិសេសការជំរុញនៅក្នុងដំណើរការអនុវត្តគោលនយោបាយវិមជ្ឈការ និងវិសហមជ្ឈការ របស់ក្រុមប្រឹក្សាឃុំសង្កាត់ នៅរដ្ឋបាលថ្នាក់ក្រោមជាតិដែលកាន់តែមានសិទ្ធិអំណាច ការទទួលខុសត្រូវកាន់ច្រើនឡើងៗ និងមានស្វ័យភាពក្នុងការចាត់ចែងប្រើប្រាស់ធនធានរបស់ខ្លួន ឲ្យស្របទៅតាម តម្រូវការដែលប្រជាពលរដ្ឋចង់បាន។
ដូចនេះកិច្ចប្រជុំរបស់សមាគមក្រុមប្រឹក្សា ក្រុង ស្រុក ឃុំសង្កាត់នាពេលនេះគឺពិតជាមានសារៈសំខាន់ក្នុងការពិនិត្យមើលពីវឌ្ឍនភាពការងារនិងបញ្ហាប្រឈមនានាដែលសមាគមបានអនុវត្តកន្លងមក។ ពិសេសការលើកកម្ពស់ និងពង្រឹងសមត្ថភាពរបស់ក្រុមប្រឹក្សាក្រុង ស្រុក ឃុំសង្កាត់ឲ្យកាន់តែមានភាពជឿជាក់ក្នុងការអនុវត្តតួនាទី ភារកិច្ចរបស់ខ្លួន ស្របតាមច្បាប់ ស្ដីពីការគ្រប់គ្រងរដ្ឋបាល រាជធានីខេត្ត ក្រុង ស្រុក ខ័ណ្ឌ និងច្បាប់ស្ដីពីការគ្រប់គ្រងរដ្ឋបាល ឃុំ សង្កាត់ ព្រមទាំងលិខិតគតិយុត្តិនានាឲ្យបានកាន់តែប្រសើរឡើង។
មានមតិបិទកិច្ចប្រជុំនេះដែរលោកស្រី យូ សុគន្ធ អភិបាលរងខេត្តតំណាង លោក ជាវ តាយ អភិបាលខេត្ត បានវាយតម្លៃខ្ពស់ចំពោះលទ្ធផលការងារនិងកោតសរសើរដល់សមាគម ក្រុមប្រឹក្សាក្រុង ស្រុក ឃុំសង្កាត់ខេត្តកំពតដែលបានខិតខំ យកចិត្តទុកដាក់ក្នុងការអនុវត្តបំពេញតួនាទីរបស់ខ្លួនបានល្អប្រសើរ ព្រមទាំងបានថ្លែងអំណរគុណដល់ក្រុមគាំទ្របច្ចេកទេសនៃសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន មន្ទីរ អង្គភាពជុំវិញខេត្ត អង្គការដៃគូអភិវឌ្ឍន៍ អង្គការសង្គមស៊ីវិល ដែលបានឧបត្ថម្ភគាំទ្រទាំងហិរញ្ញវត្ថុនិងបច្ចេកទេសដល់សមាគមក្រុមប្រឹក្សាក្រុង ស្រុក ឃុំសង្កាត់ ខេត្តកំពតនាពេលកន្លងមកនិងបានស្នើឲ្យមានការបន្តការគាំទ្រឡើងបន្ថែមទៀតដើម្បីធ្វើឲ្យការអនុវត្តសកម្មភាពកាន់តែមានគុណភាពនិងប្រសិទ្ធភាពខ្ពស់៕
សេង ណារិទ្ធ
