កែប ៖ នៅរសៀលថ្ងៃពុធ ០១កើត ខែបឋមសាធ ឆ្នាំច សំរឹទ្ធិស័ក ពស ២៥៦២ ត្រូវនឹងថ្ងៃទី ១៣ ខែ មិថុនា ឆ្នាំ២០១៨ នៅមន្ទីរអប់រំយុវជន និងកីឡាខេត្ត បានរៀបចំពិធីបំពាក់គ្រឿងឥស្សរិយយស និងប័ណ្ណសរសើរជូនដល់បុគ្គលិកអប់រំខេត្ត ក្រោមអធិបតីភាពលោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា លោក កែន សត្ថា អភិបាល នៃគណៈអភិបាលខេត្តកែប។ពិធីនេះក៏មានការចូលរួមពីសំណាក់ លោក លោកស្រី ជាក្រុមប្រឹក្សាខេត្ត អភិបាលរងខេត្ត ប្រធានមន្ទីរអង្គភាពជុំវិញខេត្ត អភិបាលក្រុង ស្រុក កងកម្លាំងប្រដាប់អាវុធទាំងបី បុគ្គលិកមន្ទីរអប់រំ សិស្សានុសិស្សសរុបចំនួន ២៤៨ នាក់។
ជាកិច្ចស្វាគមន៍ លោក កែន សត្ថា អភិបាលនៃគណៈអភិបាលខេត្ត បានមានប្រសាសន៍លើកឡើងថា វិស័យអប់រំ គឺជាគន្លឹះជាអាទិភាពរបស់រាជរដ្ឋាភិបាលកម្ពុជា ក្នុងការជំរុញសន្ទុះនៃការកសាង និងអភិវឌ្ឍប្រទេសជាតិឲ្យមានការរីចម្រើន ពិសេសការធ្វើសមាហរណកម្មសេដ្ឋកិច្ច នយោបាយទៅក្នុងអន្តរជាតិ និងតំបន់ ដោយវិស័យនេះ រាជរដ្ឋាភិបាលបន្តយកចិត្តទុកដាក់កាន់តែខ្លាំងឡើង ទៅលើការអភិវឌ្ឍធនធានមនុស្សដែលជាកត្តាមុតស្រួច ក្នុងការទ្រទ្រង់ដល់កំណើនសេដ្ឋកិច្ចកម្ពុជា ទាំងនៅចំពោះមុខនិងពេលអនាគត ជាពិសេសក្នុងពេលដែលកម្ពុជាមានចក្ខុវិស័យចង់ក្លាយទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសអភិវឌ្ឍនៅឆ្នាំ២០៥០។
លោកបណ្ឌិត សភាចារ្យ ហង់ ជួនណារ៉ុន បានមានប្រសាសន៍ផ្តាំផ្ញើចំពោះលោកគ្រូ អ្នកគ្រូ ដែលមានស្នាដៃល្អក្នុងការបំពេញភារកិច្ចជូនជាតិ មាតុភូមិបន្តយកចិត្តទុកដាក់អនុវត្តឲ្យមានប្រសិទ្ធភាព និងស្មារតីទទួលខុសត្រូវខ្ពស់ ស្របតាមភារកិច្ចរៀងៗខ្លួន និងត្រូវចូលរួមបំពេញកាតព្វកិច្ចជាពលរដ្ឋ ដោយសូមអញ្ជើញ និងជំរុញកៀងគរបុគ្គលិកក្នុងអង្គភាព ក្រុមគ្រួសារសាច់ញាតិ ប្រជាពលរដ្ឋក្នុងសហមគន៍ ដើម្បីទៅបោះឆ្នោតជ្រើសតាំងតំណាងរាស្ត្រ នីតិកាលទី៦ នៃរដ្ឋសភា ដែលនឹងប្រព្រឹត្តទៅនាថ្ងៃអាទិត្យទី២៩ ខែកក្កដា ឆ្នាំ២០១៨ ខាងមុខនេះ ឲ្យបានគ្រប់ៗគ្នា។
នៅចុងបញ្ជប់នៃពិធី លោកបណ្ឌិតសភាចារ្យ បានផ្តល់កិត្តិយសបំពាក់គ្រឿងឥស្សរិយយស និងប័ណ្ណសរសើរជូនបុគ្គលិកអប់រំដែលមានស្នាដៃក្នុងការបំពេញភារកិច្ចជូនជាតិមាតុភូមិផងដែ ៕
សេង ណារិទ្ធ
