ភ្នំពេញ ៖ នាព្រឹកថ្ងៃទី២៧ ខែមីនា ឆ្នាំ២០១៨ ឯកឧត្តម វង សូត ទទួលបានការគាំទ្រជាប្រធានគណៈកម្មាធិការជាតិ ស្ប៉េស្យាល់អូឡាំពិកកម្ពុជា អាណត្តិទី ៤ ឆ្នាំ២០១៨-២០២២ តាមរយៈមហាសន្និបាតបញ្ចប់អាណត្តិទី ៣ និងបន្តអាណត្តិទី ៤ បន្តទៀត ។
គួរបញ្ជាក់ថា មហាសន្និបាតនេះ មានការចូលរួមធ្វើជាសាក្សីពីសំណាក់លោក ព្រំ ប៊ុណ្ណយី ទីប្រឹក្សាកីឡាក្រសួងអប់រំ យុវជន និងកីឡា និងលោកឧត្តមសេនីយ៍ឯក តែម ម៉ឺន អគ្គលេខាធិការរង គណៈកម្មាធិការជាតិអូឡាំពិកកម្ពុជា ។
សមាជិកប្រតិបត្តិអាណត្តិថ្មីមាន ១៥រូប ឯកឧត្តម វង សូតប្រធានគណៈកម្មាធិការជាតិ ស្ប៉េស្យាល់អូឡាំពិកកម្ពុជា, លោក សែម សុខ និងលោក មាស សារិន ជាអនុប្រធាន, លោក ឃ្លាំង ចន្ធូ អគ្គលេខាធិការអាណត្តិថ្មីបន្តទៀត លោក ចាប រតនា អគ្គហេរញ្ញឹក ឯសមាជិកប្រតិបត្តិដទៃទៀតនោះ មានលោក ហឿង សុផុន, លោក យៀប ម៉ាលីណូ, លោក ឯម ហៀង, លោក ងិន សុខគ្រវ៉ារ, លោក មាស សារ៉េត, លោក អ៊ុង សារ៉ាន់, លោក សឺន សុផារិទ្ធ, លោក ផេង រ៉ាវី, លោក ឯក អមរា និងលោក ហ៊ួយ ហ៊ួង ។
ក្នុងអាណត្តិទី ៣ កន្លងមកកីឡាករ កីឡាការិនី ខ្សោយបញ្ញារបស់ស្ប៉េស្យ៉ាល់អូឡាំពិក ដណ្តើមបានមេដាយទាំង ៥៤គ្រឿង ក្នុងការប្រកួតលើឆាកអន្តរជាតិ ។
ក្នុងអាណត្តិទី ៣កន្លងមកនេះដែរ គណៈកម្មាធិការជាតិស្ប៉េស្យាល់អូឡាំពិកកម្ពុជា បានបង្កើតអនុគណៈកម្មាធិការ ជាតិស្ប៉េស្យាល់អូឡាំពិករាជធានីខេត្ត បានចំនួន ១៣ គឺរាជធានីភ្នំពេញ សៀមរាប កំពង់ធំ បាត់ដំបង បន្ទាយមានជ័យ ស្វាយរៀង តាកែវ ព្រះសីហនុ កណ្តាល ព្រៃវែង កំពង់ស្ពឺ និងខេត្តកំពង់ចាម ។
បច្ចុប្បន្ននេះ រាជរដ្ឋាភិបាលបានចេញគោលការណ៍ លើ់កទឹកចិត្តផ្តល់ប្រាក់រង្វាន់ដល់ជ័យលាភីខ្សោយសតិបញ្ញា គ្រូបង្វឹក គ្រូជំនួយ និងអ្នកថែទាំក្នុងការចូលរួមប្រកួតកីឡាស្ប៉េស្យ៉ាល់អូឡាំពិក ថ្នាក់ពិភពលោករដូវក្តៅ រដូវរងា ស្ប៉េស្យ៉ាល់អូឡាំពិក អាស៊ីប៉ាស៊ីហ្វិក និងអនុតំបន់ទន្លេមេគង្គជាដើម ៕
ដោយ ៖ សារ៉េត
