ខេត្តព្រះវិហារ ៖ ក្រុមហ៊ុនប្ល៊ូហ៊ីវិនដែលមានទីតាំងស្ថិតនៅភូមិព្យូជ្រូកឃុំគូលែនជើងស្រុក គូលែនខេត្តព្រះវិហារដោយក្រុមហ៊ុនខាងលើនេះបានទទួលសិទ្ធបំពេញបន្ថែមចុះថ្ងៃទី២៦ខែកញ្ញាឆ្នាំ២០១៨ លិខិតលេខ៦២២ក.ស.កចុះថ្ងៃទី១៨ខែមករាឆ្នាំ២០១៨របស់ក្រសួងកសិកម្មរុក្ខាប្រមាញ់និងនេសាទស្តីពីកាទទួលស្គាល់អោយកែឆ្នៃផលអនុផលព្រៃឈើដែលបានបង់ពន្ធជូនរដ្ឋរួចក្នុងដីសម្បទានសេដ្ឋកិច្ចនោះ។
ប៉ុន្តែអ្វីដែលនឹងធ្វើអោយប្រជាសហគមន៍ដែលរស់នៅជិតតំបន់ក្រុមហ៊ុនខាងលើនេះដោយពួកគាត់់បានលើកឡើងថាក្រោយការទទួលបានសិទ្ធិពីក្រសួងកសិកម្មរុក្ខាប្រមាញ់និងនេសាទរួចហើយនោះ។
ក្រុមហ៊ុនខាងលើនេះកំពុងតែជិះសេះលែងដៃនិងបានបង្កផលលំបាកដល់ក្រុមប្រជាពលរដ្ឋដែលរស់នៅជុំវិញតំបន់នោះក៍ដូចជាប្រជាសហគមន៍ពោធិ៏រៀងទាំងមូល មានការខឹងសម្បារយ៉ាងខ្លាំងជាមួយនឹងក្រុមហ៊ុនមួយនេះ ហើយក្រុមប្រជាសហគមន៍ទាំងនោះពួកគាត់បានលើកឡើងថាតាំងពីក្រុមហ៊ុនខាងលើនេះចូលមកបោះទីតាំងធ្វើអោយពួកគាត់មានការពិបាករស់នៅក្នុងការរកស៊ីចិញ្ចឹមជីវិតប្រចាំថ្ងៃ។បើតាមប្រភពពីប្រជាពលរដ្ឋក្នុងស្រុកគូលែន ខេត្តព្រះវិហារ បានឲ្យដឹងថា មួយរយៈកន្លងទៅនេះក្រុមហ៊ុនប្ល៊ូហ៊ីវិន ដែលមានឈ្មោះ សេន ឡាំ ជាមេការកំពុងបំផ្លាញព្រៃឈើនៅក្នុងតំបន់ជម្រកសត្វព្រៃបឹងពេរ និងតំបន់អភិរក្សគូលែនព្រហ្មទេព យ៉ាងរាលដាល។
ការដែលក្រុមហ៊ុនប្ល៊ូហ៊ីវិន អាចធ្វើអ្វីៗតាមអំពើចិត្តគឺដោយសារមានការឃុបឃិតបើកដៃពីសំណាក់មន្ត្រីបរិស្ថាន និងមន្ត្រីរដ្ឋបាលព្រៃឈើក្នុងខេត្តព្រះវិហារ ផងដែរទើបអ្វីៗអាចប្រព្រឹត្តទៅដោយរលូន។ ក្នុងនោះលោក ពឹង ទ្រីដា ប្រធានមន្ទីរកសិកម្មខេត្តព្រះវិហារ ក៏ដូចជាមេរដ្ឋបាលព្រៃឈើក្នុងខេត្តព្រះវិហារ ត្រូវគេដឹងថាគឺជាអ្នកឃុបឃិតឲ្យឈ្មោះ សេន ឡាំ មេការក្រុមហ៊ុនប្ល៊ូហ៊ីវិន ធ្វើអ្វីៗស្រេចតែអំពើចិត្តដើម្បីជាថ្នូរនឹងផលប្រយោជន៍ផ្ទាល់ខ្លួន។
