(ខេត្តកែប)៖ នៅព្រឹកថ្ងៃសុក្រ ៧កើត ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៤ខែធ្នូ ឆ្នាំ២០១៨នេះ បញ្ជាការដ្ឋានកងរាជអាវុធហត្ថខេត្តកែប បានធ្វើពិធីផ្សព្វផ្សាយ បទឧទ្ទេសនាមអប់រំនយោបាយចិត្តសាស្ត្រ ត្រីមាសទី៤ ឆ្នាំ២០១៨ ក្រោមអធិបតីភាព លោកឧត្តមសេនីយ៍ឯក ប្រាក់ សិទ្ធិ មេបញ្ជាការរងកងរាជអាវុធហត្ថលើផ្ទៃប្រទេស អមដំណើរដោយអស់លោកជាថ្នាក់ដឹកនាំជាន់ខ្ពស់នៃបញ្ជាការដ្ឋានកងរាជអាវុធជាច្រើនរូប។
ក្នុងឱកាសនោះ លោកឧត្តមសេនីយ៍ឯក ប្រាក់ សិទ្ធិ មេបញ្ជាការរងកងរាជអាវុធហត្ថលើផ្ទៃប្រទេស បានលើកឡើងថា កងកម្លាំងកងរាជអាវុធហត្ថទាំងអស់ត្រូវខិតខំពង្រឹងស្មារតី អប់រំនយោបាយផ្នែកចិត្តសាស្ត្រដោយអនុវត្តទៅតាមគោលការណ៍ របស់កងកម្លាំងប្រដាប់អាវុធ ហើយបើចង់ឱ្យការងារទទួលបានជោគជ័យត្រូវតែស្វែងរកមូលដ្ឋានឱ្យបានច្បាស់លាស់និងភាពអំណត់ទើបមានផ្លែផ្កា។លោកឧត្តមសេនីយ៍ឯក បានគូសបញ្ជាក់ទៀតថា ការរៀនសូត្រ អប់រំនយោបាយចិត្តសាស្ត្រអាចប្រព្រឹត្តទៅបានលុះណាតែយើងមានមូលដ្ឋាន និងទិសដៅច្បាស់លាស់ទើបឈានទៅរកផលវិជ្ជមានបាន។យ៉ាងណាមិញ បើផ្អែកលើសភាពការណ៍សន្តិសុខនយោបាយក្នុងតំបន់ខេត្តកែបកន្លងមក ក៏ដូចជាបច្ចុប្បន្ន គឺទទួលបានសុវត្ថិភាពល្អប្រសើរ ថ្វីបើកងកម្លាំងកងរាជអាវុធហត្ថមានតិចតួចបែបណា ប៉ុន្តែការបែងចែកកម្លាំងការពារបានរឹងមាំល្អដែលធ្វើឱ្យតំបន់ទេសចរណ៍ខេត្តកែបទទួលបានសុខ សុវត្ថិភាពពេញលេញ។
លោកឧត្តមសេនីយ៍ឯក ប្រាក់ សិទ្ធិ បានបញ្ជាក់ទៀតថា ដោយសារប្រទេសយើងមានសុខ សន្តិភាព ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា យើងពិតជាមានឱកាសក្នុងការស្តារនិងអភិវឌ្ឍន៍ប្រទេសប្រកបដោយការរីកចម្រើនពីមួយឆ្នាំទៅមួយឆ្នាំ។ជាមួយគ្នានេះ លោកឧត្តមសេនីយ៍ឯក ក៏សូមដាស់តឿនដល់មន្ត្រីកម្លាំងកងរាជអាវុធហត្ថទាំងអស់ធ្វើយ៉ាងណាត្រូវបន្តរឹតចំណងសាមគ្គីភាពផ្ទៃក្នុងឱ្យបានល្អប្រសើរ ពិសេសត្រូវសិក្សាស្វែងយល់និងហ្វឹកហ្វើន ពីយុទ្ធសាស្ត្រសម្រាប់ការបង្ក្រាបករណីផ្សេងៗ ទាក់ទងទៅនឹងការរក្សាសន្តិសុខសណ្តាប់ធ្នាប់ក្នុងសង្គម។
ទន្ទឹមនឹងនេះ លោកឧត្តមសេនីយ៍ឯក ប្រាក់ សិទ្ធិ មេបញ្ជាការរងកងរាជអាវុធហត្ថលើផ្ទៃប្រទេស ក៏បានលើកយកប្រធានបទសំខាន់ៗ ទាក់ទិននឹងព្រឹត្តការណ៍ជុំវិញពិភពលោក ពិសេសសង្គ្រាមពាណិជ្ជកម្ម នៅតាមបណ្តាប្រទេសមួយចំនួន ដែលជាប្រទេសមានសេដ្ឋកិច្ចលូតលាស់ខ្លាំងក្លា ដូចជាចិន កូរ៉េ រុស្សុី អាមេរិក កាណាដា ជាដើម។ក្នុងបទឧទ្ទេសមាន លោកក៏បានបញ្ជាក់ពីល្បិចកលនៃការធ្វើបដិវត្តន៍ពណ៌ ដោយពួកគេប្រើរូបភាពផ្សេងៗ ដើម្បីអុកឡុកធ្វើឱ្យសង្គមមានភាពចលាចល។ដូច្នេះកងកម្លាំងទាំងអស់ត្រូវសហការញ្នា រួមគ្នា សាមគ្គីគ្នា ពួតដៃគ្នា រក្សាសន្តិសុខ សណ្តាប់ធ្នាប់ជូនប្រជាពលរដ្ឋឱ្យបានកាន់តែល្អប្រសើរ៕
សេង ណារិទ្ធ
