ភ្នំពេញ ៖ នៅរសៀលថ្ងៃទី១៧ ខែកញ្ញា ឆ្នាំ២០១៨កន្លងទៅនេះ ឧបាសិកា ជា ឃុនពេជ្រ ស្ថិតក្នុងវ័យចាស់ជរា ព្រះជន្មជាង៨០វស្សា សុខភាពទន់ខ្សោយ ពុំអាចដើរទៅណាឆ្ងាយរួច បានសំណូមពរឲ្យកូនប្រុស ឈ្មោះ លឹម យូ ជូនមកកាន់ទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីជួបជាមួយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ ។
សូមបញ្ជាក់ថា?អំណោយជាលើកទី៣មានអង្ករ៨០ការ៉ុង មី១០កេសធំ ទឹកស៊ីអ៊ីវ៦០យួរ មកចម្លងតាមរយៈលោកឧត្តមសេនីយ៍ឯក រ័ត្ន ស្រ៊ាង ផ្ញើជូនទៅកាន់ គ្រួសារទីទាល់ក្រនិងចាស់ជរាទុរគត់តាមការជាក់ស្តែង ព្រោះតែរយៈកាលកន្លងមករាល់ខែ ឧបាសិកាតែងឃើញព័ត៌មាន ស្តីពីការជួយផ្តល់អំណោយ របស់លោកឧត្តមសេនីយ៍ឯក រ័ត្ន ស្រ៊ាង ជូនដល់គ្រួសារទីទាល់ក្រនិងចាស់ជរាទុរគត់ ជិតម្ភៃគ្រួសារមិនដែលមានខាន ទាំងនៅខេត្តបន្ទាយមានជ័យ ទាំងនៅរាជធានីភ្នំពេញ។
ដូច្នោះហើយទើប ឧបាសិកា ជា ឃុនពេជ្រ សម្រេចចិត្តផ្ញើទានចម្លងបុណ្យ តាមរយៈលោកឧត្តមសេនីយ៍ឯក រ័ត្ន ស្រ៊ាង ជាហូរហែរសរុប៣លើកមកហើយ តែកន្លងមកឧបាសិកាបានត្រឹមតែឃើញលោក រ័ត្ន ស្រ៊ាង តាមព័ត៌មានប៉ុណ្ណោះ ទើបតែមកដល់ថ្ងៃនេះដែលឧបាសិកា បានជួបលោក រ័ត្ន ស្រ៊ាង ដោយផ្ទាល់ជាលើកទី១ ឧបាសិកាពិតជាមានចិត្តត្រេកអរជាខ្លាំងព្រោះតែសម្រេចតាមបំណងដែលប៉ងជួបលោក រ័ត្ន ស្រ៊ាង ផ្ទាល់ និងបានប្រគល់អំណោយដោយផ្ទាល់ជូនដល់លោក រ័ត្ន ស្រ៊ាង សម្រាប់ធ្វើជាទានចែកជូនដល់អ្នកក្រខ្សត់ជាបន្ត។
ពាក្យចាស់លោកពោលថា ” រោគអ្វីមិនស្មើនឹងរោគឃ្លាន ទានអ្វីមិនស្មើទានទេសនា មានអ្វីមិនស្មើមានបញ្ញា ថ្លាអ្វីមិនស្មើចិត្តជាបុណ្យ។ ជីវិតរាល់រូបតិចតួចណាស់ យើងត្រូវខ្នែងខ្នះប្រព្រឹត្តល្អ ទោះមិនបានរៀនចេះសូត្រធម៌ ត្រឹមប្រព្រឹត្តល្អគឺបុណ្យហើយ “។
រយ:កាលកន្លងមកនេះ លោកឧត្តមសេនីយ៍ឯក រ័ត្ន ស្រ៊ាង តែងជួយឧបត្ថម្ភគ្រួសារទីទាល់ក្រនិងចាស់ជរាទុរគត់ជាប្រចាំ រៀងរាល់ខែមិនដែលមានខាន ចំនួន១៨គ្រួសារ អស់រយៈពេលជាច្រើនឆ្នាំមកហើយទាំងនៅខេត្តបន្ទាយមានជ័យនិងនៅរាជធានីភ្នំពេញ៕
លោក ហុក វិបុល
