តាកែវ៖ថ្ងៃចន្ទ ៤រោច ខែអស្សុជ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២១ ខែតុលា ឆ្នាំ២០២៤ នៅភូមិត្រពាំងលើក ឃុំស្មោង ស្រុកទ្រាំង ខេត្តតាកែវ វេលាម៉ោង ២រសៀល មានពិធីសម្ភោធការដ្ឋានចាក់ប្លង់សេបេតុង វិហារអុីស្លាម អាលសាឡាម ក្រោមអធីបតីភាព ឯកឧត្តម ឡា ឡៃ រដ្ឋលេខាធិការ ក្រសួងធម្មការនិងសាសនា ។
ពីធីនោះដែរក៏មានការអមដំណើរអញ្ជើញចូលរួមពីសំណាក់ ឯកឧត្តម ប៊ិន ស៊ីនាថ ជំនួយការសម្ដេចអគ្គមហាសេនាបតីតេជោ ហ៊ុន សែន ឯកឧត្តមឧត្តមសេនីយ៍ឯក សុប សេន អគ្គលេខាធិការរងនៃអគ្គលេខាធិការដ្ឋានក្រសួងមហាផ្ទៃ ឯកឧត្តម តហ៊ើរ អូមើត ទីប្រឹក្សាក្រសួងមហាផ្ទៃ និងជាប្រធានសមាគមពិភពល្អកម្ពុជា លោក សុខ លី គណៈអ៊ីម៉ាំខេត្តតាកែវ
លោក ស៊ុត ខឿន អភិបាលរងស្រុកទ្រាំង លោកមេឃុំស្មោង និងអស់លោកលោកស្រី ជាច្រើនរូបទៀតព្រមទាំងប្រជាពលរដ្ឋជាច្រើនផងដែរ។
មានមតិស្វាគមន៍គណៈអធិបតី លោក ម៉ៅ លី គណៈកម្មការសាងសង់វិហារឥស្លាមអាល់សាឡាម ភូមិត្រពាំងលើក បានឡើងរាយការណ៍ជូនគណៈអធិបតី ពីដំណើរការប្រព្រឹត្តទៅនៃការសាងសង់វិហារឥស្លាមនេះចាប់តាំងពីដើមរហូតដល់ថ្ងៃនេះថា
មានមតិសំណេះសំណាលក្នុងកម្មវិធីនោះដែរ ឯកឧត្តមឧត្តមសេនីយ៍ឯក សុប សេន អគ្គលេខាធិការរងនៃអគ្គលេខាធិការដ្ឋានក្រសួងមហាផ្ទៃ ថា ការកសាងវិហារឥស្លាមដែលជាផ្ទះរបស់អុលឡោះជាម្ចាស់ គឺជាកាតព្វកិច្ចរបស់អ្នកមូស្លីមគ្រប់ៗគ្នាដែលត្រូវរួមគ្នាធ្វើឲ្យបានល្អស្អាត ដូច្នេះប្រជាពលរដ្ឋនៅតាមភូមិស្រុកនីមួយៗ ត្រូវចេះជួយគ្នាទៅវិញទៅមកដើម្បីរៃអង្គាសជាថវិកានិងសម្ភារៈសម្រាប់បម្រើឲ្យការសាងសង់វិហារឥស្លាមដែលជាកន្លែងសម្រាប់ជួបជុំគ្នាប្រារព្ធការសឡាតថ្វាយបង្គំ ទៅចំពោះអុលឡោះជាម្ចាស់។
