អ្នកឧកញ៉ា គិត ម៉េង ដឹកនាំប្រតិភូសភាពាណិជ្ជកម្មកម្ពុជា ចូលរួមកិច្ចប្រជុំកំពូលធុរកិច្ច និងវិនិយោគអាស៊ាន ២០២៤

(វៀងចន្ទន៍-ឡាវ)៖ ក្នុងឱកាសអមដំណើរសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចូលរួមកិច្ចប្រជុំកំពូលអាស៊ានលើកទី៤៤ និង៤៥ និងកិច្ចប្រជុំកំពូលពាក់ព័ន្ធ នៅទៅរដ្ឋធានីវៀងចន្ទន៍ ប្រទេសឡាវ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា រួមនឹងគណៈប្រតិភូសភាពាណិជ្ជកម្មកម្ពុជា នាព្រឹកថ្ងៃទី៩ ខែតុលា ឆ្នាំ២០២៤នេះ បានអញ្ជើញចូលរួមកិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ២០២៤ ។

កិច្ចប្រជុំកំពូលធុរកិច្ច និងវិនិយោគអាស៊ាននេះ មានការអញ្ជើញចូលរួមពីប្រមុខរដ្ឋ ប្រមុខរដ្ឋាភិបាលអាស៊ាន ដៃគូអាស៊ាន និងធុរជនមកពីអាស៊ាន និងទូទាំងពិភពលោក ។

កិច្ចប្រជុំកំពូលធុរកិច្ច និងវិនិយោគអាស៊ានឆ្នាំ២០២៤ បានផ្តោតលើប្រធានបទសំខាន់ៗរួមមាន៖ ១) គោលជំហរបស់អាស៊ាន នៅក្នុងភូមិសាស្ត្រនយោបាយសាកល ២) ការលើកកម្ពស់តំណភ្ជាប់សេដ្ឋកិច្ច និងភាពធន់នឹងវិបត្តិ ៣) តួនាទីរបស់អាស៊ាន ក្នុងសេដ្ឋកិច្ចសាកល និង ៤) ទិដ្ឋភាពអនាគតអាស៊ាន នៅក្នុងតំបន់ឥណ្ឌូប៉ាស៊ីហ្វិក។

សូមជំរាបថា ចាប់តាំងពីថ្ងៃដំបូង អាស៊ានបានយកសេដ្ឋកិច្ច-ពាណិជ្ជកម្មជាមូលដ្ឋានគ្រឹះ និងជាកម្លាំងជំរុញកិច្ចសហប្រតិបត្តិការក្នុងតំបន់។ ការអភិវឌ្ឍទំនាក់ទំនងសេដ្ឋកិច្ច-ពាណិជ្ជកម្ម ត្រូវបានសម្គាល់ដោយការបង្កើតតំបន់ពាណិជ្ជកម្មសេរីអាស៊ាន (AFTA) ក្នុងឆ្នាំ១៩៩២ និងការខិតខំប្រឹងប្រែងដើម្បីធ្វើសេរីភាវូបនីយកម្ម នូវលំហូរពាណិជ្ជកម្មទំនិញ សេវាកម្ម និងការវិនិយោគ។

ទន្ទឹមនឹងការភ្ជាប់ទំនាក់ទំនងក្នុងតំបន់ អាស៊ានបាន ពង្រីកទំនាក់ទំនងរបស់ខ្លួនជាមួយខាងក្រៅ ដោយនាំសហគមន៍សេដ្ឋកិច្ចអាស៊ាន ទៅជាចំណុចប្រសព្វនៃកិច្ចព្រមព្រៀង សហប្រតិបត្តិការពហុភាគី។

បណ្តាញកិច្ចព្រមព្រៀងពាណិជ្ជកម្មសេរីរវាងអាស៊ាន និងប្រទេសសេដ្ឋកិច្ចធំៗជាច្រើនក្នុងពិភពលោក រួមជាមួយការដែលកិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយក្នុងតំបន់ (RCEP) បានចូលជាធរមាននៅថ្ងៃទី១ ខែមករា ឆ្នាំ២០២២ គឺជាការរួមចំណែកជាក់ស្តែងរបស់អាស៊ាន សម្រាប់ប្រព័ន្ធពាណិជ្ជកម្មពហុភាគី បើកចំហ និងតម្លាភាពនៅក្នុងតំបន់ និងនៅលើពិភពលោក។

ជាមួយនឹងប្រជាជនជិត៧០០ លាននាក់ និងផលិតផលក្នុងស្រុកសរុប (GDP) ជិត ៤ ពាន់ពាន់លានដុល្លារ អាស៊ានគឺជាតំបន់សេដ្ឋកិច្ចមួយដ៏ធំ និងរីកចម្រើន៕