ភ្នំពេញ នៅព្រឹកថ្ងៃទី៣០ មីនា នេះ គណៈប្រតិភូរដ្ឋបាលរាជធានីភ្នំពេញ ដឹកនាំដោយលោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានដឹកនាំមន្ត្រីរដ្ឋបាលរាជធានីចុះសួរសុខទុក្ខ និងនាំយកអំណោយជាគ្រឿងឧបភោគបរិភោគ និងថវិការបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ចែកជូននាយទាហាន និងពលទាហាន កងពលតូចអន្តរាគមន៍លេខ១២៨ យោធភូមិភាគទី១ ដែលបាននិងកំពុងឈរជើងនៅតំបន់អូអាឡៃ ឃុំថ្មដា ស្រុកសៀមប៉ាង ខេត្តស្ទឹងត្រែង ព្រំប្រទល់ជាមួយប្រទេសឡាវ ក្នុងឱកាសបុណ្យចូលឆ្នាំខ្មែរ។
លោកឧត្តមសេនីយ៍ត្រី មៀច សាមុត មេបញ្ជាការកងពលតូចអន្តរាគមន៍លេខ១២៨ នៅស្រុកសៀមប៉ាង ខេត្តស្ទឹងត្រែង បានមានប្រសាសន៍លើកឡើងថា ដោយមានការគាំទ្រពីរដ្ឋបាលរាជធានីភ្នំពេញ ពិសេសការយកចិត្តទុកដាក់ដ៏ខ្ពង់ខ្ពស់ពីសម្តេចតេជោ ហ៊ុន សែននាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត កងពលតូចអន្តរាគមន៍លេខ១២៨ នៅស្រុកសៀមប៉ាង ខេត្តស្ទឹងត្រែង បាននិងកំពុងកសាងអគារព្យាបាលជំងឺ អគារសម្រាប់បំពេញការងារ រួមទាំងរបង និងខ្លោងទ្វារផងដែរ។
ក្នុងនាមលោកជាមេបញ្ជាការព្រំប្រទល់ជាមួយប្រទេសឡាវ ប្តេជ្ញាចិត្ត ការពារឲ្យបានដាក់ខាតបូរណភាពទឹកដី ការពារជាតិ មាតុភូមិ រដ្ឋធម្មនុញ្ញ ព្រះមហាក្សត្រនិងរាជរដ្ឋាភិបាលស្របច្បាប់ ដែលមានសម្តេចតេជោជាប្រមុខដឹកនាំ ស្មោះត្រង់ជាមួយសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារឥតងាករេ ។
លោក ម៉ប់ សារិន ប្រធានក្រុមប្រឹក្សារាជធានីភ្នំពេញ ក្នុងឱកាសនោះបានមានប្រសាសន៍លើកឡើងពីការអភិវឌ្ឍន៍រីកចម្រើនលើគ្រប់វិស័យរបស់ប្រទេសកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលធ្វើឱ្យប្រទេសមួយនេះមានឈ្មោះបោះសំឡេងនៅលើឆាក់អន្តរជាតិ។
ជាក់ស្តែងនាពេលថ្មីៗនេះ ក្នុងដំណើរអញ្ជើញចូលរួមកិច្ចប្រជុំកំពូលពិសេសអាស៊ាន-អូស្ត្រាលីរបស់សម្តេច តេជោ គឺជាជោគជ័យថ្មីថែមទៀតសម្រាប់ព្រះរាជាណាចក្រយើង ដោយបានវាយបំបាក់ឆ្អឹងខ្នងពួកអគតិមួយក្តាប់តូច ដែលមានបំណងប្រឆាំងវត្តមានរបស់សម្តេចតេជោនៅអូស្ត្រាលី ដោយប្រជាជនយើងយ៉ាងច្រើនកុះករមកទទួលស្វាគមន៍វត្តមានរបស់សម្តេចតេជោ នាយករដ្ឋមន្ត្រី ប្រកបដោយមនោសញ្ចេតនាគោរពស្រលាញ់អស់ពីដូងចិត្ត។ លើសពីនេះទៀតរាជរដ្ឋាភិបាលអូស្ត្រាលី ក៏បានសម្រេចផ្តល់ជំនួយចំនួន ៨៧លានដុល្លារ ដល់ប្រទេសកម្ពុជាយើងទៀតផង។ នេះជាការបញ្ជាក់ឱ្យឃើញពីសន្តិភាពពិត