ឯកឧត្តមបានបន្តថា សមិទ្ធផលវិហារឥស្លាមនេះកើតឡើងដោយសារការរួបរួមសាមគ្គីគ្នារវាងសាសនិកឥស្លាមភូមិត្រពាំងលើកនិងសាសនិកឥស្លាមនៅតាមបណ្ដាភូមិស្រុកខេត្តក្រុងដទៃទៀត។ហើយយើងទាំងអស់គ្នានឹងខិតខំប្រឹងប្រែងបន្តទៀតដើម្បីធ្វើឲ្យសមិទ្ធិផលវិហារឥស្លាមភូមិត្រពាំងលើក នេះ អាចលេចជារូបរាងជាស្ថាពរក្នុងពេលឆាប់ៗខាងមុខនេះ។
ឯកឧត្តមបានបន្តទៀតថា ” សូមនាំគ្នាចូលរួមបរិច្ចាកទាន ដៃខាងឆ្វេង ដោយដៃខាងស្តាំមិនបានដឹង “។
ហើយបើតាមការគ្រោងទុក វិហារអុីស្លាមអាល់សាឡាមនេះនឹងគ្រោងធ្វើការសម្ពោធឲ្យប្រើប្រាស់នៅក្នុងឆ្នាំ 2026 ខាងមុខនេះ។
ឯកឧត្តម ឡា ឡៃ រដ្ឋលេខាធិការក្រសួងធម្មការនិងសាសនាបានមានមតិផ្ដាំផ្ញើថា ឯកឧត្តមមានមោទនភាពបំផុតដោយសារទឹកដីខេត្តតាកែវយើងមានថ្នាក់ដឹកនាំជាច្រើននាក់មានតួនាទីល្អៗក្នុងជួររាជរដ្ឋាភិបាលនិងសង្គមស៊ីវិល បានរួមសាមគ្គីគ្នាជាធ្លុងមួយដើម្បីផ្តួចផ្ដើមគំនិតសាងសង់វិហារឥស្លាមនេះឡើង។
ឯកឧត្តមបានមានប្រសាសន៍ទៀតថា កត្តាសាមគ្គីភាពផ្ទៃក្នុងគឺជាកត្តាសំខាន់ដែលធ្វើឲ្យយើងអាចសម្រេចផែនការបានដោយជោគជ័យ ហើយក្នុងនាមឯកឧត្តមជាទីប្រឹក្សារបស់គណៈដឹកនាំជាន់ខ្ពស់នៃសាសនាអ៊ីស្លាមកម្ពុជាសូមសំដែងនូវការគាំទ្រយ៉ាងពេញទំហឹង ហើយប្តេជ្ញាជួយជ្រោមជ្រែងនិងសហការ សម្របសម្រួល ដើម្បីធ្វើឲ្យការសាងសង់ដំណើរការទៅមុខបានរលូននិងឆាប់រហ័សតាមផែនការ។
ឯកឧត្តមក៏បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមឧត្តមសេនីយ៍ សុប សេន និងថ្នាក់ដឹកនាំជាសប្បុរសជននិងបងប្អូនប្រជាពលរដ្ឋទាំងអស់ ដែលមានសទ្ធាជ្រះថ្លា រួមគ្នាធ្វើឱ្យសមិទ្ធផលថ្មីមួយនេះលេចរូបរាងឡើងក្នុងពេលឆាប់ៗនេះ។
ឯកឧត្តមក៏មានមតិផ្ដាំផ្ញើដល់បងប្អូនជាសាសនាឥស្លាមទាំងអស់ត្រូវប្រឹងប្រែងក្នុងការអប់រំណែនាំដល់កូនៗប្រឹងប្រែងធ្វើអំពើល្អ ជៀសឆ្ងាយអោយផុតពីបញ្ហាក្មេងទំនើង និងគ្រឿងញៀន ។ល។
នៅចុងបញ្ចប់នៅកម្មវិធីគណៈអធិបតីបានអញ្ជើញចុះពិនិត្យសកម្មភាពឡានកំពុងបាញ់ប៊ូតុងចាក់ប្លង់សេ ជាន់ទី១ នៃវិហារឥស្លាម អាល់សាឡាម ភូមិត្រពាំងលើក ក្រោមបរិយាកាសរីករាយបំផុត៕
