(បាត់ដំបង)៖ នាថ្ងៃទី៨ ខែកញ្ញា ឆ្នាំ២០២៣នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ នាយកខុទ្ទកាល័យ ប្រធានមន្ទីរ និងមន្ត្រីជំនាញ បានចុះពិនិត្យស្ថានភាពទឹក និងប្រព័ន្ធធារាសាស្ត្រចំនួន២ទីតាំង គឺទី១នៅក្នុងភូមិសាស្ត្រខេត្តពោធិ៍សាត់ និងទី២នៅខេត្តបាត់ដំបង។
នាពេលព្រឹក ឯកឧត្តម រដ្ឋមន្ត្រីបានចុះត្រួតពិនិត្យស្ថានភាពទឹក និងជួបសំណេះសំណាលផ្ទាល់ជាមួយសហគមន៍កសិករប្រើប្រាស់ទឹកនៅប្រព័ន្ធធារាសាស្ត្រដំណាក់អំពិល ស្ថិតក្នុងស្រុកបាកាន ខេត្តពោធិ៍សាត់។ លោករដ្ឋមន្ត្រីបានផ្តាំផ្ញើដល់សហគមន៍កសិករឱ្យជួយថែរក្សាសមិទ្ធផលដែលមានស្រាប់ និងបានគាំទ្រសំណើមន្ទីរធនធានទឹក និងឧតុនិយមខេត្តពោធិ៍សាត់ សម្រាប់គម្រោងជួសជុលថែទាំប្រព័ន្ធធារាសាស្ត្រដំណាក់អំពិល និងប្រព័ន្ធធារាសាស្ត្រដំណាក់ឈើក្រំ។
សូមជម្រាបថា ប្រព័ន្ធធារាសាស្ត្រដំណាក់អំពិលនេះ ជាប្រព័ន្ធធារាសាស្ត្រមួយមានលក្ខណៈពេញលេញ ដែលមានសមត្ថភាពផ្តត់ផ្គង់ទឹកស្រោចស្រពលើផ្ទៃដីស្រូវវស្សាប្រមាណ២៧,០០០ហិកតា និងស្រូវប្រាំងប្រមាណ៩,០០០ហិកតា។ ប្រព័ន្ធធារាសាស្ត្រដំណាក់អំពិល មានសក្តានុពលផ្តល់ជាប្រភពទឹកប្រើប្រាស់ខួបប្រាំងខួបវស្សាដល់កសិករទទួលផលប្រមាណជិត៤ម៉ឺននាក់។
នាពេលរសៀល ឯកឧត្តម រដ្ឋមន្ត្រី ថោ ជេដ្ឋា បានបន្តចុះត្រួតពិនិត្យទំនប់ដូនទ្រី ស្ថិតក្នុងស្រុករុក្ខគិរី ខេត្តបាត់ដំបង ដែលជាគម្រោងមួយទទួលបានកម្ចីសម្បទានពីសាធារណរដ្ឋកូរ៉េ។ ក្រុមហ៊ុនសាងសង់បានជម្រាបលោករដ្ឋមន្ត្រី និងក្រុមការងារផងដែរថា វឌ្ឍនភាពការសាងសង់ទំនប់ដូនទ្រីមកដល់បច្ចុប្បន្នសម្រេចបាន ៧១% និងគ្រោងបញ្ចប់ការងារទាំងស្រុងនៅចុងឆ្នាំ២០២៥ខាងមុខ។
គួរបញ្ជាក់ថា ការសាងសង់ទំនប់ដូនទ្រីនេះ គឺក្នុងគោលបំណងដើម្បីផ្គត់ផ្គង់ទឹកឱ្យបានគ្រប់គ្រាន់ដល់ប្រព័ន្ធធារាសាស្ត្រដែលស្ថិតនៅផ្នែកខាងក្រោមនៃអាងស្ទឹងដូនទ្រី និងដើម្បីកាត់បន្ថយគ្រោះទឹកជំនន់បានមួយភាគនៅតំបន់ផ្នែកខាងក្រោមបឹងទន្លេសាប។ ទំនប់ដូនទ្រីជាទំនប់ដែលមានផ្ទៃរងទឹកភ្លៀងធំរហូតដល់៦១៣.៤គីឡូម៉ែត្រក្រឡា មានសមត្ថភាពស្តុកទឹកបានរហូតដល់១៦៣.១លានម៉ែត្រគូប និងមានសក្តានុពលស្រោចស្រពផ្ទៃដីស្រូវវស្សាចំនួន៣៣,០០០ហិកតា និងស្រោចស្រពផ្ទៃដីស្រូវប្រាំង៤,៥០០ហិកតា៕