ប្រភពពីសមត្ថកិច្ចពាក់ព័ន្ធបានឲ្យដឹងថា កាលពីថ្ងៃទី១១ ខែធ្នូ កន្លងទៅថ្មីៗនេះប្រជាសហគមន៍ការពារព្រៃឈើបាននាំគ្នាព័ទ្ធចាប់រថយន្តរ៉េវដឹកឈើហុបមូលចំនួន៩ដើម របស់លោក សេន ឡាំ ដែលជាឈ្មួញឈើល្បីល្បាញរស់នៅភូមិព្យួរជ្រូក ឃុំគូលែនជើង ស្រុកគូលែន ខេត្តព្រះវិហារ។ ប្រភពបានឲ្យដឹងទៀតថា ឈើនោះត្រូវបានលោក សេន ឡាំ មេការក្រុមហ៊ុនប្ល៊ូហ៊ីវិន លួចប្រមូលទិញដឹកចេញពីតំបន់អភិរក្សព្រៃឈើគូលែនព្រហ្មទេព កាត់តាមភូមិពោធិ៍រៀង ឃុំគូលែនជើង ស្រុកគូលែន។
ប្រជាសហគមន៍ការពារព្រៃឈើបានសហការជាមួយសមត្ថកិច្ចមូលដ្ឋានដើម្បីនាំយករថយន្តរ៉េវ និងឈើជាវត្ថុតាងមករក្សាទុកនៅសាលាស្រុកគូលែន កាលពីព្រឹកថ្ងៃទី១៣ ខែធ្នូ ឆ្នាំ២០១៨ ដើម្បីចាត់ការតាមនីតិវិធី។
មន្ត្រីអាជ្ញាធរនិងសមត្ថកិច្ចមូលដ្ឋានក្នុងឃុំគូលែនជើង ស្រុកគូលែន បានឲ្យដឹងថា បច្ចុប្បន្នឈ្មោះ សេន ឡាំ បានប្រើប្រាស់យីហោក្រុមហ៊ុនប្ល៊ូហ៊ីវិន ដើម្បីប្រមូលទិញឈើដឹកចេញពីតំបន់ដែនជម្រកសត្វព្រៃបឹងពេរ និងតំបន់អភិរក្សគូលែនព្រហ្មទេព យ៉ាងរលូន។ ចំណែកលោក អ៊ុន ចាន់ដា អភិបាលខេត្តព្រះវិហារ និងលោក ពឹង ទ្រីដា ប្រធានមន្ទីរកសិកម្មខេត្តព្រះវិហារ ព្រមទាំងមេរដ្ឋបាលព្រៃឈើខេត្តព្រះវិហារ កំពុងរក្សាភាពស្ងៀមស្ងាត់ទុកឲ្យលោក សេន ឡាំ មេការក្រុមហ៊ុនប្ល៊ូហ៊ីវិន បន្តប្រព្រឹត្តបទល្មើសព្រៃឈើចំហ។
សមត្ថកិច្ចនិងមន្ត្រីអាជ្ញាធរមូលដ្ឋានក្នុងឃុំគូលែនជើង ស្រុកគូលែន ខេត្តព្រះវិហារ បានឲ្យដឹងថា ការដែលឈ្មោះ សេន ឡាំ មេការក្រុមហ៊ុនប្ល៊ូហ៊ីវិន អាចធ្វើអ្វីៗតាមអំពើចិត្តគឺមានការឃុបឃិតជាប្រព័ន្ធពីសំណាក់មន្ត្រីបរិស្ថាន មន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធជាច្រើនស្ថាប័នដែលគិតតែពីរឿងប្រមូលលុយតាមរបៀបពុករលួយ។
ទោះជាយ៉ាងណាក៏ដោយសារពត៌មានយើងបានទាក់ទងទៅអ្នកពាក់ព័ន្ធខាងលើនេះដែរតែមិនមិនលើកទូរស័ព្ទ៕
