កំពត ៖ រថយន្តHilux.Vigoនិងរថយន្តHilux.Surfបោះពួយសុខៗស្រាប់តែរេចង្កូតទៅព្រលះគ្នាពេញទំហឹង ទីបំផុតរថយន្តទាំងពីគ្រឿងត្រូវរងការខូចខាតផ្នែកខាងមុខយ៉ាងដំណំដូចគ្នា។ប៉ុន្តែហេតុការណ៍ខាងលើ មិនបណ្តាលឱ្យមានអ្នកណារបួសធ្ងន់ធ្ងរនោះទេ គឺរបួសត្រឹមលាបប្រេងកូឡាប៉ុណ្ណោះ។
ហេតុការណ៍នេះបានកើតឡើងកាលពីយប់ថ្ងៃទី ០៤ខែមេសា ឆ្នាំ២០១៨ វេលាម៉ោង២២ ស្ថិតចំណុចមុខផ្នូរកប់សាកសពសមាគមន៍ជនជាតិចិន ក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត លើកំណាត់ផ្លូវជាតិលេខ៣១។
យោងតាមប្រភពនៅកន្លែងកើតហេតុបាននិយាយថា មុនពេលប៉ះទង្គិចគ្នា គេឃើញរថយន្តម៉ាកHilux.Vigo ធ្វើដំណើរពីលិចទៅកើតក្នុងល្បឿនបង្គួរ លុះមកដល់ចំណុចកើតហេតុ ក៏មានរថយន្តម៉ាកHilux.Surf ធ្វើដំណើរពីកើតទៅលិចក្នុងទិសដៅបញ្ច្រាសគ្នា តែមិនដឹងដូចម្តេច ស្រាប់តែរថយន្តម៉ាកVIGO រេចង្កូតទៅចំណែកផ្លូវម្ខាង(ហួសគំនូសកណ្តាល) បណ្តាលឱ្យប៉ះទង្គិចគ្នាជាមួយរថយន្តម៉ាកSURFចំខាងមុខចំហៀងខាងឆ្វេងដូចគ្នា ធ្វើឱ្យក្រពិតថ្ពាល់ទាំងសងខាងតែម្តង។
ប្រភពបញ្ជាក់ទៀតថា រថយន្តទាំងពីរគ្រឿងពេលប៉ះទង្គិចគ្នា ក៏បានបែកមុខម្ខាងដូចគ្នា ហើយរេចង្កូតធ្លាក់ចូលស្នាមភ្លោះទាំងអស់គ្នា ប៉ុន្តែអ្នកបើកបរទាំងពីរដួង ពុំបានរងរបួសធ្ងន់ធ្ងរនោះឡើយ ហើយនេះចាត់ទុកជាសំណាងមួយ ក្នុងមួយពាន់គ្រោះថ្នាក់ផងដែរ។
ជាមួយនឹងគ្រោះថ្នាក់ខាងលើ ប៉ូលិសចរាចរណ៍ស្រុក ដែលមកជួយអន្តរាគមន៍ បានប្រាប់ថា រថយន្តម៉ាកVigoជាអ្នកខុស បើកបរដោយឈ្មោះ ធាង សីុម ភេទប្រុស អាយុ៦២ឆ្នាំ រស់នៅក្នុងឃុំភ្នំប្រាសាទ ស្រុកកំពង់ត្រា។ដោយឡែក រថយន្តម៉ាកSURF បើកបរដោយ ឈ្មោះ សាន ស្មាន់ ភេទប្រុស អាយុ៦៨ឆ្នាំ រស់នៅក្នុងទីប្រជុំជនស្រុកកំពង់ត្រាច ខេត្តកំពត។
ក្រោយពីវាស់វែងរថយន្តទាំងពីរគ្រឿងត្រូវបានសមត្ថកិច្ចយកទៅរក្សាទុក សម្រាប់ឱ្យភាគីម្ចាស់រថយន្តទាំងសងខាងចូលមកដោះស្រាយគ្នាតាមនីតិវិធី៕
សេង ណារិទ្ធ
