(ខេត្តកំពត)៖ នៅព្រឹកថ្ងៃទី ០១ ខែវិច្ចិកា ឆ្នាំ២០១៨ លោក ជាវ តាយអភិបាលនៃគណៈអភិបាលខេត្តកំពត បានអញ្ជើញជាអធិបតីក្នុងពិធីបើកបវេសនកាលឆ្នាំសិក្សាថ្មី ២០១៨-២០១៩នៅវិទ្យាល័យមិត្តភាពកម្ពុជា-ជប៉ុន កំពងក្រុង។
អង្គពិធីបន្ទាប់មានរបាយការណ៍របស់លោកនាយកសាលានិងលោក ប្រធានមន្ទីរអប់រំយុវជននិងកីឡាខេត្ត បានឱ្យដឹងអំពីវឌ្ឍនភាពរីកចម្រើនលើវិស័យអប់រំយុវជននិងកីឡានៅក្នុងសាលាក៏ដូចក្នុងទូទាំងខេត្តរួចមក លោក ជាវ តាយអភិបាលខេត្ត បានអាននូវសារលិខិតសម្ដេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ថ្លែងក្នុងឱកាស បើកបវេសនកាលឆ្នាំសិក្សា ២០១៨-២០១៩នេះ ដោយក្នុងខ្លឹមសារលិខិតមានជាអាទិថា៖ ថ្ងៃទី០១ ខែវិច្ចិកា ឆ្នាំ២០១៨នេះ គឺជាថ្ងៃដ៏មានអត្ថន័យយ៉ាងជ្រាលជ្រៅបំផុតរបស់ក្មួយៗជាសិស្សានុសិស្សចំណេះទូទៅទាំងអស់ដែលជាកុលបុត្រ កុលធីតាជាទីស្រឡាញ់របស់យើងគ្រប់ៗគ្នា មានឱកាសទទួលបាននូវការអប់រំ ឱកាសក្នុងការបន្តការសិក្សារៀនសូត្រនិងជាថ្ងៃចាប់ផ្ដើមនៃជីវិតសិក្សាដំបូងរបស់កុមារតូចៗដែលទើបនឹងដល់អាយុត្រូវចូលសាលារៀន។
សារលិខិតបានបន្តទៀតថា ៖កន្លងមករាជរដ្ឋាភិបាលកម្ពុជា បានវិនិយោគយ៉ាងសន្ធឹកសន្ធាប់លើវិស័យអប់រំ ទាំងការកសាងហេដ្ឋារចនាសម្ពន្ធ័ ការយកចិត្តទុកដាក់លើសិស្សជួបការលំបាក ការលើកកម្ពស់ លក្ខខណ្ឌការងារនិងលក្ខខណ្ឌរស់នៅរបស់គ្រូបង្រៀនជាបន្តបន្ទាប់និងសាលិខិតបាន ថ្លែងអំណរគុណចំពោះលោកគ្រូ អ្នកគ្រូបង្រៀនទាំងអស់នៅទូទាំងប្រទេស ដែលបានលះបង់កម្លាំងកាយ ប្រាជ្ញា ស្មារតី បង្ហាត់បង្រៀនសិស្សឱ្យទទួលបានចំណេះដឹង ជំនាញ សីលធម៌ និងកាយសម្បទារឹងមាំ ដើម្បីក្លាយជាពលរដ្ឋល្អ ដែលជាសសរទ្រូងរឹងមាំក្នុងការអភិវឌ្ឍន៍ប្រទេសជាតិឱ្យសំបូររុងរឿង។
ជាមួយឱកាសនោះ លោកអភិបាលខេត្យក្នុងនាមរដ្ឋបាលខេត្ត ក៏បានសំដែងការអបអរសាទរនិងក្ដីសោមនស្សរីករាយនៅក្នុងឱកាសបើកបវេសនកាលនាឆ្នាំសិក្សាថ្មី ២០១៨-២០១៩នេះដែរ។ លោកអភិបាលខេត្ត ក៏បានបញ្ជាក់ថា៖ ការប្រារព្ធពិធីបើកបវេសនកាលនាឆ្នាំ២០១៨-២០១៩ នាថ្ងៃនេះសម្រាប់ខេត្តកំពតគឺបានធ្វើព្រមៗគ្នានៅតាមបណ្ដាគ្រប់ក្រុង-ស្រុកក្នុងខេត្តនិងនៅទូទាំងប្រទេសកម្ពុជា។ លោក ជាវ តាយ ក៏បានផ្ដាំផ្ញើដល់សិស្សានុសិស្ស លោកគ្រូ អ្នកគ្រូ ឪពុកម្ដាយអាណាព្យាបាលសិស្ស ត្រូវចូលរួមជៀសឱ្យឆ្ងាយពីគ្រឿងញៀនខុសច្បាប់ និង ចូលរួមគោរពច្បាប់ចរាចរណ៍ដើម្បីអនាគតសង្គមនិងគ្រួសាររបស់យើងទាំងអស់គ្នា៕ សេង ណារិទ្ធ
