(បន្ទាយមានជ័យ )៖កម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានទទួលពាក្យបណ្ដឹងពីជនរងគ្រោះឈ្មោះ លាង ប៉ូឡូ(រតនា) ភេទប្រុស អាយុ៣៣ឆ្នាំ ជនជាតិខ្មែរ ស្នាក់នៅភូមិប្រជាធម្មលិច សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ស្ដីពីករណីហិង្សាដោយចេតនា កើតឡើងនៅចំណុចហាងមួយកន្លែង ស្ថិតក្នុងភូមិចាន់គិរី សង្កាត់ប៉ោយប៉ែត ក្រុងប៉ោយប៉ែតប្រព្រឹត្តកាលពីវេលាម៉ោង២៣ និង០០នាទី ថ្ងៃទី០២ ខែមករា ឆ្នាំ២០២៥ បង្កដោយជនសង្ស័យឈ្មោះ ម៉ៅ សុឃា(យ៉ា) ភេទប្រុស អាយុ៣០ឆ្នាំ ស្នាក់នៅបន្ទប់ជួលភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត និងឈ្មោះ ម៉ាប់ (ពុំស្គាល់អត្តសញ្ញាណ) ភេទប្រុស អាយុប្រហែល៣០ឆ្នាំ បានធ្វើសកម្មភាពយកកាំបិត ប៉័ងតោកាប់ទៅលើជនរងគ្រោះ លាង ប៉ូឡូ(រតនា) បណ្ដាលឱ្យរងរបួសត្រូវប្រអប់ដៃជាច្រើនកន្លែង ។
ក្រោយពីទទួលបានពាក្យបណ្ដឹងរបស់ជនរងគ្រោះខាងលើលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានដឹកនាំចុះដល់កន្លែងកើតហេតុ និងបានធ្វើការឃាត់ខ្លួនជនសង្ស័យចំនួន០១នាក់ ឈ្មោះ ម៉ៅ សុឃា(យ៉ា) ព្រមទាំងដកហូតត្ថុតាង កាំបិតប៉័ងតោ ប្រវែង៣០សង់ទីម៉ែត្រ ចំនួន០១ដើម ហើយនាំមកមូលដ្ឋានក្រុងប៉ោយប៉ែត ដើម្បីសួរនាំតាមនីតិវិធី។ដោយឡែកបក្ខពួកម្នាក់ទៀតរត់គេចខ្លួន។
លោកវរសេនីយ៍ត្រី នួន នីណារ៉ូ បានឱ្យដឹងថា ក្រោយឃាត់ខ្លួន និងសួរនាំរួច ជនសង្ស័យបានឆ្លើយសារភាពថា ខ្លួននិងបក្សពួកពិតជាបានប្រើហិង្សាទៅលើជនរងគ្រោះពិតប្រាកដមែន ដោយរូបខ្លួនបានយកកាំបិតប៉័ងតោបម្រុងកាប់ទៅលើជនរងគ្រោះ តែកាប់មិនត្រូវទេ បន្ទាប់មកឈ្មោះ ម៉ាប់ បានយកកាំបិតប៉័ងតោពីដៃរបស់ខ្លួន កាប់ទៅលើជនរងគ្រោះបណ្ដាលឱ្យរងរបួសតែម្ដង។
ដោយផ្អែកលើចម្លើយសារភាព និងមានវត្ថុតាងជាក់ស្តែងកម្លាំងមូលដ្ឋានកងរាជអាវុធហត្ថក្រុងកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសបានឱ្យដឹងថា បច្ចុប្បន្ន ជនសង្ស័យត្រូវបានបញ្ជូនទៅសាលាដំបូងខេត្តហើយ នៅព្រឹកថ្ងៃអាទិត្យ ទី០៥ ខែមករា ឆ្នាំ២០២៥នេះ ដើម្បីអនុវត្តតាមនីតិវិធី៕
