កំពត ៖ នៅព្រឹកថ្ងៃអង្គារ ០៩កើត ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១៨ ខែកញ្ញា ឆ្នាំ២០១៨ ស្នងការដ្ឋាននគរបាលខេត្តកំពត បានរៀបចំពិធីប្រកាសផ្ទេរភារកិច្ច តែងតាំងមុខតំណែងនិង បំពាក់ឋានន្តរស័ក្តិ ជូនដល់មន្ត្រីនគរបាលជាតិ នៃស្នងការដ្ឋាននគរបាលខេត្តកំពត និងប្រជុំបូកសរុបលទ្ធផលការងារប្រចាំខែកញ្ញា ក្រោមអធិបតីភាព លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត។ ក្នុងពិធីនេះ ក៏មានវត្តមានអញ្ជើញចូលរួមពីសំណាក់លោក-លោកស្រីស្នងការរង អស់លោកអនុប្រធានការិយាល័យកណ្តាល លោកនាយ-នាយរងការិយាល័យ លោកអធិការនគរបាលក្រុង-ស្រុក ទាំង៨ លោកមេបញ្ជាការវរៈសេនាតូចលេខ ៦០១ និងលោកនាយប៉ុស្តិ៍ទាំង ៩៣ ប៉ុស្តិ៍ សរុបចំនួន ២៣៥។
ក្នុងពិធីនេះ ត្រូវបានប្រកាសផ្ទេរភារកិច្ច និងតែងតាំងមុខតំណែងចំនួន ៣០នាក់ បំពាក់ឋានន្តរស័ក្តិដល់មន្ត្រីនគរបាលចំនួន ៦៥ នាក់ មានថ្នាក់អនុសេនីយ៍ឯក ចំនួន២៤ នាក់ ថ្នាក់អនុសេនីយ៍ទោ ចំនួន២១នាក់ ថ្នាក់អនុសេនីយ៍ត្រី ចំនួន១៧នាក់ ថ្នាក់ព្រិន្ទបាលឯក ចំនួន០១នាក់ ថ្នាក់ព្រិន្ទបាលទោ ចំនួន០១ នាក់ និងថ្នាក់ពលបាលឯកចំនួន០១នាក់។
ក្នុងឱកាសនោះ លោកឧត្តមសេនីយ៍ទោម៉ៅ ច័ន្ទមធុរិទ្ឋ ស្នងការនគរបាលខេត្តកំពត បានមានប្រសាសន៍ផ្តាំផ្ញើដល់មន្ត្រីនគរបាលជាតិនៃស្នងការដ្ឋាននគរបាលខេត្តដែលទើបនឹងទទួលមុខតំណែងថ្មីនិងបំពាក់ឋានន្តរសក្តិនាពេលនេះ សូមឲ្យអស់លោកទាំងអស់ខិតខំយកចិត្តទុកដាក់បំពេញរាល់ការអនុវត្តតាមបទបញ្ជាដែលថ្នាក់លើប្រគល់ជូនគោរពនិងអនុវត្តនូវរាល់បទបញ្ជាឲ្យបានម៉ឺងម៉ាត់បំផុត ដើម្បីសម្រេចជោគជ័យរាល់កិច្ចការនិងការងារស្នូលរបស់ខ្លួន ។ រក្សាការសាមគ្គីភាពផ្ទៃក្នុងឲ្យបានល្អ គោរពវិន័យបទបញ្ជាកងកម្លាំងឲ្យបានល្អស័ក្តិសមជាកងកម្លាំងនគរបាលបម្រើប្រជាជនពិតៗ។ មានសុជីវធម៌ក្នុងការនិយាយស្តីជាមួយថ្នាក់ដឹកនាំ មហាជន ប្រជាជនឲ្យបានសមរម្យនិងស័ក្តិសមជាកងកម្លាំងរបស់ប្រជាជន ពិសេសជាងនេះទៅទៀតគឺយកចិត្តទុកការពារសន្តិសុខ សុវត្ថិភាព ជូនប្រជាពលរដ្ឋគ្រប់មូលដ្ឋាន ពិសេសជួយយកអាសារប្រជាពលរដ្ឋដែលកំពុងជួបគ្រោះមហន្តរាយផ្សេងៗ ដូចជាគ្រោះថ្នាក់ចរាចរ គ្រោះអគ្គីភ័យ ឬ គ្រោះទឹកជំនន់ជាដើម៕
សេង ណារិទ្ធ
