កំពត ៖ សមត្ថកិច្ចនៃអធិការដ្ឋាននគរស្រុកកំពង់ត្រាច កាលពីវេលាម៉ោង២និង២០នាទី ថ្ងៃទី០៥ខែមេសា ឆ្នាំ២០១៨ បានចេញប្រតិបតិ្តការបង្ក្រាបគ្រឿងញៀន ដោយបានឃាត់ខ្លួនមនុស្សចំនួនបីនាក់ បន្តបន្ទាប់គ្នា និងដកហូតថ្នាំញៀន-សម្ភារៈពាក់ព័ន្ធមួយចំនួនផងដែរ។
លោកវរសេនីយ៍ត្រី សឹម នៅ អធិការរងទទួលផែនសន្តិសុខនៃអធិការដ្ឋាននគរបាលស្រុកកំពង់ត្រាច បានឱ្យដឹងថា ដោយអនុវត្តតាមបទបញ្ជារបស់ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត ព្រមទាំងការចង្អុលណែនាំពី និងចុះប្រតិបតិ្តការផ្ទាល់ដោយ លោកវរសេនីយ៍ទោ សេង សុគន្ធចាត់ អធិការនគរបាលស្រុកកំពង់ត្រាច ទើបប្រតិបតិ្តការនេះប្រកបដោយជោគជ័យ។លោកបញ្ជាក់ទៀតថា នៅវេលាម៉ោង២និង២០នាទី រសៀលថ្ងៃទី០៥ខែមេសា ឆ្នាំ២០១៨ កម្លាំងបានឃាត់ខ្លួនជនសង្ស័យម្នាក់ នៅចំណុចភូមិកោះផ្តៅ ឃុំកំពង់ត្រាចខាងលិច ស្រុកកំពង់ត្រាច ដែលជាមុខសញ្ញាជួញដូរ និងប្រើប្រាស់គ្រឿងញៀន មានឈ្មោះ តៀម នី ភេទប្រុស អាយុ២៣ឆ្នាំ រស់នៅចំណុច ទីតាំងបង្ក្រាបខាងលើ។លុះដល់ម៉ោង៣និង៣០នាទី រសៀល ថ្ងៃ ខែ ឆ្នាំដដែលយើងបានឃាត់ខ្លួនជនសង្ស័យម្នាក់ទៀត ឈ្មោះ ធី វិទូ ភេទប្រុស អាយុ២៥ឆ្នាំ មានទីលំនៅភូមិដីថ្មី ឃុំមណ្ឌលពីរ ស្រុកព្រៃព្រិច ខេត្តបន្ទាយមានជ័យ។ហើយខណៈនោះ កម្លាំងក៏បានបន្តទៅឃាត់ខ្លួនជនសង្ស័យម្នាក់ទៀត នៅវេលាម៉ោង៤និង៤០នាទីរសៀល ក្នុងថ្ងៃដដែលកម្លាំងបានឃាត់ខ្លួន ឈ្មោះញ៉ុក ហ៊ន ភេទប្រុស អាយុ២៥ឆ្នាំ មានទីលំនៅក្នុងសង្កាត់ព្រៃធំ ក្រុងកែប ដោយជនសង្ស័យបានប្រើប្រាស់គ្រឿនញៀន នៅចំណុច ភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។
បច្ចុប្បន្នជនសង្ស័យទាំងបីនាក់ រួមនឹងវត្ថុតាង កម្លាំងជំនាញនៃអធិការនគរបាលស្រុកកំពង់ត្រាច កំពុងកសាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តនៅព្រឹកថ្ងៃទី០៦ខែមេសា ឆ្នាំ២០១៨នេះ៕
សេង ណារិទ្ធ
