កម្លាំងគណៈបញ្ជាការឯកភាពខេត្តឧត្តរមានជ័យ ចាត់វិធានការតាមច្បាប់ ចំពោះជនណាដែលមានបំណងបំផ្លាញសុខសន្តិភាពដែលមានសព្វថ្ងៃ

(ឧត្តរមានជ័យ)៖ លោក មាន ចាន់យ៉ាដា អភិបាលខេត្តឧត្តរមានជ័យ និងជាប្រធានគណៈបញ្ជាការឯកភាពរដ្ឋបាលខេត្ត បានថ្លែងដោយធ្វើការប្តេជ្ញាចិត្តយ៉ាងមុតមាំគោរព និងការពារឥតងាករេចំពោះជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ដែលប្រសូត្រចេញពីឆន្ទះប្រជាពលរដ្ឋ តាមរយៈការបោះឆ្នោត ជាមួយនឹងការព្រមានចាត់វិធានការតាមច្បាប់ចំពោះជនណាដែលមានបំណងបំផ្លាញសុខសន្តិភាពដែលមានសព្វថ្ងៃនៅកម្ពុជា។

ការថ្លែងប្តេជ្ញាចិត្តរបស់លោកអភិបាលខេត្តឧត្តរមានជ័យ ក្នុងឱកាសដែលលោកអញ្ជើញចូលរួមដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត នៅព្រឹកថ្ងៃទី១៧ ខែសីហា ឆ្នាំ២០២៤ ដោយមានការចូលរួមពីថ្នាក់ដឹកនាំខេត្ត មេបញ្ជាការកងកម្លាំងប្រដាប់អាវុធទាំង៣របស់ខេត្ត មេបញ្ជាការកងកម្លាំងប្រដាប់អាវុធតាមព្រំដែន លោក លោកស្រី ជាប្រធានមន្ទីរអង្គភាព ជុំវិញខេត្ត ប្រធានច្រកទ្វារព្រំដែនអន្តរជាតិទាំង៣ អាជ្ញាធមូលដ្ឋានក្រុង-ស្រុក-សង្កាត់-ឃុំ និងស្ថាប័នពាក់ព័ន្ធជាច្រើនទៀត។

កិច្ចប្រជុំនាឱកាសនេះផ្តោតសំខាន់ពិនិត្យលើបញ្ហាសន្តិសុខ សណ្តាប់ធ្នាប់ នៅតាមមូលដ្ឋាន ខេត្ត ក្រុង ស្រុក និងតាមបណ្តោយព្រំដែន ក៏ដូចជាពិនិត្យបញ្ហាប្រឈម និងបទល្មើសនានា ដែលកើតមានឡើង ដើម្បីរួមគ្នាបង្រ្កាប និងទប់ស្កាត់ឱ្យមានប្រសិទ្ធិភាពខ្ពស់។ បន្ថែមលើសពីនេះគឺដើម្បីផ្សព្វផ្សាយពីសភាពការណ៍ថ្មីៗដែលកើតមានឡើង ក៏ដូចជាវិធានការទប់ស្កាត់ឱ្យខានតែបាន ចំពោះចលនាញុះញង់បង្កឱ្យមានចលាចលនៅក្នុងប្រទេស។

លោក មាន ចាន់យ៉ាដា បានថ្លែងណែនាំ និងដាក់បទបញ្ជាបន្ថែម ដល់មេបញ្ជាការកងកម្លាំងប្រដាប់អាវុធទាំង៣របស់ខេត្ត ក៏ដូចជានៅតាមព្រំដែន និងអាជ្ញាធរមូលដ្ឋាន ក្រុង ស្រុក ឃុំ សង្កាត់ ទូទាំងខេត្ត ត្រូវគោរពអនុវត្តបទ បញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងបទបញ្ជារបស់អភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ អគ្គស្នងការដ្ឋាននគរបាលជាតិ អគ្គបញ្ជាការកងយោធពលខេមរភូមិន្ទ ឱ្យមានប្រសិទ្ធិភាព ទប់ស្កាត់ឱ្យបានរាល់ជនណាឫក្រុមណាមួយដែលមានបំណងផ្តួលរំលំរាជរដ្ឋាភិបាលស្របច្បាប់។

លោកអភិបាលខេត្តឧត្តរមានជ័យ ក៏បានថ្លែងណែនាំដល់អាជ្ញាធរមូលដ្ឋាន ក្រុង ស្រុក ឃុំ សង្កាត់ ត្រូវបន្តផ្សព្វផ្សាយដល់ប្រជាពលរដ្ឋឱ្យបានយល់ពីសារៈប្រយោជន៍របស់គម្រោងអភិវឌ្ឍតំបន់ត្រីកោណ កម្ពុជា-ឡាវ-វៀតណាម CLV-DTA ដើម្បីកុំឱ្យចាញ់ការឃោសនា ញុះញង់បោកប្រាស់ របស់ក្រុមប្រឆាំងមួយក្តាប់តូចដែលនិយាយថាគម្រោងនេះធ្វើឱ្យបាត់បង់ទឹកដី។ជាមួយគ្នានេះត្រូវពន្យល់ណែនាំប្រជាពលរដ្ឋ កុំឱ្យចាញ់បោកគេទៅចូលរួមធ្វើបាតុកម្មដែលជាអំពើខុសច្បាប់។

ក្រោយពបញ្ចប់នូវកិច្ចប្រជុំលោក មាន ចាន់យ៉ាដា បានដឹកនាំមេបញ្ជាការកងកម្លាំងប្រដាប់អាវុធទាំង៣ មន្ត្រីពាក់ព័ន្ធ ចុះត្រួតពិនិត្យមើលស្ថានភាពជាក់ស្តែងនៅតាមច្រកទ្វារព្រំដែនអន្តរជាតិ កម្ពុជា-ថា នៅក្នុងភូមិសាស្ត្រខេត្តឧត្តរមានជ័យ ជាមួយនឹងការថ្លែងលើកទឹកចិត្តដល់មន្ត្រី សមត្ថកិច្ច នៅតាមច្រកទ្វារព្រំដែនទាំងអស់ បន្តបង្កើនការយកចិត្តទុកដាក់ឱ្យបានខ្ពស់ជាប់ជាប្រចាំ៕