(តាកែវ )៖ ថ្ងៃពុធ ៧រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣១ ខែតុលា ឆ្នាំ២០១៨ ឯកឧត្តម ឧត្ដមសេនីយ៍ឯក អ៊ីង សំអុល ប្រធាននាយកដ្ឋានកិច្ចការប៉ុស្តិ៍នគរបាលរដ្ឋបាល តំណាងដ៏ខ្ពង់ខ្ពស់ ឯកឧត្ដម នាយឧត្ដមសេនីយ៍ សន្តិបណ្ឌិត អគ្គស្នងការដ្ឋាននគរបាលជាតិ បានដឹកនាំប្រតិភូនាយកដ្ឋាន ស្នងការរងសេនាធិការ នាយការិយាល័យកិច្ចការប៉ុស្តិ៍នគរបាលរដ្ឋបាល មកពីស្នងការដ្ឋាននគរបាល ចំនួន៨ គឺកំពត ស្វាយរៀង កំពង់ស្ពឺ កោះកុង កែប កណ្តាល ព្រះសីហនុ និងរាជធានីភ្នំពេញ រៀបចំកិច្ចប្រជុំពិគ្រោះយោបល់ផ្លាស់ប្ដូរបទពិសោធន៍ការងារនគរបាល និងសហគមន៍នៅស្នងការដ្ឋាននគរបាលខេត្តតាកែវ រយៈពេល២ថ្ងៃ ដែល មានសមាជិកសរុបប្រមាណជាង២០០នាក់ ។ ដើម្បីស្វែងយល់ពីការអនុវត្តការងារនគរបាល និងសហគមន៍នៅខេត្តតាកែវក្រុមការងារមកពីរាជធានី-ខេត្ត ត្រូវបានបែងចែកជា៥ក្រុម ចុះទៅតាមឃុំ សង្កាត់គោលដៅដែលបានកំណត់ក្នុងអធិការដ្ឋាននគរបាលក្រុងដូនកែវ ស្រុកត្រាំកក់ និងស្រុកសំរោង ដើម្បីធ្វើការពិភាក្សាពិគ្រោះយោបល់ជាមួយអាជ្ញាធរភូមិ ឃុំ និងប៉ុស្តិ៍នគរបាលរដ្ឋបាល សំដៅស្វែងយល់អំពីការអនុវត្តការងារនគរបាល និងសហគមន៍នៅខេត្តតាកែវ ជាពិសេសការប្រើប្រាស់ទម្រង់ទាំង៤ សៀវភៅផ្ទាំងធំអំពីការរួមគ្នាបញ្ឈប់អំពើហិង្សាទាក់ទងនឹងយេនឌ័រ ការបង្ការទប់ស្កាត់ការប្រើប្រាស់គ្រឿងញៀន និងការបង្ការទប់ស្កាត់អំពើចោរកម្ម និងឯកសារពាក់ព័ន្ធនានា របស់ប៉ុស្តិ៍នគរបាលរដ្ឋបាលអោយមានការវិឌ្ឍន៍ល្អប្រសើរ និងជាប់ជារៀងរាល់ខែ ។
ក្រោយពីក្រុមការងារទាំង៥ក្រុម ចុះទៅឃុំ សង្កាត់គោលដៅទាំង១០ រួចមកឃើញថា ប៉ុស្តិ៍នគរបាលរដ្ឋបាលនៅខេត្តតាកែវ បានខិតខំយកចិត្តទុកដាក់អនុវត្តការងារនគរបាល និងសហគមន៍តាមសេចក្តីណែនាំលេខ០១៣ សណន របស់អគ្គស្នងការដ្ឋាននគរបាលជាតិ បានគួរឱ្យមានមោទនភាព បើទោះបីនៅមានចំណុចខ្លះនូវមិនទាន់បានត្រឹមត្រូវនៅឡើយ ។
ថ្លែងទៅកាន់អង្គពិធីទាំងមូល ឯកឧត្តមប្រធាននាយកដ្ឋានបានជម្រុញ និងណែនាំឱ្យអធិការនគរបាលទាំងអស់ត្រូវមានយន្តការចុះគាំទ្រ និងដឹកនាំប៉ុស្តិ៍ក្នុងការអនុវត្តការងារនេះឱ្យទទួលបានជោគជ័យ ក្លាយជាអ្នកបម្រើប្រជាពលរដ្ឋដោយស្មោះត្រង់ ដោយឡែកប៉ុស្តិ៍នគរបាលរដ្ឋបាល មិនត្រូវធ្វើខ្លួនឱ្យឃ្លាតឆ្ងាយពីប្រជាពលរដ្ឋ ត្រូវបម្រើប្រជាពលរដ្ឋឱ្យបានល្អ នោះប្រជាពលរដ្ឋនឹងគោរពស្រលាញ់យើង រាយការណ៍រាល់ហេតុការណ៍ផ្សេងៗ ដល់នគរបាលជាមិនខាន ។
