(កែប)៖ លោក កែន សត្ថា អភិបាលខេត្តកែប បានណែនាំដល់សិស្សានុសិស្សឲ្យយកចិត្តទុកដាក់ក្នុងការរៀនសូត្រ ជាពិសេសសិស្សដែលត្រូវប្រឡងមធ្យមសិក្សាបឋមភូមិ ត្រូវពឹងផ្អែកលើចំណេះវិជ្ជា និងសមត្ថភាពរបស់ខ្លួន អ្នកចេះគឺប្រឡងជាប់សញ្ញាបត្រ ដោយស័យប្រវត្តិ គឺគ្មានការពឹងពាក់ពីអ្នកណាឡើយ។
ការលើកឡើងបែបនេះ ខណៈដែល លោក កែន សត្ថា អភិបាលនៃគណៈអភិបាលខេត្តកែប បានអញ្ជើញជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្សថ្នាក់ទី០៩ ដែលត្រៀមប្រឡងសញ្ញាបត្រមធ្យមសិក្សាបឋមភូមិ ចំនួន៦១នាក់ នាថ្ងៃអាទិត្យ៩រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៥ខែសីហា ឆ្នាំ២០១៨ នៅវិទ្យាល័យ ហ៊ុន សែន ចំការដូង ស្ថិតក្នុងឃុំពងទឹក ស្រុកដំណាក់ចង្អើរ ខេត្តកែប។
លោកអភិបាលខេត្តកែបបានបញ្ជាក់បន្ថែមថា សិស្សានុសិស្សត្រូវខិតខំយកចិត្តទុកដាក់រៀនសូត្រឲ្យបានពូកែ និងយកចិត្តទុកដាក់ក្នុងពេលប្រឡង សិស្សដែលរៀនពូកែចេះចាំបានល្អ ពិតជាប្រឡងជាប់មិនចាំបាច់ពឹងអ្នកណាជ្រោមជ្រែងនោះទេ។លោក កែន សត្ថា បានលើកឡើងទៀតថា យើងជាយុវជនត្រូវតែមានគំរូល្អ ធ្វើជាកូនល្អ សិស្សល្អ ត្រូវស្តាប់ដំបូន្មានឪពុក ម្តាយ និងការទូន្មានរបស់លោកគ្រូ អ្នកគ្រូ ហើយធ្វើយ៉ាងណាត្រូវចេះស្វែងយល់និងការបែងចែកអាក្រក់និងល្អ សម្រាប់ជាទំពាំងស្នងឫស្សីចូលរួមចំណែកអភិវឌ្ឍប្រទេសជាតិទៅថ្ងៃអនាគត។ជាមួយនេះដែរ លោកអភិបាលខេត្ត ក៏បានដាស់តឿនដល់សិស្សានុសិស្ស ត្រូវគោរពច្បាប់ចរាចរណ៍ និងជៀសឲ្យឆ្ងាយពីគ្រឿងញៀន។
សូមបញ្ជាក់ថា សម័យប្រឡងសញ្ញាបត្រមធ្យមសិក្សាបឋមភូមិ នឹងប្រព្រឹត្តទៅនៅថ្ងៃច័ន្ទ១០រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៦ខែសីហា ឆ្នាំ២០១៨ស្អែកនេះហើយ៕ សេង ណារិទ្ធ
