ព្រះវិហារ ៖ ប្រតិភូ២ខណ្ឌនិងមន្ទីរសាធារណការនិងដឹកជញ្ជូនរាជធានីភ្នំពេញ បានចុះសួរសុខទុក្ខ និងនាំយកអំណោយគ្រឿងឧបភោគ បរិភោគ និងថវិកា ជូនដល់កងកម្លាំងនគរបាលវរសេនាតូចលេខ ៧៩៣ ឈរជើងនៅទិសច្រកអានសេះ ខេត្តព្រះវិហារ នៅព្រឹកថ្ងៃទី២៩ ខែមីនា ឆ្នាំ២០១៨ ។
ប្រតិភូខណ្ឌទាំង៣អង្គភាពនេះ រួមមានមន្ទីរសាធារណការ និងដឹកជញ្ជូនរាជធានីភ្នំពេញ ដឹកនាំដោយលោក សាំ ពិសិដ្ឋ សាលាខណ្ឌព្រែកព្នៅ ដឹកនាំដោយលោក សុខ សម្បត្តិ និងសាលាខណ្ឌពោធិសែនជ័យ ដឹកនាំដោយលោក កែវ សុភា អភិបាលរងខណ្ឌ ។
លោកសាំ ពិសិដ្ឋ លោកប្រធានមន្ទីរសាធារណការនិងដឹកជញ្ជូនរាជធានីភ្នំពេញ ជំនួសមុខអោយប្រតិភូ បានថ្លែងការកោតសរសើរ ដោយស្មោះអស់ពីដួងចិត្ត ចំពោះវរភាពដ៏អង់អាចក្លាហានរបស់បងប្អូនវរៈនគរបាលនៅសមរភូមិមុខ នាតំបន់ប្រាសាទព្រះវិហារ ដែលបានតស៊ូជម្នះគ្រប់ ឧបសគ្គគ្រប់យ៉ាង និងហ៊ានបូជាសាច់ស្រស់ឈាមស្រស់ ដើម្បីបុព្វហេតុ ការពារជាតិ មាតុភូមិនិងការពារបូរណភាពទឹកដីរបស់យើង ដោយមិនអោយសត្រូវឈ្លានពានមកលើទឹកដីកម្ពុជាយើងបានជាដាច់ខាត សូម្បីមួយចំអាម ឬមួយមីល្លីម៉ែត្រ។ ក្រៅពីនេះ លោកសាំ ពិសិដ្ឋក៏បានសូមឲ្យកងកម្លាំងនគរបាលវរៈសេនាតូចលេខ ៧៩៣ ឈរជើងនៅទិសច្រកអានសេះ ខេត្តព្រះវិហារយកចិត្តទុកដាក់លើបញ្ហាសុខភាព និងទប់ស្កាត់អោយបានពីការឈ្លានពានពីពួកបរទេស។
ក្នុងឱកាសនោះក្រៅពីសួរសុខទុក្ខ គណៈប្រតិភូបានជូនអំណោយសម្រាប់ឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ នោះ មានទឹកក្រូច ៦០កេស ស្រាបៀរ ៥០កេស និងមីម៉ាម៉ា ៦០កេសព្រមទាំងផ្តល់ថវិកាដល់កងកម្លាំងនគរបាលវរៈសេនាតូចលេខ ៧៩៣ ចំនួន ២៨១នាក់ ដោយម្នាក់ៗទទួលបាន ៤ម៉ឺនរៀល ។ ចំណែកមេបញ្ជាការភូមិភាគ ម្នាក់ ៥០ម៉ឺនរៀល។ មេវរៈ ម្នាក់៤០ម៉ឺនរៀល និងអនុវរៈ ចំនួន ៦នាក់ ដោយម្នាក់ៗ បាន ២០ម៉ឺនរៀល៕
