ខេត្តកំពង់ឆ្នាំង ៖ ថ្ងៃសុក្រ ០៥កើត ខែបុស្ស ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី០៣ ខែមករា ឆ្នាំ២០២៥ ខណ្ឌរដ្ឋបាលជលផលកំពង់ឆ្នាំង បានចុះប្រតិបត្តិការបង្ក្រាបបទល្មើសនេសាទ ដោយបានចែកជាពីរក្រុម រួមមាន៖
+ក្រុមទី១៖ លោក លី ឡា នាយខណ្ឌរដ្ឋបាលជលផលកំពង់ឆ្នាំង បានដឹកនាំកម្លាំង ដោយបានសហការជាមួយសហគមន៍នេសាទអន្លង់មេត្រីសែនជ័យ សហគមន៍នេសាទភូមិថ្មី មានកម្លាំងចូលរួមសរុប១២នាក់ និងមធ្យោបាយបាឡាស្មាច់ ០៣ គ្រឿង បានចុះប្រតិបត្តិការប្រទះឃើញការធ្វើនេសាទដោយឧបករណ៍ របាំងលូសាច់អួន និងរបាំងលូស្បៃមុង នៅចំណុចកោះបរាជ និងចំណុចព្រែកក្បាលកន្លង់ ភូមិក្បាលកន្លង់ ឃុំពាមឆ្កោក ស្រុកជលគិរី ខេត្តកំពង់ឆ្នាំង ដែលខុសទៅនឹងច្បាប់ស្តីពីជលផល។
+ក្រុមទី២៖ លោក រៀល សុខុម សង្កាត់រដ្ឋបាលជលផលជលគិរី មានកម្លាំង០៣នាក់ មធ្យោបាយបាឡាស្មាច់ ០១គ្រឿង បានចុះប្រតិបត្តិការប្រទះឃើញដុំសម្រាស់នៅចំណុចមាត់ទន្លេស្ដីដកគង ភូមិអន្លង់មេត្រី ឃុំពាមឆ្កោក ស្រុកជលគិរី ខេត្តកំពង់ឆ្នាំង ។
+ក្រុមទី៣ ៖ លោក នួន ឬទ្ធី នាយផ្នែកជលផលកំពង់ប្រាសាទ សហការជាមួយអាជ្ញាធរឃុំស្វាយជ្រុំ និងប៉ុស្តិ៍នរគបាលរដ្ឋបាលស្វាយជ្រុំ កំលាំងចំនួន០៩នាក់ មធ្យោបាយកាណូតចំនួន ០២គ្រឿង បានចុះប្រតិបត្តិការបង្ក្រាបបទល្មើសនេសាទក្នុងភូមិសាស្ត្រឃុំស្វាយជ្រុំ ស្រុករលាប្អៀរ បានប្រទះឃើញការធ្វើនេសាទដោយប្រើសម្រាស់រួមផ្សំកំប្លោកខុសនឹងច្បាប់ស្តីពីជលផលនៅចំណុចព្រែកក្រពើពុល និងប្រលិចក្អែក ភូមិកំពង់រាំង ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
បន្ទាប់ពីពិនិត្យជាក់ស្តែង សមត្ថកិច្ចយើងបានឯកភាពធ្វើការរុះរើ និងបំផ្លាញ់ចោលឧបករណ៍នេសាទខុសច្បាប់នូវហ្នឹងកន្លែង ចំនួន៤ ករណី រួមមាន៖
-សម្រាស់ចំនួន០២ករណី ស្មើនឹង១៤កន្លែង ទំហប្រមាណ ៤៣០០ម៉ែត្រការ៉េ មែកសម្រាស់ចំនួន៧៣០ មែក បង្គោលចំនួន១៣៧ដើម ខ្សែចំណង ១៥០ម៉ែត្រ។
-របាំងសាច់អួន០១ករណី ស្មើនឹង ០១កន្លែង ប្រវែង១៥០ ម លូសាច់អួនចំនួន០៤ គ្រឿងបង្គោលចំនួន១០០ដេីម
-របាំងស្បៃមុង០១ករណីស្មើនឹង០៨ កន្លែង ប្រវែង ៤០០ម លូស្បៃមុងចំនួន០៨គ្រឿង បង្គោលចំនួន២០០ដើម ត្រីចម្រុះចំនួន ៥៥ គីឡូក្រាម ៕
