(ខេត្តកំពត)៖ កសិករស្ថិតក្នុងឃុំកូនសត្វ ស្រុកទឹកឈូ ខេត្តកំពត ដែលកន្លងមកពួកគាត់ធ្លាប់តែធ្វើស្រែវស្សាគ្រប់រដូវមិនដែលខកខាននោះ តែពេលនេះពួកគាត់បែរជានាំគ្នាងាកមកដាំដំណាំអំពៅជំនួសវិញ ព្រោះតែបច្ចុប្បន្នហាងឆេងអំពៅមានតម្លៃខ្ពស់ជាងតម្លៃស្រូវ។
បើតាមការរៀបរាប់ពីសំណាក់ប្រជាពលរដ្ឋក្នុងភូមិកូនសត្វ ឃុំកូនសត្វ ស្រុកទឹកឈូ ខេត្តកំពត បានឲ្យដឹងថា ការងាកមកដាំអំពៅស្ទើគ្រប់គ្នានៅតំបន់នេះ ដោយសារតែដីស្រែនៅចំណុចខាងលើមានសំណើមជាប់ជាប្រចាំ មិនថាតែនៅរដូវប្រាំងរាំងស្ងួតនោះទេ។ ម្យ៉ាងទៀតតំបន់នេះជាទីតាំងផ្តល់នូវប្រភពទឹកបានទាំងរដូវប្រាំង រដូវវស្សា ហើយដីមានជីជាតិល្អ ថែមទាំងមានអំណោយផលពីធម្មជាតិ។ពួកគាត់បានលើកឡើងទៀតថា ការដាំអំពៅពិតជាមានភាពងាយស្រួលជាដំណាំស្រូវ អំពៅពិតជាលក់បានកម្រៃច្រើនជាងស្រូវ ដោយការប្រមូលផលម្តងៗបានរាប់លានរៀល បើប្រៀបធៀបនឹងការប្រមូលផលស្រូវ គឺខុសគ្នាដូចមេឃនិងដី។
ប្រជាពលរដ្ឋបានប្រាប់ទៀតថា ការដាំអំពៅក្នុងមួយស្រែអាចរកចំណូលបានចាប់ពី២លានរៀលឡើងទៅ ចំណែកការដាំស្រូវក្នុងមួយស្រែ(មួយរដូវដូចគ្នា) បានកម្រៃត្រឹមតែ៤០ទៅ៥០ម៉ឺនរៀលប៉ុណ្ណោះ ។ ដូច្នេះការដាំអំពៅវាពិតជាចំណេញទាំងពេលវេលា ចំណេញទាំងថវិកា ហើយក៏អាចរកកម្រៃបានច្រើនសម្រាប់ផ្គត់ផ្គង់ជីវភាពប្រចាំថ្ងៃបានយ៉ាងធូរធាផងដែរ។
កសិករខាងលើបានឲ្យដឹងទៀតថា ធម្មតាអំពៅ ពេលដល់រដូវប្រមូលផល ត្រូវក្រុមឈ្មួញនាំគ្នាសម្រុកមកទិញដល់ផ្ទះ ដោយមិនចាំបាច់ដឹកជញ្ជូនទៅលក់នៅឯទីផ្សារឡើយ។លើសពីនេះការដាំអំពៅក៏ចំណាយនូវធនធានមិនសូវច្រើនដូចការចំណាយលើដំណាំស្រូវនោះឡើយ។
ប្រជាពលរដ្ឋក្នុងឃុំខាងលើ បានប្រាប់ទៀតថា ក្រៅពីការងារដាំអំពៅ ពួកគាត់ក៏បាននាំគ្នាដាំដំណាំរួមផ្សំជាច្រើនមុខទៀត ពិសេសបន្លែ ដូចជា ត្រសក់ ត្រឡាច ល្ពៅ ស្ពៃ និងម្ទេសជាដើម៕
សេង ណារិទ្ធ
