កំពត ៖ បុរសម្នាក់បានរងរបួសធ្ងន់ធ្ងរ ដោយសាររថយន្តបុកម៉ូតូពីក្រោយពេញទំហឹង កាលពីល្ងាចថ្ងៃទី០៧ខែមិថុនា ឆ្នាំ២០១៨ ស្ថិតចំណុចទល់មុខធនាគារអេស៊ីលីដា ក្នុងភូមិកំពង់ត្រាចទី២ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត លើកំណាត់ផ្លូវជាតិលេខ៣៣។
តាមការបំភ្លឺពីសាក្សីដែលឃើញហេតុការណ៍ខាងលើបាននិយាយថា មុនពេលកើតហេតុគេឃើញជនរងគ្រោះជិះម៉ូតូម៉ាកសេ១២៥ម្នាក់ឯងក្នុងទិសដៅពីកើតទៅលិច លុះមកដល់ចំណុចកើតហេតុក៏មានរថយន្តម៉ាកលុចស៊ីសមួយគ្រឿងបោះពួយមកពីក្រោយស្របគ្នា ហើយជ្រុលទៅព្រលះអ្នកជិះម៉ូតូនៅខាងមុខពេញទំហឹង បណ្តាលឲ្យដួលពីរ បីត្រឡប់របួសធ្ងន់សន្លប់ឈឹងក្នុងថ្លុកឈាមតែម្តង។សាក្សីបានបញ្ជាក់ឲ្យដឹងទៀតថា ក្នុងខណៈពេលកើតហេតុគ្រោះថ្នាក់ចរាចរនេះគាប់ជួនក៏មានរថយន្តខ្នាតធំដឹកទំនិញមួយគ្រឿងបើកមកពីខាងលិចក្នុងទិសបញ្ច្រាសក្នុងល្បឿនបង្គួរ លុះពេលឃើញហេតុការណ៍កើតឡើងបែបនេះ ក៏បានជាន់ហ្វ្រាំងចតឈប់នៅកន្លែងកើតហេតុ ដោយសារខ្លាចកិនមនុស្សដែលខ្ទាតចូលមកចំណែករថយន្តរបស់ខ្លួន ហើយករណីគ្រោះថ្នាក់ខាងលើអ្នកខ្លះយល់ច្រឡំថាម៉ូតូបុកជាមួយរថយន្តធំនេះ ប៉ុន្តែតាមពិតម្ចាស់ម៉ូតូរងរបួសដោយសាររថយន្តលុចស៊ីសបុករួចគេចបាត់ស្រមោលភ្លាមៗទៅទិសខាងលិច ហើយក៏គ្មានអ្នកណាចំណាំស្លាកលេខរថយន្តឡើយ។
សមត្ថកិច្ចនគរបាលចរាចរណ៍ស្រុកដែលមកពិនិត្យនៅកន្លែងកើតហេតុនិយាយថា នេះជាគ្រោះថ្នាក់ចរាចរបង្កឡើងដោយសាររថយន្តលុចស៊ីស បុកម៉ូតូពីក្រោយហើយខ្ទាតមនុស្សចូលទៅខាងរថយន្តខ្នាតធំដែលបើកបរបញ្ច្រាសគ្នា។
សមត្ថកិច្ចបញ្ជាក់ទៀយថា ជនរងគ្រោះមានឈ្មោះ ដុស នី ភេទប្រុស អាយុ៤៤ឆ្នាំ រស់នៅភូមិចំការបី ឃុំពងទឹក ស្រុកដំណាក់ចង្អើរ ខេត្តកែប ជនរងគ្រោះជិះម៉ូតូម្នាក់ឯង ម៉ាកC125ពណ៌ខ្មៅ ពាក់ស្លាកលេខ កំពង់ចាម 1A-4738 ។ ដោយឡែករថយន្តម៉ាកលុចស៊ីសបង្កហេតុមិនស្គាល់អត្តសញ្ញាណឡើយ។
បច្ចុប្បន្នបុរសរងគ្រោះដែលរងរបួសធ្ងន់ត្រូវបានគេបញ្ជូនទៅសង្គ្រោះនៅឯមន្ទីរពេទ្យប្រទេសវៀតណាមភ្លាមៗ។ចំណែករថយន្តខ្នាតធំដែលជាប់ពាក់ព័ន្ធ សមត្ថកិច្ច កំពុងធ្វើការត្រួតពិនិត្យតាមជំនាញ៕
សេង ណារិទ្ធ
