កំពត ៖ ពិធីសម្ពោធ បើកពិព័រណ៍ផលិតផលសក្ដានុពលខេត្តកំពត-ពិព័រណ៍ផ្សារណាត់កម្ពុជា-អន្តរជាតិលើកទី៣ ដែលរៀបចំឡើងដោយមន្ទីរពាណិជ្ជកម្មខេត្តកំពត ត្រូវបានធ្វើឡើង កាលពីរសៀលថ្ងៃទី២៧ខែមីនា ឆ្នាំ២០១៨ ស្ថិតចំណុចសួនសាធារណៈ ព្រែកកំពង់បាយ សង្កាត់កំពង់កណ្តាល ក្រុងកំពត ខេត្តកំពត ក្រោមវត្តមានចូលរួម លោក អ៉ឹង ម៉េងហួរប្រធានក្រុមប្រឹក្សាខេត្ត លោក ជាវ តាយអភិបាលនៃគណអភិបាលខេត្តកំពត។
ក្នុងពិធីនេះ លោក ស្រី-កម្ភៈ ប្រធានមន្ទីរពាណិជ្ជកម្មខេត្តបានឲ្យដឹងថា៖ព្រឹត្តិការណ៍ពិព័រណ៍នេះមានរយៈពេល៥ថ្ងៃ មានស្តង់សរុបចំនួន១២០។ ក្នុងនោះសម្រាប់ស្ដង់ផលិតផលខេត្តកំពតមានចំនួន២៥ស្តង់ ស្ដង់មន្ទីរពាណិជ្ជកម្មមកពីបណ្ដាខេត្តផ្សេងៗចំនួន១០ស្តង់និងផលិតផលក្រុមហ៊ុនចំនួន៨៥ស្តង់ ហើយការដាក់តាំងបង្ហាញផលិតផលនេះ ក្នុងគោលបំណងជំរុញសកម្មភាពពាណិជ្ជកម្មនិងវិនិយោគក្នុងខេត្តកំពត ពិសេសជំរុញការនាំចេញផលិតផលសក្ដានុពលខេត្តកំពតទៅកាន់បណ្ដាខេត្តផ្សេងៗ ក៏ដូចជាទៅកាន់ទីផ្សារពិភពលោក ដើម្បីរួមចំណែកក្នុងការពង្រឹង ពង្រីកកិច្ចសហប្រតិបត្តិការពាណិជ្ជកម្មរវាងកម្ពុជានិងអន្តរជាតិ លើផលិតផល ឧស្សាហកម្ម សិប្បកម្ម កសិកម្ម និងវិស័យទេសចរណ៍ផងដែរ។
លោក ជាវ តាយអភិបាលនៃគណៈអភិបាលខេត្ត បានលើកបញ្ជាក់ថា៖ខេត្តកំពតគឺជាខេត្តមួយមានសក្ដានុពលសេដ្ឋកិច្ចស្ទើរគ្រប់វិស័យ ពិសេសវិស័យកសិកម្ម ឧស្សាហកម្ម រ៉ែនិងថាមពល និងវិស័យទេសចរណ៍ជាដើម។
ទន្ទឹមនឹងភាពវិវត្តន៍រីកចម្រើននូវសេដ្ឋកិច្ចកម្ពុជាបច្ចុប្បន្នក្រោមកិច្ចខិតខំប្រឹងប្រែងសំណាក់រាជរដ្ឋាភិបាលក៏ដូចក្រសួងពាណិជ្ជកម្មដែលជាសេនាធិការក្នុងការឲ្យមានបរិយាកាសកាន់តែប្រសើរលើវិស័យពាណិជ្ជកម្មនេះ។ លោក ជាវ តាយក្នុងនាមរដ្ឋបាលខេត្ត បានចាត់ទុក ពិព័រណ៍ផលិតផលសក្ដានុពលខេត្តកំពល និងពិព័រណ៍ផ្សារណាត់កម្ពុជា-អន្តជាតិលើកទី៣ឆ្នាំ២០១៨នាពេលនេះ គឺជាវេទិការពាណិជ្ជកម្ម ដ៏មានសារៈសំខាន់សម្រាប់បងប្អូនអាជីវករ ពាណិជ្ជករ អាចសិក្សា ស្វែងយល់ពិភាក្សាគ្នា ផ្លាស់ប្ដូរគំនិតគ្នាទៅវិញទៅមក ក្នុងប្រយោជន៍បង្កើនដៃគូពាណិជ្ជកម្មផង និងចែករំលែកបទពិសោធន៍ឈានទៅបង្កើតផលិតផលដែលមានគុណភាពខ្ពស់អាចប្រកួតប្រជែងផងដែរដើម្បីផ្គត់ផ្គង់ទីផ្សារក្នុងស្រុកនិងទីផ្សារនាំចេញនាពេលអនាគត។ជាមួយឱកាសនោះលោក ជាវ តាយ ក៏បានសំដែងការគាំទ្រនិងសំណូមពរជំរុញឲ្យអាជីវករពាណិជ្ជករ រោងចក្រ សហគ្រាស ប្រើប្រាស់ពេលវេលាដ៏មានតម្លៃនេះដើម្បីជំរុញការផ្សព្វផ្សាយនិងបង្កើនទំនាក់ទំនងរកស៉ីជាមួយគ្នាឲ្យមានលក្ខណៈយូរអង្វែងផងដែរ ៕
សេង ណារិទ្ធ
