(ខេត្តកំពត)៖ កាលពីរសៀលថ្ងៃព្រហស្បតិ៍ ១២រោច ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៣ ខែមករា ឆ្នាំ២០១៩ លោកស៊ឹម វុទ្ធា សមាជិកអចិន្ត្រៃយ៍គណៈកម្មាធិការគណបក្សខេត្ត និងជាប្រធានគណៈឃោសនា អប់រំ នៃគណៈកម្មាធិការគណបក្សប្រជាជនកម្ពុជាខេត្តកំពត ដោយមានការចូលរួម ពីលោក ដួង សាវណ្ណ ប្រធានមន្ទីរគណបក្សខេត្តផងដែរ បានដឹកនាំលោក លោកស្រី ជាប្រធានគណបក្សមូលដ្ឋានមន្ទីរ អង្គភាព គណបក្សក្រុង ស្រុក ក្រុមការងារយុវជនទាំងពេញសិទ្ធិ និងបម្រុង ក្នុងក្រុមព្យុហយាត្រាខេត្តកំពត ជាង១០០នាក់ ដេីម្បីបន្ត ធ្វើការហាត់សមដើរក្បួនដង្ហែរក្បួនព្យុហយាត្រា នៅពហុកីឡដ្ឋានខេត្តកំពត និងចែកឯកសណ្ឋានជូនដល់សមាជិកទាំងអស់ ដើម្បីត្រៀមចូលរួមអបអរសាទរពិធីបុណ្យខួបលើកទី៤០ ទិវាជ័យជម្នះ ៧មករា(៧មករា ១៩៧៩-៧មករា ២០១៩) ដែលធ្វេីនៅថ្ងៃទី៧ ខែមករា ឆ្នាំ២០១៩ នៅពហុកីឡដ្ឋានជាតិ រាជធានីភ្នំពេញខាងមុខនេះ។
ជាទូទៅការដង្ហែរក្បួនព្យូហយាត្រាដើម្បីអបអរសាទរទិវាជ័យជម្នះ ៧មករា លើកទី៤០ ត្រូវបានធ្វើឡើងព្រមគ្នានៅទូទាំងប្រទេស។
ដោយឡែកខេត្តកំពត ការដង្ហែរក្បួននេះ នឹងត្រូវប្រព្រឹត្តទៅដោយមានការចូលរួមយ៉ាងសកម្មពីសំណាក់អស់លោក លោកស្រីជាថ្នាក់ដឹកនាំតាមបណ្តាមន្ទីរអង្គភាព លោក លោកស្រី ជាសមាជិក សមាជិកាបក្ស ព្រមទាំងស្រទាប់យុវជនដែលជាកម្លាំងស្នូល៕
សេង ណារិទ្ធ