ជាមានសារៈសំខាន់ណាស់សម្រាប់ជាតិសាសនាយើង។
ក្នុងឱកាសនោះដែរ លោក ម៉ប់ សារិន ក៏បានផ្ដាំផ្ញើឱ្យនាយទាហាន ពលទាហាននិងកងកម្លាំងប្រដាប់អាវុធទាំងអស់ ត្រូវបង្កើតស្មារតីយកចិត្តទុកដាក់ និងទទួលខុសត្រូវខ្ពស់ក្នុងការបំពេញភារកិច្ច ក៏ដូចជាពង្រឹងកិច្ចសហប្រតិបត្តិការល្អក្នុងកិច្ចការងារបូរភាពទឹកដី សូម្បីតែមួយមីលីម៉ែត្រ ទប់ស្កាត់បដិវត្តពណ៌របស់ពួកក្បត់ជាតិ និងការពារឱ្យបាននូវរាជរដ្ឋាភិបាលស្របច្បាប់ ដែលមានសម្តេចតេជោជាប្រមុខ។
លោក ម៉ប់ សារិន បានបញ្ជាក់ផងដែរថា អំណោយរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ដែលប្រតិភូរដ្ឋបាលរាជធានីភ្នំពេញ នាំទៅចែកជូននាពេលនេះរួមមាន ទីបញ្ជាការដ្ឋានកងពលតូចអន្តរាគមន៍លេខ១២៨ យោធភូមិភាគទី១ថវិកាចំនួន ២០ លានរៀល មេបញ្ជាការមួយរូបទទួលបានថវិកាចំនួន ៤ សែនរៀលមេបញ្ជាការរង នាយរងសេនាធិការកងពលចំនួន ១៥ នាក់ ក្នុងម្នាក់ៗទទួលបានថវិកា ២០ ម៉ឺនរៀល នាយ-នាយរងការិយាល័យ នាយ-នាយរងផ្នែក មេបញ្ជាការ បញ្ជាការរងកងអនុសេនាធំ-តូច ចំនួន ១១៧ នាក់ ក្នុងម្នាក់ៗទទួលបានថវិកា ១០ ម៉ឺនរៀល នាយទាហានពលទាហាន ៧២២ នាក់ ក្នុងម្នាក់ៗទទួលបានថវិកា ៥ ម៉ឺនរៀល។ ការងារសាងសង់មន្ទីរពេទ្យលើកទី២ ចំនួន ៣៥០០០ ដុល្លារ។ គ្រឿងឧបភោគបរិភោគ មានមីចំនួន ៦០០ កេសតូច,ទឹកត្រីចំនួន ៤០០ យួរ,ទឹកស៊ីអ៊ីវចំនួន ៤០០ យួរ,ប្រេងម៉ាស៊ូត ៥០០០ លីត្រ និង ថ្នាំពេទ្យ ២១ មុខ ។
ជូនវរៈសេនាតូចអន្តរាគមន៍ចំនួន ៥ វរៈ ក្នុងនោះឧបត្ថម្ភដល់ទីបញ្ជាការវរៈទាំង៥ក្នុងមួយវរៈទទួលបានថវិកាចំនួន ១០ លាមរៀល។ ជូនមេបញ្ជាការវរៈ ៥ នាក់ ក្នុងម្នាក់២០ ម៉ឺនរៀល ចំណែកមេបញ្ជាការរងវរៈ ជំនួយការសេនាធិការ មេបញ្ជា មេបញ្ជាការរង អនុសេនាធំចំនួន ១៩៥ នាក់ ក្នុងម្នាក់ៗចំនួន ១០ ម៉ឺនរៀល។ ដោយឡែកនាយទាហាន ពលទាហាន ៤៤០នាក់ ទាំង ៥ វរៈ ស្មើចំនួន ២២០០ នាក់ ក្នុងម្នាក់ៗបាន ៥ ម៉ឺនរៀល។ ក្នុងនោះទាំង ៥ វរៈ ដោយមួយវរៈទទួលគ្រឿងឧបភោគបរិភោគ មាន មីចំនួន ៣០០ កេស,ទឹកត្រី ២០០ យួរ,ទឹកស៊ីអ៊ីវ២០០ យួរ, ប្រេងម៉ាស៊ូត ៥០០ លីត្រ។
ថវិកាភូមិភាគទី១ ទទួលបាន ៥ លានរៀល,តំបន់សឹករងស្ទឹងត្រែង ១ លានរៀល, សាលាស្រុកសៀមប៉ាង ១លានរៀល, ផ្នែកសឹករងសៀមប៉ាង ៥០ ម៉ឺនរៀល, ប៉េអិមស្រុកសៀមប៉ាង ៥០ម៉ឺនរៀល, នគរបាលស្រុកសៀមប៉ាង ៥០ ម៉ឺនរៀល, ជូនឃុំ ៥០ ម៉ឺនរៀល,ជូនវត្តចំនួនពីរវត្តក្នុងមួយវត្ត ៣ លានរៀល៕
